ಟೆಲ್ ಅವೀವ್: ಇಸ್ರೇಲ್ ಸೇನೆ ಇರಾನ್ ಮೇಲೆ ದಾಳಿ ಮಾಡಿರದೇ ಹೋಗಿದ್ದರೆ ಇಷ್ಟು ಹೊತ್ತಿಗೆ ಅದು ಅಣ್ವಸ್ತ್ರ ರಾಷ್ಟ್ರವಾಗಿರುತ್ತಿತ್ತು ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ಹೇಳಿದ್ದಾರೆ.

ಈ ಕುರಿತು ವಿಡಿಯೋ ಹೇಳಿಕೆಯಲ್ಲಿ ಮಾತನಾಡಿರುವ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು, 'ಇರಾನ್ "ಪರಮಾಣು ಶಸ್ತ್ರಾಸ್ತ್ರವನ್ನು ಸಾಧಿಸಲು ಬಹಳ ಹತ್ತಿರದಲ್ಲಿದೆ" ಮತ್ತು ಸಾವಿರಾರು ಕ್ಷಿಪಣಿಗಳನ್ನು ಉತ್ಪಾದಿಸುವ ಸಾಮರ್ಥ್ಯವನ್ನು ಪಡೆಯುತ್ತಿದ್ದ ಕಾರಣ ಫೆಬ್ರವರಿಯಲ್ಲಿ ಇಸ್ರೇಲ್ ಜೊತೆ ಯುದ್ಧ ಮಾಡಲು ನಿರ್ಧರಿಸಿತು ಎಂದು ಹೇಳಿದ್ದಾರೆ.

ಅಂತೆಯೇ ಕಳೆದ ವರ್ಷದಲ್ಲಿ ಇಸ್ರೇಲ್ ಎರಡು ಬಾರಿ ಇರಾನ್ ಮೇಲೆ ದಾಳಿ ಮಾಡಿರದಿದ್ದರೆ, ಇಸ್ಲಾಮಿಕ್ ಗಣರಾಜ್ಯವು "ಈಗಾಗಲೇ ಪರಮಾಣು ಶಸ್ತ್ರಾಸ್ತ್ರವನ್ನು ಹೊಂದಿರುತ್ತಿತ್ತು". ಕಳೆದ ವರ್ಷ ಇರಾನ್ ತನ್ನ ಪುಷ್ಟೀಕರಿಸಿದ ಯುರೇನಿಯಂ ಅನ್ನು ಪರಮಾಣು ಶಸ್ತ್ರಾಸ್ತ್ರವನ್ನಾಗಿ ಪರಿವರ್ತಿಸಲು ಇರಾನ್ ತಯಾರಿ ನಡೆಸುತ್ತಿದೆ ಎಂದು ಇಸ್ರೇಲ್‌ಗೆ ಗುಪ್ತಚರ ಮಾಹಿತಿ ಇತ್ತು. ನಾವು ಆ ಗುಪ್ತಚರ ಮಾಹಿತಿಯನ್ನು ಸ್ವೀಕರಿಸಿದ ಕ್ಷಣ, ಕಾರ್ಯಾಚರಣೆಗೆ ಇಳಿದಿದ್ದೇವೆ" ಎಂದು ನೇತನ್ಯಾಹು ಹೇಳಿದರು.

ಕೆಲವೇ ತಿಂಗಳುಗಳ ನಂತರ, ಇರಾನ್ ತನ್ನ ಕ್ಷಿಪಣಿ ಮತ್ತು ಪರಮಾಣು ಯೋಜನೆಗಳನ್ನು ವಿಸ್ತರಿಸಲು ಮತ್ತು ಅವುಗಳನ್ನು ಭೂಗತ ಆಳದಲ್ಲಿ ಹೂಳಲು ಬಯಸುತ್ತಿದೆ ಎಂಬ ಹೊಸ ಗುಪ್ತಚರ ಮಾಹಿತಿ ಸಿಕ್ಕಿತು ಎಂದು ನೆತನ್ಯಾಹು ಹೇಳಿದರು.

