ದುಬೈ: ಪತ್ನಿಯನ್ನು ಸುತ್ತಿಗೆಯಿಂದ ಹೊಡೆದು ಬರ್ಬರವಾಗಿ ಹತ್ಯೆ ಮಾಡಿದ್ದ ಬ್ರಿಟಿಷ್ ದಿನಪತ್ರಿಕೆಯ ಸಂಪಾದಕರೊಬ್ಬರಿಗೆ ದುಬೈ ಕೋರ್ಟ್ 10 ವರ್ಷ ಜೈಲು ಶಿಕ್ಷೆ ವಿಧಿಸಿದೆ.

ನ್ಯಾಯಾಧೀಶ ಫಹದ್ ಅಲ್ ಶಂಶಿ ಅವರು ಪತ್ರಕರ್ತ ಫ್ರಾನ್ಸಿಸ್ ಮ್ಯಾಥಿವ್ ಅವರ ಅನುಪಸ್ಥಿತಿಯಲ್ಲಿ ಶಿಕ್ಷೆಯ ಪ್ರಮಾಣವನ್ನು ಪ್ರಕಟಿಸಿದ್ದಾರೆ.

ಆಂಗ್ಲ ಭಾಷೆಯ ಗಲ್ಫ್ ದಿನ ಪತ್ರಿಕೆಯ ಮಾಜಿ ಸಂಪಾದಕ ಕಳೆದ ವರ್ಷ ಜುಲೈನಲ್ಲಿ ಪತ್ನಿಯನ್ನು ಹತ್ಯೆ ಮಾಡಿದ್ದರು. ಪತ್ನಿ ಹಂತಕನಿಗೆ ಗಲ್ಲು ಶಿಕ್ಷೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿತ್ತು. ಸದ್ಯ ಗಲ್ಲು ಶಿಕ್ಷೆಯಿಂದ ಪಾರಾಗಿದ್ದಾರೆ.

ಮ್ಯಾಥಿವ್ ಅವರ ಪತ್ನಿಯ ಸಹದೋರ ಜಾನೆ ಮ್ಯಾಥೀವ್ ಅವರು ಕೋರ್ಟ್ ನಲ್ಲಿ ಹಾಜರಿದ್ದರು. ಆದರೆ ತೀರ್ಪಿನ ಬಗ್ಗೆ ತಕ್ಷಣಕ್ಕೆ ಮಾಧ್ಯಮಕ್ಕೆ ಯಾವುದೇ ಮಾಹಿತಿ ನೀಡಲು ನಿರಾಕರಿಸಿದ್ದಾರೆ.

ಜುಲೈ 4ರಂದು ದುಬೈ ಪೊಲೀಸರು ಮ್ಯಾಥಿವ್ ಅವರ ವಿಲ್ಲಾಗೆ ಭೇಟಿ ನೀಡಿದಾಗ ಅವರ ಬೆಡ್ ರೂಮ್ ನಲ್ಲಿ ಅವರ ಪತ್ನಿಯ ಮೃತದೇಹ ಪತ್ತೆಯಾಗಿತ್ತು. ಈ ಕುರಿತು ಮ್ಯಾಥಿವ್ ಅವರನ್ನು ಪ್ರಶ್ನಿಸಿದರೆ, ಕಳ್ಳರು ಮನಗೆ ನುಗ್ಗಿ ಪತ್ನಿಯನ್ನು ಹತ್ಯೆ ಮಾಡಿ ಕಳ್ಳತನ ಮಾಡಿದ್ದಾರೆ ಎಂದು ಹೇಳಿದ್ದರು. ಆದರೆ ತನಿಖೆ ನಂತರ ಮ್ಯಾಥಿವ್ ಅಪರಾಧಿ ಎಂಬುದನ್ನು ದುಬೈ ಪೊಲೀಸರು ಪತ್ತೆ ಹಚ್ಚಿದ್ದರು.