ಗಾಯಕ ಮಿಕಾ ಸಿಂಗ್ ಅವರು ಪಾಕಿಸ್ತಾನದೊಂದಿಗಿನ ತಮ್ಮ ನಂಟು ಮತ್ತು 2019ರಲ್ಲಿ ಅಲ್ಲಿಗೆ ಭೇಟಿ ನೀಡಿದಾಗ ಭೇಟಿಯಾದ ಜನರ ಕುರಿತು ಮಾತನಾಡಿದ್ದಾರೆ. ಪಾಕಿಸ್ತಾನದಲ್ಲಿ ಮುಸ್ಲಿಮರು ಗುರುದ್ವಾರಗಳ ನಿರ್ವಹಣೆಯಲ್ಲಿ ಹೇಗೆ ಸಹಾಯ ಮಾಡುತ್ತಿದ್ದರು ಎಂಬುದನ್ನು ಸ್ಮರಿಸುವಾಗ, ದುಬೈನಲ್ಲಿರುವ ಮುಸ್ಲಿಮರಿಗೆ ಹೋಲಿಸಿದರೆ ಜನರು ಪಾಕಿಸ್ತಾನಿ ಮುಸ್ಲಿಮರನ್ನು ಹೇಗೆ ನೋಡುತ್ತಾರೆ ಎಂಬುದರ ಕುರಿತು ಗಮನಾರ್ಹ ಅಭಿಪ್ರಾಯವೊಂದನ್ನು ವ್ಯಕ್ತಪಡಿಸಿದ್ದಾರೆ.
'ಬಾತೇನ್ ದಿಲ್ ಸೇ ವಿತ್ ನವಿಕಾ ಕುಮಾರ್' (Baatein Dil Se With Navika Kumar) ಪಾಡ್‌ಕಾಸ್ಟ್‌ನಲ್ಲಿ ಮಾತನಾಡಿದ 50 ವರ್ಷದ ಗಾಯಕ, ದುಬೈನಲ್ಲಿರುವ ಮುಸ್ಲಿಮರು ತೊಂದರೆ ನೀಡದಿದ್ದರೂ ಪಾಕಿಸ್ತಾನಿ ಮುಸ್ಲಿಮರು ಏಕೆ ಹಾಗೆ ಮಾಡುತ್ತಾರೆ ಎಂಬುದು ತಮಗೆ ಅರ್ಥವಾಗುತ್ತಿಲ್ಲ. ಅಲ್ಲದೆ, ಪಾಕಿಸ್ತಾನಕ್ಕೆ ಭೇಟಿ ನೀಡಿದಾಗ ತಮಗೆ ಸಿಕ್ಕ ಆತ್ಮೀಯತೆಯನ್ನು ನೆನಪಿಸಿಕೊಂಡ ಅವರು, ಪಾಕಿಸ್ತಾನ ಮತ್ತು ಅಲ್ಲಿನ ಜನರು ಮೂಲಭೂತವಾಗಿ ಕೆಟ್ಟವರಲ್ಲ ಎಂದೂ ತಿಳಿಸಿದರು.
ಪಾಕಿಸ್ತಾನದಲ್ಲಿರುವ ಸಿಖ್ ಧಾರ್ಮಿಕ ಸ್ಥಳಗಳಲ್ಲಿ ಸ್ಥಳೀಯ ಮುಸ್ಲಿಮರಿಂದ ತಮಗೆ ದೊರೆತ ಬೆಂಬಲದ ಬಗ್ಗೆಯೂ ಮಾತನಾಡಿದ ಅವರು, 'ನಾನು ಪಾಕಿಸ್ತಾನಕ್ಕೆ ಹೋದಾಗ, ನಮ್ಮ ಸಹೋದರರಂತಿರುವ ಅನೇಕ ಮುಸ್ಲಿಮರು ಗುರುದ್ವಾರಗಳಲ್ಲಿ ಸೇವೆ ಸಲ್ಲಿಸಿದರು ಮತ್ತು ಸ್ವಚ್ಛತಾ ಕಾರ್ಯಗಳಲ್ಲಿ ಸಹಾಯ ಮಾಡಿದರು' ಎಂದರು.
