ಗಾಜಾ: ಉಗ್ರರು ಎಂದು ತಪ್ಪಾಗಿ ತಿಳಿದು ಇಸ್ರೇಲಿ ರಕ್ಷಣಾ ಪಡೆಗಳು ತನ್ನ ಮೂವರು ಒತ್ತೆಯಾಳುಗಳ ಮೇಲೆ ಗುಂಡು ಹಾರಿಸಿ ಕೊಂದಿದೆ ಎಂದು ಐಡಿಎಫ್ ವಕ್ತಾರ ಡೇನಿಯಲ್ ಹಗರಿ ಅವರ ಹೇಳಿಕೆ ಉಲ್ಲೇಖಿಸಿ ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ. ದುರಂತ ಘಟನೆ"ಯ ಹೊಣೆಯನ್ನು ಐಡಿಎಫ್ ಹೊತ್ತುಕೊಂಡಿದೆ. "ಇದು ಆತ್ಮಹತ್ಯಾ ಬಾಂಬರ್‌ಗಳು ಸೇರಿದಂತೆ ಅನೇಕ ಉಗ್ರರನ್ನು ಸೈನಿಕರು ಎದುರಿಸಿದ ಪ್ರದೇಶವಾಗಿದೆ" ಎಂದು ಹಗರಿ ಹೇಳಿದ್ದಾರೆ.
ಮೂವರು ಇಸ್ರೇಲಿ ಒತ್ತೆಯಾಳುಗಳ ಪೈಕಿ ಇಬ್ಬರನ್ನು ಯೋತಮ್ ಹೈಮ್ ಮತ್ತು ಸಮರ್ ತಲಲ್ಕಾ ಎಂದು ಗುರುತಿಸಲಾಗಿದೆ. ಅವರನ್ನು ಕ್ಫರ್ ಅಜಾ ಮತ್ತು ನಿರ್ ಆಮ್‌ನಿಂದ ಅಪಹರಿಸಲಾಗಿದೆ ಎಂದು ಹೇಳಲಾಗಿದೆ. ಆದಾಗ್ಯೂ, ಅವರ ಕುಟುಂಬದ ಮನವಿ ಕಾರಣದಿಂದಾಗಿ ಮೂರನೇ ಒತ್ತೆಯಾಳ ಹೆಸರನ್ನು ಹಗರಿ ಉಲ್ಲೇಖಿಸಿಲ್ಲ ಎಂದು ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ.
ಇದನ್ನೂ ಓದಿ: ಹೀಗೆಯೇ ಮುಂದುವರೆದರೆ ಜಾಗತಿಕ ಬೆಂಬಲ ಕಳೆದುಕೊಳ್ಳುತ್ತೀರಿ': ಇಸ್ರೇಲ್ ಗೆ ಜೋ ಬೈಡನ್ ಎಚ್ಚರಿಕೆ
ಮೂವರು ಒತ್ತೆಯಾಳುಗಳು ಹಮಾಸ್ ಸೆರೆಯಿಂದ ಹೇಗೆ ತಪ್ಪಿಸಿಕೊಳ್ಳಲು ಸಾಧ್ಯವಾಯಿತು ಎಂಬ ಪ್ರಶ್ನೆಗೆ ಉತ್ತರಿಸಿದ ಹಗರಿ, ಮೂವರು ಓಡಿಹೋಗಿದ್ದಾರೆ ಅಥವಾ ಅವರನ್ನು ಸೆರೆಯಲ್ಲಿಟ್ಟಿದ್ದ ಭಯೋತ್ಪಾದಕರು ಬಿಟ್ಟಿದ್ದಾರೆ ಎಂದು ಮಿಲಿಟರಿ ನಂಬಿದೆ ಎಂದು ಅವರು ತಿಳಿಸಿದರು.
ಗುಂಡು ಹಾರಿಸಿದ ನಂತರ, ಸ್ಕ್ಯಾನ್ ಮತ್ತು ಪರೀಕ್ಷೆಯ ಸಮಯದಲ್ಲಿ, ಸತ್ತವರ ಗುರುತಿನ ಬಗ್ಗೆ ತಕ್ಷಣದ ಅನುಮಾನವು ಹುಟ್ಟಿಕೊಂಡಿತು ಮತ್ತು ಅವರ ದೇಹಗಳನ್ನು ಇಸ್ರೇಲ್‌ಗೆ ತ್ವರಿತವಾಗಿ ಪರೀಕ್ಷೆಗೆ ವರ್ಗಾಯಿಸಲಾಯಿತು, ಅಲ್ಲಿ ಒತ್ತೆಯಾಳುಗಳೆಂದು ಗುರುತಿಸಲಾಯಿತು ಎಂದು ಐಡಿಎಫ್ ವಕ್ತಾರರು ತಿಳಿಸಿದ್ದಾರೆ.