ಟೆಲ್ ಅವೀವ್: ಇಸ್ರೇಲ್ ಸೇನೆ ಗಾಜಾಪಟ್ಟಿಯಲ್ಲಿ ನಡೆಸುತ್ತಿರುವ ಮಿಲಿಟರಿ ದಾಳಿಯಲ್ಲಿ ಹಮಾಸ್ ಉಗ್ರ ಸಂಘಟನೆಯ ಸುರಂಗಜಾಲ ನಾಶಕ್ಕೆ ಇಸ್ರೇಲ್ ಸೇನೆ ಸ್ಫೋಟಕ ಸಾಧನಗಳನ್ನು ಬಳಕೆ ಮಾಡುತ್ತಿದೆ ಎಂದು ಹೇಳಲಾಗಿದೆ.

ಗಾಜಾ ಪಟ್ಟಿಯಲ್ಲಿರುವ ಇಸ್ರೇಲ್‌ನ ಸೇನಾಪಡೆಗಳು ನೆಲದಡಿಯಲ್ಲಿರುವ ಹಮಾಸ್ ಉಗ್ರಗಾಮಿಗಳ ವಿಶಾಲವಾದ ಸುರಂಗ ಜಾಲವನ್ನು ನಿಷ್ಕ್ರಿಯಗೊಳಿಸುವ ಗುರಿಯನ್ನು ಹೊಂದಿವೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ರಾತ್ರಿಯ ದಾಳಿಗಳಲ್ಲಿ ಅವರು "ಭೂಗತ ಮತ್ತು ಭೂಗತ ಮೂಲಸೌಕರ್ಯಗಳಿಗೆ" ಗಮನಾರ್ಹ ಹಾನಿಯನ್ನುಂಟುಮಾಡಿದ್ದಾರೆ. ಇದು ಇಸ್ರೇಲ್ ಮತ್ತು ಹಮಾಸ್ ನಡುವಿನ ಯುದ್ಧದ ಪ್ರಮುಖ ಹಂತವಾಗಿದೆ ಎಂದು ಅದು ಸೋಮವಾರ ವರದಿ ಮಾಡಿದೆ.

ಇದನ್ನೂ ಓದಿ: ಇಸ್ರೇಲ್ ವೈಮಾನಿಕ ದಾಳಿ ವೇಳೆ ಹಮಾಸ್ ಉಗ್ರ ಸಂಘಟನೆಯ ಶಸ್ತ್ರಾಸ್ತ್ರ ಸಂಶೋಧನಾ ತಜ್ಞ ಸಾವು!

ಇಸ್ರೇಲಿ ಸೇನಾಪಡೆಗಳು ಒಂದು ವಾರದಿಂದ ಗಾಜಾದೊಳಗೆ ಆಳವಾಗಿ ಪ್ಯಾಲೇಸ್ಟಿನಿಯನ್ ಉಗ್ರಗಾಮಿಗಳೊಂದಿಗೆ ಹೋರಾಡುತ್ತಿವೆ. ಈಗಾಗಲೇ ಯುದ್ಧ ಪೀಡಿತ ಗಾಜಾ ಪ್ರದೇಶವನ್ನು ಅರ್ಧದಷ್ಟು ಕತ್ತರಿಸಿ ಇಡೀ ನಗರವನ್ನು ಇಸ್ರೇಲ್ ಸೇನೆ ಸುತ್ತುವರೆದಿವೆ. ಗಾಜಾದ ಕೆಳಗೆ ನೂರಾರು ಕಿಲೋಮೀಟರ್‌ಗಳಷ್ಟು (ಮೈಲಿ) ವ್ಯಾಪಿಸಿರುವ ಹಮಾಸ್ ಉಗ್ರ ಸಂಘಟನೆ ನಿರ್ಮಿಸಿದ ಸುರಂಗ ಜಾಲವನ್ನು ನಾಶಪಡಿಸಲು ಇಸ್ರೇಲ್‌ನ ಯುದ್ಧ ಎಂಜಿನಿಯರಿಂಗ್ ಕಾರ್ಪ್ಸ್ ಸ್ಫೋಟಕ ಸಾಧನಗಳನ್ನು ಬಳಸುತ್ತಿದೆ ಎಂದು ಮುಖ್ಯ ಇಸ್ರೇಲಿ ಮಿಲಿಟರಿ ವಕ್ತಾರ ರಿಯರ್ ಅಡ್ಮಿರಲ್ ಡೇನಿಯಲ್ ಹಗರಿ ಹೇಳಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.