'ಪಾಕಿಸ್ತಾನ ಕೆಟ್ಟದ್ದಲ್ಲ. ಪಾಕಿಸ್ತಾನದ ಜನರು ಕೂಡ ಅಷ್ಟೇನೂ ಕೆಟ್ಟವರಲ್ಲ. ಕಾರಣವೇನೆಂದು ನನಗೆ ಗೊತ್ತಿಲ್ಲ, ಆದರೆ ಏನೋ ಒಂದು ಕಾರಣಕ್ಕೆ ನಮಗೆ ಪಾಕಿಸ್ತಾನದ ಮುಸ್ಲಿಮರೆಂದರೆ ಇಷ್ಟವಿಲ್ಲದಂತಿದೆ. ಆದರೆ ದುಬೈನ ಮುಸ್ಲಿಮರೆಂದರೆ ನಮಗೆ ತುಂಬಾ ಇಷ್ಟ. ಇದು ನನಗೆ ಎಂದಿಗೂ ಅರ್ಥವಾಗಿಲ್ಲ' ಎಂದು ಅವರು ಹೇಳಿದರು.
ಈ ಸಂದರ್ಶನದಲ್ಲಿ, ಪಾಕಿಸ್ತಾನದ ಕುರಿತಾದ ಅವರ ಅಭಿಪ್ರಾಯಗಳ ಬಗ್ಗೆ, ವಿಶೇಷವಾಗಿ ದಿಲ್ಜಿತ್ ದೋಸಾಂಜ್ ಮತ್ತು ಪಾಕಿಸ್ತಾನಿ ಕಲಾವಿದರೊಂದಿಗೆ ಅವರ ಕೆಲಸದ ಕುರಿತಾದ ಚರ್ಚೆಯ ನಂತರ ಪ್ರಶ್ನಿಸಲಾಯಿತು. ಪಾಕಿಸ್ತಾನಿ ಗಾಯಕರು ಭಾರತದಲ್ಲಿ ಪ್ರದರ್ಶನ ನೀಡುವುದರಲ್ಲಿ ತಮಗೆ ಯಾವುದೇ ತೊಂದರೆಯಿಲ್ಲ. ಅಲ್ಲದೆ, ಪ್ರದರ್ಶನ ನೀಡಲು ಪಾಕಿಸ್ತಾನಕ್ಕೆ ತೆರಳುವ ಕಲಾವಿದರನ್ನು ಟೀಕಿಸುವುದು ಸರಿಯಲ್ಲ ಎಂದು ವಾದಿಸಿದರು.
'ಪಾಕಿಸ್ತಾನಿ ಗಾಯಕರ ಬಗ್ಗೆ ನನಗೆ ಯಾವುದೇ ತೊಂದರೆಯಿಲ್ಲ. ಅವರು ಇಲ್ಲಿಗೆ ಬಂದಾಗ ಎಲ್ಲರೂ ಅವರಿಗಾಗಿ ಎದ್ದು ನಿಲ್ಲುತ್ತಾರೆ. ಬಾಲಿವುಡ್ ಪ್ರತಿಯೊಬ್ಬ ಪಾಕಿಸ್ತಾನಿ ಗಾಯಕನನ್ನೂ ಸ್ವಾಗತಿಸುತ್ತದೆ' ಎಂದು ಮಿಕಾ ಹೇಳಿದರು.
'ನೀವು ಅಲ್ಲಿಗೆ ಖಾಸಗಿ ಕಾರ್ಯಕ್ರಮವೊಂದಕ್ಕಾಗಿ ಹೋಗಿ, ಪ್ರದರ್ಶನ ನೀಡಿ, ಸಂಭಾವನೆ ಪಡೆದು ಭಾರತಕ್ಕೆ ಮರಳುವುದಾದರೆ ಅದು ಬೇರೆ ವಿಷಯ. ಅಲ್ಲಿಗೆ ಹೋಗುವಾಗ ನೀವು ಏನನ್ನೂ ಮುಚ್ಚಿಡುತ್ತಿರುವುದಿಲ್ಲ. ನೀವು ವಿಮಾನದಲ್ಲಿ ಪ್ರಯಾಣಿಸುತ್ತೀರಿ ಮತ್ತು ಇಡೀ ಜಗತ್ತೇ ಅದನ್ನು ನೋಡಬಲ್ಲದು' ಎಂದು ಅವರು ಹೇಳಿದರು.
