ವಾಷಿಂಗ್ ಟನ್: ಅಮೆರಿಕ- ಇರಾನ್ ಯುದ್ಧದ ನಡುವೆ ಆಗಾಗ್ಗೆ ಡೊನಾಲ್ಡ್ ಟ್ರಂಪ್ ತಮಾಷೆಯ ವಿಷಯಗಳಿಗೆ ಸುದ್ದಿಯಾಗುತ್ತಿರುತ್ತಾರೆ.

ವಿದೇಶಿ ನಾಯಕರನ್ನು ಟೀಕಿಸಿ, ಇರಾನ್ ನ್ನು ಟೀಕಿಸಿ ಸುದ್ದಿಯಾಗುತ್ತಿದ್ದ ಟ್ರಂಪ್, ಈ ಬಾರಿ ತಮ್ಮ ಮನ್ನಣೆಯ ದಾಹಕ್ಕೆ ಸುದ್ದಿಯಾಗುತ್ತಿದ್ದಾರೆ. ಆಗಿದ್ದಿಷ್ಟು. ಎಲ್ಲಾ ರಾಜಕಾರಣಿಗಳಂತೆಯೆ ಟ್ರಂಪ್ ಕೂಡಾ ತಮ್ಮ ಹೆಸರಿನಲ್ಲಿ ಗುರುತಿಸಬಹುದಾದ ಪ್ರಸಿದ್ಧ ಸ್ಥಳಗಳಿರಬೇಕು ಎಂದು ಬಯಸುತ್ತಿದ್ದಾರೆ. ಇದಕ್ಕೆ ಅವರು Strait of Hormuz ನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಸಂದೇಶ ಹಂಚಿಕೊಂಡಿರುವ ಡೊನಾಲ್ಡ್ ಟ್ರಂಪ್, Strait of Hormuz ನ್ನು "Trump Strait" ಎಂದು ಮರುನಾಮಕರಣ ಮಾಡಬಹುದೆಂದು ಹೇಳಿದ್ದಾರೆ. ಇದಕ್ಕಾಗಿ ಅವರು ಕೊಟ್ಟಿರುವ ಕಾರಣವೂ ವಿಚಿತ್ರವಾಗಿಯೇ ಇದೆ. ಟ್ರಂಪ್ ಪ್ರಕಾರ ಒಂದು ಸಮಸ್ಯೆಯನ್ನು ಬಗೆಹರಿಸಲು ಸಾಧ್ಯವಾಗದೇ ಇದ್ದಲ್ಲಿ, ಕನಿಷ್ಠ ಅದನ್ನು ಮರುನಾಮಕರಣವನ್ನಾದ್ರೂ ಮಾಡ್ಬೇಕು ಎಂಬುದು ಅಮೆರಿಕ ಅಧ್ಯಕ್ಷರ ತರ್ಕವಾಗಿದೆ.

ಟ್ರಂಪ್ ಮರುನಾಮಕರಣದ ಗೀಳು ಹೊಸದೇನು ಅಲ್ಲ. 2025 ರ ಜನವರಿಯಲ್ಲಿ ಗಲ್ಫ್ ಆಫ್ ಮೆಕ್ಸಿಕೋ ಎಂಬ ಪ್ರದೇಶವನ್ನು ಗಲ್ಫ್ ಆಫ್ ಅಮೆರಿಕ ಎಂದು ಮರುನಾಮಕರಣ ಮಾಡಿ ಟ್ರಂಪ್ ಆದೇಶ ಪ್ರಕಟಿಸಿದ್ದರು. ಇಷ್ಟೇ ಅಲ್ಲದೆ. ಕೆನಡಾದವರು ನಮ್ಮನ್ನು ಸರಿಯಾಗಿ ನಡೆಸಿಕೊಳ್ತಿಲ್ಲ ಎಂದು ಮುನಿಸಿಕೊಂಡು ಲೇಕ್ ಒಂಟಾರಿಯೊವನ್ನು ಲೇಕ್ ಅಮೆರಿಕ ಎಂದು ಮರುನಾಮಕರಣ ಮಾಡಿದ್ದರು. ವಿಚಿತ್ರವೆಂಬಂತೆ ಅಮೆರಿಕ ಅಧ್ಯಕ್ಷರ ತಾಳಕ್ಕೆ ಕುಣಿದಿದ್ದ ಟೆಕ್ ಕಂಪನಿಗಳಾದ ಗೂಗಲ್ ಹಾಗೂ ಆಪಲ್ ಸಂಸ್ಥೆಗಳೂ ತಮ್ಮ ಮ್ಯಾಪ್ ಗಳಲ್ಲಿ ಹೆಸರು ಮರುನಾಮಕರಣ ಮಾಡಿದ್ದವು. ಇದಕ್ಕೆ ಸಾರ್ವಜನಿಕವಾಗಿ ವ್ಯಾಪಕ ಟೀಕೆ ವ್ಯಕ್ತವಾಗಿತ್ತು.