ಆಪರೇಷನ್ ರೋರಿಂಗ್ ಲಯನ್‌

ಇದೇ ವರದಿಯನ್ನು ಆಧರಿಸಿ ಇಸ್ರೇಲ್ ಸೇನೆ ಆಪರೇಷನ್ ರೋರಿಂಗ್ ಲಯನ್‌ ಆರಂಭಿಸಿತ್ತು. ಆಪರೇಷನ್ ರೋರಿಂಗ್ ಲಯನ್‌ನಲ್ಲಿ ಇಸ್ರೇಲ್ "ಬೃಹತ್ ಸಾಧನೆಗಳನ್ನು" ಮಾಡಿದೆ. ಅಲ್ಲಿ ಶಸ್ತ್ರಾಸ್ತ್ರೀಕರಣವನ್ನು ನಿರ್ವಹಿಸುತ್ತಿದ್ದ ಎಂಟು ಪರಮಾಣು ವಿಜ್ಞಾನಿಗಳನ್ನು ಇಸ್ರೇಲ್ ಕೊಂದಿತು. ಇಸ್ರೇಲ್ ಅರಾಕ್‌ನಲ್ಲಿರುವ ಭಾರೀ ನೀರಿನ ರಿಯಾಕ್ಟರ್ ಮತ್ತು ಇರಾನ್‌ನ ಕೇಂದ್ರಾಪಗಾಮಿ ಉತ್ಪಾದನೆ ಮತ್ತು ಯುರೇನಿಯಂ ಮಾರ್ಗಗಳನ್ನು ಸಹ ನಾಶಪಡಿಸಿತು ಎಂದು ನೇತನ್ಯಾಹು ಮಾಹಿತಿ ನೀಡಿದರು.

"ನಾವು ಅದರ ಪರಮಾಣು ಕಾರ್ಯಕ್ರಮವನ್ನು, ಅದರ ಕ್ಷಿಪಣಿ ಕಾರ್ಯಕ್ರಮವನ್ನು ನಾಶಪಡಿಸುವಲ್ಲಿ ಯಶಸ್ವಿಯಾಗಿದ್ದೇವೆ. ತನ್ನ ಪರಮಾಣು ಮತ್ತು ಕ್ಷಿಪಣಿ ಕಾರ್ಯಕ್ರಮಗಳನ್ನು "ಒಡೆದುಹಾಕುವುದರ" ಹೊರತಾಗಿ, ಇಸ್ರೇಲ್ "ಇರಾನ್ ಆಡಳಿತವನ್ನು ಒಡೆದುಹಾಕಲು" ಬಯಸಿದೆ. 1979 ರ ಇಸ್ಲಾಮಿಕ್ ಕ್ರಾಂತಿಯ ನಂತರ ಇರಾನ್ ಅನ್ನು "ಅದರ ಅತ್ಯಂತ ದುರ್ಬಲ ಹಂತಕ್ಕೆ" ತರಲು' ಇಸ್ರೇಲ್ ಬಯಸಿದೆ ಎಂದು ನೆತನ್ಯಾಹು ಹೇಳಿದರು.

ಇರಾನ್ "ಕದನ ವಿರಾಮಕ್ಕಾಗಿ ಬೇಡಿಕೊಳ್ಳುತ್ತಿದೆ, ನಾಯಕತ್ವದ ನಡುವೆ ಆಂತರಿಕ ವಿವಾದಗಳಿವೆ. ನಾಗರಿಕರ ಬೇಡಿಕೆಗಳನ್ನು ಪೂರೈಸುವಲ್ಲಿ ಅವರ ಹೆಚ್ಚುತ್ತಿರುವ ಕಷ್ಟವನ್ನು ನಾವು ನೋಡುತ್ತೇವೆ" ಎಂದು ನೇತನ್ಯಾಹು ಹೇಳಿದರು.