ನಂಕಾನಾ ಸಾಹೀಬ್ ಮತ್ತು ಪಂಜಾ ಸಾಹೀಬ್ ಅಲ್ಲಿವೆ. ಪಾಕಿಸ್ತಾನದಲ್ಲಿ ಮೂರು ಅತ್ಯಂತ ಪ್ರಮುಖ ಗುರುದ್ವಾರಗಳಿವೆ. ಅಲ್ಲಿ ಕಾರ್ಯಕ್ರಮ ನೀಡಲು ಆಹ್ವಾನ ಬಂದಾಗ, ತಮಗೆ ಪಾಕಿಸ್ತಾನಕ್ಕೆ ಹೋಗುವಂತೆ 'ಕರೆ' ಬರುತ್ತಿದೆ ಎಂಬ ಭಾವನೆ ಉಂಟಾಯಿತು. 'ನನ್ನ ಪಾಲಿಗೆ ಇದು ಹಣದ ವಿಷಯವಲ್ಲ. ಇದರ ಮೂಲಕ ನಾನು ಗುರುದ್ವಾರವನ್ನು ತಲುಪಬಹುದು ಎಂಬುದೇ ನನ್ನ ಮೊದಲ ಆಲೋಚನೆ' ಎಂದು ಅವರು ಹೇಳಿದರು.
ನಂಕಾನಾ ಸಾಹೀಬ್ ಲಾಹೋರ್‌ನಲ್ಲಿದೆ ಹಾಗೂ ಗುರುದ್ವಾರ ಪಂಜಾ ಸಾಹೀಬ್ ಪಾಕಿಸ್ತಾನದ ಇಸ್ಲಾಮಾಬಾದ್ ಸಮೀಪದಲ್ಲಿದೆ.
ಉರಿ ದಾಳಿಗೂ ಮುನ್ನ ತಾವು ಪಾಕಿಸ್ತಾನಕ್ಕೆ ಪ್ರಯಾಣಿಸಿದ್ದನ್ನು ನೆನಪಿಸಿಕೊಂಡ ಮಿಕಾ, ವೀಸಾ ಪಡೆದ ನಂತರವೇ ತಾವು ಮುಕ್ತವಾಗಿ ಅಲ್ಲಿಗೆ ಹೋಗಿದ್ದಾಗಿ ತಿಳಿಸಿದರು. ಅಲ್ಲಿ ಕಾರ್ಯಕ್ರಮ ನೀಡುವುದನ್ನು ತಕ್ಷಣವೇ ರಾಜಕೀಯ ನಡೆಯಾಗಿ ಪರಿಗಣಿಸಬಾರದು ಎಂದು ಅವರು ಪ್ರತಿಪಾದಿಸಿದರು.
'ಪಾಕಿಸ್ತಾನದವರು ನನಗೆ ಗೌರವ ನೀಡುತ್ತಿದ್ದರೆ, ನಾವು ಅದಕ್ಕೆ ಸಂತೋಷಪಡಬೇಕು. ಕನಿಷ್ಠಪಕ್ಷ ಯಾರಾದರೂ ಅಲ್ಲಿಗೆ ಹೋಗಿ ಪ್ರದರ್ಶನ ನೀಡುತ್ತಿದ್ದಾರಲ್ಲ ಎಂದು ಭಾವಿಸಬೇಕು' ಎಂದು ಮಿಕಾ ಹೇಳಿದರು.
