ನಟಿ ನೀನಾ ಗುಪ್ತಾ ಅವರು 66 ನೇ ವಯಸ್ಸಿನಲ್ಲಿ ಗರ್ಭಿಣಿಯಾಗಿದ್ದಾರೆ ಎಂಬ ವದಂತಿಗಳು ಇತ್ತೀಚೆಗೆ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹರಡಿತು. ಇದೀಗ ಹಿರಿಯ ನಟಿ ಹಾಸ್ಯಮಯ ಮತ್ತು ಸ್ಪಷ್ಟತೆಯೊಂದಿಗೆ ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ.
ಬಾಲಿವುಡ್ ಹಂಗಾಮಾದೊಂದಿಗೆ ಮಾತನಾಡಿದ ಅವರು, 'ನಿಜ ಜೀವನದಲ್ಲಿಯೂ ಬದಾಯಿ ಹೋ ಆಗಬೇಕಿತ್ತು' ಎಂದು ಹೇಳಿದ್ದಾರೆ. ವಯಸ್ಸಾದ ಮಹಿಳೆ ಅನಿರೀಕ್ಷಿತವಾಗಿ ಗರ್ಭಿಣಿಯಾಗುವ ಬಾಲಿವುಡ್ ಚಿತ್ರ 'ಬದಾಯಿ ಹೋ' ಅನ್ನು ಉಲ್ಲೇಖಿಸಿದ್ದಾರೆ. ಈ ಚಿತ್ರದಲ್ಲಿ ನೀನಾ ಗುಪ್ತಾ ಅವರೇ ನಟಿಸಿದ್ದಾರೆ.
'ದೇರ್ ಈಸ್ ನೋ ಬದಾಯಿ ಹೋ. ನಾನು ಗರ್ಭಿಣಿಯಲ್ಲ. ಸೀರೆ ಮೆಟೀರಿಯಲ್ ದಪ್ಪವಾಗಿದ್ದು, ಸಮಾರಂಭದಲ್ಲಿ ನನ್ನನ್ನು ದೊಡ್ಡದಾಗಿ ಕಾಣುವಂತೆ ಮಾಡಿದೆ' ಎಂದಿದ್ದಾರೆ.
ಆನ್ಲೈನ್ನಲ್ಲಿನ ಊಹಾಪೋಹದ ಬಗ್ಗೆ ತಮಾಷೆ ಮಾಡಿದ ನಟಿ, 'ಆದರೆ ನಾನು ಹೇಳಲೇಬೇಕು, ಈ ವಯಸ್ಸಿನಲ್ಲಿ ನನ್ನ ಗರ್ಭಧಾರಣೆ ಬಗ್ಗೆ ಈ ಎಲ್ಲ ಊಹಾಪೋಹಗಳನ್ನು ನಾನು ಪ್ರೀತಿಸುತ್ತೇನೆ. ಇದು ನಾವು ರಾಷ್ಟ್ರವಾಗಿ ವಿಕಸನಗೊಳ್ಳುತ್ತಿರುವುದನ್ನು ತೋರಿಸುತ್ತದೆ' ಎಂದು ಅವರು ಹೇಳಿದರು.
ಹೈದರಾಬಾದ್ನಲ್ಲಿ ನಟ ವಿಜಯ್ ದೇವರಕೊಂಡ ಮತ್ತು ನಟಿ ರಶ್ಮಿಕಾ ಮಂದಣ್ಣ ಅವರ ವಿವಾಹದ ಆರತಕ್ಷತೆಯಲ್ಲಿ ನೀನಾ ಗುಪ್ತಾ ಭಾಗವಹಿಸಿದ ನಂತರ ಈ ಕುರಿತಾದ ಊಹಾಪೋಹಗಳು ಪ್ರಾರಂಭವಾದವು.
ನೀನಾ ಗುಪ್ತಾ ಅವರ ಫೋಟೊಗಳು ಮತ್ತು ವಿಡಿಯೋಗಳು ಆನ್ಲೈನ್ನಲ್ಲಿ ವ್ಯಾಪಕವಾಗಿ ಪ್ರಸಾರವಾಗಿವೆ. ಹೈದರಾಬಾದ್ನಲ್ಲಿನ ಆರತಕ್ಷತೆಯಲ್ಲಿ ಗುಪ್ತಾ ಕಾಣಿಸಿಕೊಂಡ ಸ್ವಲ್ಪ ಸಮಯದ ನಂತರವೇ ಈ ವದಂತಿಗಳು ಹೊರಹೊಮ್ಮಿದವು. ನೆಟಿಜನ್ಗಳ ಒಂದು ವಿಭಾಗವು ಅವರು ಗರ್ಭಿಣಿಯಾಗಿರಬಹುದು ಎಂದು ಊಹಿಸಿತು.
ನೀನಾ ಗುಪ್ತಾ ತನ್ನ ವೈಯಕ್ತಿಕ ಜೀವನದ ಬಗ್ಗೆ ಪ್ರಾಮಾಣಿಕವಾಗಿರುವುದಕ್ಕೆ ಬಹಳ ಹಿಂದಿನಿಂದಲೂ ಹೆಸರುವಾಸಿಯಾಗಿದ್ದಾರೆ. 1980ರ ದಶಕದಲ್ಲಿ ಅವರು ವೆಸ್ಟ್ ಇಂಡೀಸ್ ಮಾಜಿ ಕ್ರಿಕೆಟಿಗ ವಿವ್ ರಿಚರ್ಡ್ಸ್ ಅವರೊಂದಿಗೆ ಸಂಬಂಧ ಹೊಂದಿದ್ದರು. ಇವರಿಬ್ಬರಿಗೆ ಓರ್ವ ಮಗಳಿದ್ದಳು. ಫ್ಯಾಷನ್ ಡಿಸೈನರ್ ಮಸಾಬಾ ಗುಪ್ತಾ ಅವರನ್ನು ನೀನಾ ಗುಪ್ತಾ ಅವರೇ ಬೆಳೆಸಿದರು. ಈ ನಿರ್ಧಾರವು ಆ ಸಮಯದಲ್ಲಿ ವ್ಯಾಪಕ ಸಾರ್ವಜನಿಕ ಚರ್ಚೆಗೆ ಗ್ರಾಸವಾಗಿತ್ತು.
ಇದಾದ ವರ್ಷಗಳ ನಂತರ, ನೀನಾ ಗುಪ್ತಾ 2008ರಲ್ಲಿ ದೆಹಲಿ ಮೂಲದ ಚಾರ್ಟರ್ಡ್ ಅಕೌಂಟೆಂಟ್ ವಿವೇಕ್ ಮೆಹ್ರಾ ಅವರನ್ನು ವಿವಾಹವಾದರು.
Advertisement