ಗಾಜಾ ನಗರದ ಭೂಮಿಯ ಆಳದಲ್ಲಿ ನೆಲದ ಕಾರ್ಯಾಚರಣೆಯಲ್ಲಿ ತೊಡಗಿರುವ ಇಸ್ರೇಲ್ ಸೇನೆ ಹಮಾಸ್ ಉಗ್ರ ಸಂಘಟನೆ ಮೇಲೆ ಹೆಚ್ಚಿನ ಒತ್ತಡವನ್ನು ಹಾಕುತ್ತಿವೆ. ಹಮಾಸ್‌ನ ಅನೇಕ ಸುರಂಗಗಳು, ಕಮಾಂಡ್ ಸೆಂಟರ್‌ಗಳು ಮತ್ತು ರಾಕೆಟ್ ಲಾಂಚರ್‌ಗಳು ಉತ್ತರ ಗಾಜಾದಲ್ಲಿ ಶಾಲೆಗಳು, ಆಸ್ಪತ್ರೆಗಳು ಮತ್ತು ಮಾನವೀಯ ಸಂಸ್ಥೆಗಳಿಗೆ ಸಮೀಪದಲ್ಲಿ ಅಂದರೆ ಆ ಕಟ್ಟಡಗಳ ಕೆಳಗೆ ಸುರಂಗ ಮಾರ್ಗದಲ್ಲಿವೆ ಎಂದು ಇಸ್ರೇಲಿ ಮಿಲಿಟರಿ ಹೇಳಿದೆ. ಅಂತೆಯೇ ಹಾಲಿ ಇಸ್ರೇಲ್ ಸೇನಾಪಡೆಗಳ ಕಾರ್ಯಾಚರಣೆಯಿಂದಾಗಿ ಸುರಂಗಗಳಲ್ಲಿ ಹಮಾಸ್ ಉಗ್ರ ಸಂಘಟನೆ ಹಿಡಿದಿಟ್ಟುಕೊಂಡಿರುವ ಒತ್ತೆಯಾಳುಗಳಿಗೆ ಹಾನಿಯಾಗಬಹುದು ಎಂಬ ಭಯವೂ ಇದೆ.ಅದಾಗ್ಯೂ ಇಸ್ರೇಲ್ ಸೇನೆ ತನ್ನ ಕಾರ್ಯಾಚರಣೆ ಮುಂದುವರೆಸಿದೆ. 

ಇದನ್ನೂ ಓದಿ: ಗಾಜಾ ಹಿಂಸಾಚಾರವನ್ನು ಅಮೆರಿಕಾ ಬೆಂಬಲಿಸುತ್ತಿದೆ: ಶ್ವೇತಭವನದ ದೀಪಾವಳಿ ಆಚರಣೆ ಆಹ್ವಾನ ನಿರಾಕರಿಸಿದ ರೂಪಿ ಕೌರ್!

ಇಸ್ರೇಲ್ ರಕ್ಷಣಾ ಸಚಿವ ಯೋವ್ ಗ್ಯಾಲಂಟ್ ಅವರು ಇತ್ತೀಚೆಗೆ ನೀಡಿದ್ದ ಹೇಳಿಕೆಯಲ್ಲಿ ಇಸ್ರೇಲ್ ಗುರಿ ಸ್ಪಷ್ಟವಾಗಿದ್ದು, ಅದು ಹಮಾಸ್ ನ ಬೇರು ಸಹಿತ ನಾಶ.. ಗಾಜಾದಲ್ಲಿ ಹಮಾಸ್ ಭಯೋತ್ಪಾದಕರು, ಅವರ ಮೂಲಸೌಕರ್ಯ, ಅವರ ಕಮಾಂಡರ್‌ಗಳು, ಬಂಕರ್‌ಗಳು, ಸಂವಹನ ಕೊಠಡಿಗಳು. ಹಮಾಸ್ ಅನ್ನು ನಾಶಮಾಡುವುದೇ ಇಸ್ರೇಲ್ ಗುರಿ ಎಂದು ಹೇಳಿದ್ದರು. ಅಲ್ಲದೆ ಇಸ್ರೇಲ್ ನಿರ್ಣಯವನ್ನು ಒತ್ತಿ ಹೇಳಿದ ಅವರು, ಗಾಜಾಪಟ್ಟಿ ಜಗತ್ತಿನ ಅತೀ ದೊಡ್ಡ ಭಯೋತ್ಪಾದಕ ಸಂಕೀರ್ಣ ಎಂದು ಬಣ್ಣಿಸಿದರು. ಪ್ರಸ್ತುತ "ನಾವು ಗಾಜಾ ನಗರದ ಹೃದಯ ಭಾಗದಲ್ಲಿದ್ದೇವೆ. ಹಮಾಸ್ ವಶಪಡಿಸಿಕೊಂಡ 240ಕ್ಕೂ ಹೆಚ್ಚು ಒತ್ತೆಯಾಳುಗಳನ್ನು ಬಿಡುಗಡೆ ಮಾಡುವವರೆಗೆ ಯಾವುದೇ ವಿರಾಮವಿಲ್ಲ ಎಂದು ಹೇಳಿದ್ದಾರೆ.