ನವದೆಹಲಿ: ನಿತೇಶ್ ತಿವಾರಿ ಅವರ ಮಹತ್ವಾಕಾಂಕ್ಷೆಯ ಪೌರಾಣಿಕ ಮಹಾಕಾವ್ಯ 'ರಾಮಾಯಣ'ವು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಸಜ್ಜಾಗುತ್ತಿದ್ದು, ಈ ಚಿತ್ರದ ಬಗ್ಗೆ ನಿರೀಕ್ಷೆಗಳು ಹೆಚ್ಚುತ್ತಲೇ ಇವೆ. ಚಿತ್ರದಲ್ಲಿ ರಣಬೀರ್ ಕಪೂರ್ ಶ್ರೀರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ ಮತ್ತು ಯಶ್ ರಾವಣನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ನವೆಂಬರ್ 5 ರಂದು ಬಿಡುಗಡೆಯಾಗಲಿರುವ ಈ ಚಿತ್ರವು, ಈಗಾಗಲೇ ಬಾಕ್ಸ್ ಆಫೀಸ್‌ನಲ್ಲಿ ಗಮನ ಸೆಳೆಯಲು ಪ್ರಾರಂಭಿಸಿದೆ. ಬುಧವಾರ ಮಧ್ಯಾಹ್ನ 12 ಗಂಟೆಯ ಹೊತ್ತಿಗೆ, 'ರಾಮಾಯಣ' ಚಿತ್ರವು ಭಾರತದಾದ್ಯಂತ ಮುಂಗಡ ಬುಕಿಂಗ್‌ಗಳ ಮೂಲಕ ₹5.35 ಕೋಟಿ ಗಳಿಕೆ ಕಂಡಿದೆ.
ಫಿಲ್ಮ್ ಟ್ರೇಡ್ ಪೋರ್ಟಲ್ 'Sacnilk' ವರದಿ ಮಾಡಿರುವಂತೆ, ಇದುವರೆಗೆ 3,542 ಪ್ರದರ್ಶನಗಳಿಗೆ ಒಟ್ಟು 91,125 ಟಿಕೆಟ್‌ಗಳು ಮಾರಾಟವಾಗಿವೆ. 'ರಾಮಾಯಣ'ದ ಮುಂಗಡ ಬುಕಿಂಗ್ ಸಂಗ್ರಹದಲ್ಲಿ ಹಿಂದಿ ಆವೃತ್ತಿಯ ಪಾಲು ಅತ್ಯಧಿಕವಾಗಿದ್ದು, ಇದು ₹5.07 ಕೋಟಿ, ಅಂದರೆ ಒಟ್ಟು ಮೊತ್ತದ ಸುಮಾರು ಶೇ 95 ರಷ್ಟನ್ನು ಗಳಿಸಿದೆ.
ಡಬ್ ಮಾಡಲಾದ ಆವೃತ್ತಿಗಳ ಪೈಕಿ, ಕನ್ನಡ ಆವೃತ್ತಿಯು ₹27.11 ಲಕ್ಷ ಗಳಿಕೆಯೊಂದಿಗೆ ಎರಡನೇ ಸ್ಥಾನದಲ್ಲಿದೆ; ನಂತರದ ಸ್ಥಾನದಲ್ಲಿರುವ ತೆಲುಗು ಆವೃತ್ತಿಯು ₹48,700 ಸಂಗ್ರಹಿಸಿದೆ. ಸದ್ಯ ಈ ಚಿತ್ರದ ಒಟ್ಟಾರೆ ಆಕ್ಯುಪೆನ್ಸಿ (ಪ್ರೇಕ್ಷಕರ ಹಾಜರಾತಿ) ಪ್ರಮಾಣವು ಶೇ 12ರಷ್ಟಿದೆ.