ಪಾಕಿಸ್ತಾನದಲ್ಲಿ ಪ್ರದರ್ಶನ ನೀಡಿದ್ದಕ್ಕಾಗಿ ಮಿಕಾ ಸಿಂಗ್ ಮೇಲೆ ನಿಷೇಧ
2019ರ ಆಗಸ್ಟ್ 8ರಂದು ಪಾಕಿಸ್ತಾನದ ಕರಾಚಿಯಲ್ಲಿ ನಡೆದ ವಿವಾಹಪೂರ್ವ ಕಾರ್ಯಕ್ರಮವೊಂದರಲ್ಲಿ ಪ್ರದರ್ಶನ ನೀಡಿದ ನಂತರ, ಗಾಯಕ ಮಿಕಾ ಸಿಂಗ್ ಭಾರತೀಯ ಚಿತ್ರೋದ್ಯಮದಲ್ಲಿ ನಿಷೇಧವನ್ನು ಎದುರಿಸಬೇಕಾಯಿತು. ವರದಿ ಪ್ರಕಾರ, ಈ ಕಾರ್ಯಕ್ರಮವನ್ನು ಪಾಕಿಸ್ತಾನದ ಮಾಜಿ ಅಧ್ಯಕ್ಷ ಪರ್ವೇಜ್ ಮುಷರಫ್ ಅವರ ನಿಕಟ ಸಂಬಂಧಿಯೊಬ್ಬರು ಆಯೋಜಿಸಿದ್ದರು. ನಂತರ ಆ ಪ್ರದರ್ಶನದ ವಿಡಿಯೋವೊಂದು ಅಂತರ್ಜಾಲದಲ್ಲಿ ಹರಿದಾಡಿ ತೀವ್ರ ಟೀಕೆಗೆ ಕಾರಣವಾಯಿತು; ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಬಂಧವು ಉದ್ವಿಗ್ನವಾಗಿದ್ದ ಆ ಸಮಯದಲ್ಲಿ, ರಾಷ್ಟ್ರೀಯ ಹಿತಾಸಕ್ತಿಗಿಂತ ಹಣಕ್ಕೆ ಹೆಚ್ಚಿನ ಆದ್ಯತೆ ನೀಡಿದ್ದಾರೆ ಎಂದು ಭಾರತೀಯ ಚಲನಚಿತ್ರ ಸಂಘಟನೆಗಳು ಆಕ್ರೋಶ ವ್ಯಕ್ತಪಡಿಸಿದವು.
ನಂತರ, 'ಆಲ್ ಇಂಡಿಯಾ ಸಿನಿ ವರ್ಕರ್ಸ್ ಅಸೋಸಿಯೇಷನ್' (AICWA) ಮತ್ತು 'ಫೆಡರೇಷನ್ ಆಫ್ ವೆಸ್ಟರ್ನ್ ಇಂಡಿಯಾ ಸಿನಿ ಎಂಪ್ಲಾಯೀಸ್' (FWICE) ಮಿಕಾ ಅವರನ್ನು ಚಿತ್ರರಂಗದಲ್ಲಿ ವೃತ್ತಿಪರ ಕೆಲಸ ಮಾಡದಂತೆ ಅವರ ಮೇಲೆ ನಿರ್ಬಂಧ ವಿಧಿಸಿದವು.
'ಆರ್ಟಿಕಲ್ 370'ಕ್ಕೆ ಸಂಬಂಧಿಸಿದ ರಾಜಕೀಯ ಬೆಳವಣಿಗೆಗಳಿಗೂ ಬಹಳ ಮೊದಲೇ ಆ ಕಾರ್ಯಕ್ರಮದ ಒಪ್ಪಂದವನ್ನು ಅಂತಿಮಗೊಳಿಸಲಾಗಿತ್ತು ಮತ್ತು ಆ ಸಮಯದಲ್ಲಿ ಪಾಕಿಸ್ತಾನದಲ್ಲಿ ತಾನಿದ್ದದ್ದು ಕೇವಲ ಕಾಕತಾಳೀಯವಾಗಿತ್ತು ಎಂದು ಅವರು ಸಮರ್ಥಿಸಿಕೊಂಡರು.
2019ರ ಆಗಸ್ಟ್ 21ರಂದು, FWICE (ಫೆಡರೇಶನ್ ಆಫ್ ವೆಸ್ಟರ್ನ್ ಇಂಡಿಯಾ ಸಿನಿ ಎಂಪ್ಲಾಯೀಸ್) ಅಧಿಕಾರಿಗಳು ಭಾಗವಹಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಿಕಾ ಕ್ಷಮೆ ಯಾಚಿಸಿದರು ಹಾಗೂ ಇನ್ನು ಮುಂದೆ ಅಂತಹ ತಪ್ಪು ಮಾಡುವುದಿಲ್ಲ ಎಂದು ಭರವಸೆ ನೀಡಿದರು. ನಂತರ, FWICE ನಿಷೇಧವನ್ನು ಹಿಂಪಡೆಯಿತು ಮತ್ತು ಭಾರತೀಯ ಮನರಂಜನಾ ಉದ್ಯಮದಲ್ಲಿ ತಮ್ಮ ಕೆಲಸವನ್ನು ಮುಂದುವರಿಸಲು ಅವಕಾಶ ನೀಡಿತು.