'ರಾಮಾಯಣ' ಚಿತ್ರದ ಮುಂಗಡ ಬುಕಿಂಗ್‌ನಲ್ಲಿ ದೆಹಲಿ-ಎನ್‌ಸಿಆರ್ ಮುಂಚೂಣಿಯಲ್ಲಿದ್ದು, ಇಲ್ಲಿಯವರೆಗೆ 19,607 ಟಿಕೆಟ್‌ಗಳ ಮಾರಾಟದ ಮೂಲಕ ₹1.50 ಕೋಟಿ ಸಂಗ್ರಹವಾಗಿದೆ. ಮುಂಬೈ ನಂತರದ ಸ್ಥಾನದಲ್ಲಿದ್ದು, 15,671 ಟಿಕೆಟ್‌ಗಳ ಮಾರಾಟದಿಂದ ₹1.08 ಕೋಟಿ ಗಳಿಸಿದೆ. ಮುಂಗಡ ಬುಕಿಂಗ್‌ನಲ್ಲಿ ಪುಣೆ (4,474 ಟಿಕೆಟ್‌ಗಳಿಂದ ₹29.65 ಲಕ್ಷ), ಅಹಮದಾಬಾದ್ (3,383 ಟಿಕೆಟ್‌ಗಳಿಂದ ₹28.32 ಲಕ್ಷ) ಮತ್ತು ಕೋಲ್ಕತ್ತಾ (4,393 ಟಿಕೆಟ್‌ಗಳಿಂದ ₹23.65 ಲಕ್ಷ) ಸೇರಿವೆ.
ಮುಂಬೈನ ಲೋವರ್ ಪರೇಲ್‌ನಲ್ಲಿರುವ PVR ಐಕಾನ್: ಫೀನಿಕ್ಸ್ ಪಲ್ಲಾಡಿಯಂನಲ್ಲಿ IMAX 3D ಪ್ರದರ್ಶನಕ್ಕಾಗಿ ದುಬಾರಿ ಬೆಲೆಯಲ್ಲಿ ಟಿಕೆಟ್‌ಗಳು ಮಾರಾಟವಾಗಿವೆ. ಇದು ಭಾರತದಾದ್ಯಂತ ಅತ್ಯಂತ ದುಬಾರಿ ಟಿಕೆಟ್‌ಗಳಾಗಿವೆ. BookMyShow ಪ್ರಕಾರ, ನವೆಂಬರ್ 5 ಮತ್ತು 6 ರಂದು ಸಂಜೆ 6.55 ಮತ್ತು ರಾತ್ರಿ 11ರ ಶೋಗೆ ರೆಕ್ಲೈನರ್ ಸೀಟುಗಳ ಬೆಲೆ ₹2,770 ಆಗಿದೆ. ನಗರದಲ್ಲಿ ಮೊದಲ ಪ್ರದರ್ಶನವನ್ನು ವಡಾಲಾದ ಮಿರಾಜ್ ಸಿನಿಮಾಸ್: IMAX ನಲ್ಲಿ ಬೆಳಿಗ್ಗೆ 6.45ಕ್ಕೆ ನಿಗದಿಪಡಿಸಲಾಗಿದೆ. BKCಯ ಮೈಸನ್ INOX: ಜಿಯೋ ವರ್ಲ್ಡ್ ಪ್ಲಾಜಾದಲ್ಲಿ ರಾತ್ರಿ 11.45ಕ್ಕೆ ಕೊನೆಯ ಪ್ರದರ್ಶನ ನಿಗದಿಯಾಗಿದೆ.
'ರಾಮಾಯಣ'ವನ್ನು ಎರಡು ಭಾಗಗಳಲ್ಲಿ ತೆರೆಗೆ ತರಲು ಯೋಜಿಸಲಾಗಿದೆ. ಇದರ ಮೊದಲ ಭಾಗವು ಈ ವರ್ಷದ ನವೆಂಬರ್ 5 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದ್ದು, ಎರಡನೇ ಭಾಗವು ಮುಂದಿನ ವರ್ಷ ಬಿಡುಗಡೆಯಾಗಲಿದೆ.