ರಣಬೀರ್ ಕಪೂರ್ ಮತ್ತು ಯಶ್ ಅಭಿನಯದ ಬಹು ನಿರೀಕ್ಷಿತ 'ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್' ಸಿನಿಮಾದ ದೇಶಾದ್ಯಂತದ ಮುಂಗಡ ಬುಕಿಂಗ್ ರೂ. 10 ಕೋಟಿ ದಾಟಿದೆ. ನಿತೇಶ್ ತಿವಾರಿ ನಿರ್ದೇಶನದ ಮಹಾಕಾವ್ಯ ನವೆಂಬರ್ 5 ರಂದು ಬಿಡುಗಡೆಯಾಗಲು ಸಜ್ಜಾಗಿದ್ದು, ಹಿಂದಿ ಆವೃತ್ತಿ ಟಿಕೆಟ್ ಹೆಚ್ಚಾಗಿ ಮಾರಾಟ ಆಗಿದೆ.
ಹೌದು. ರಾಮಾಯಣ ಬಿಡುಗಡೆಗೂ ಮುನ್ನವೇ ಸಂಚಲನ ಮೂಡಿಸಿದೆ. ಭಾರತೀಯ ಚಿತ್ರೋದ್ಯಮ ಟ್ರ್ಯಾಕರ್ ಸಕ್ನಿಲ್ಕ್ ವರದಿ ಮಾಡಿದ ಅಂಕಿಅಂಶಗಳ ಪ್ರಕಾರ, ಅಕ್ಟೋಬರ್ 24 ರಂದು ಮಧ್ಯಾಹ್ನ 3 ಗಂಟೆಯ ಹೊತ್ತಿಗೆ ಬ್ಲಾಕ್ ಮಾಡಲಾದ ಸೀಟುಗಳನ್ನು ಒಳಗೊಂಡಂತೆ ಒಟ್ಟು ರೂ. 10.15 ಕೋಟಿ ಮುಂಗಡ ಬುಕಿಂಗ್ ಆಗಿದೆ.
ಬ್ಲಾಕ್ ಮಾಡಲಾದ ಸೀಟುಗಳನ್ನು ಹೊರತುಪಡಿಸಿ, ಕಲೆಕ್ಷನ್ ರೂ. 7.98 ಕೋಟಿ ಆಗಿದೆ. 134 ನಗರಗಳಲ್ಲಿ 4,352 ಟ್ರ್ಯಾಕ್ ಮಾಡಿದ ಪ್ರದರ್ಶನಗಳಲ್ಲಿ ಸುಮಾರು 1.81 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿವೆ. ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲು ಇನ್ನೂ 12 ದಿನಗಳು ಬಾಕಿ ಇರುವಾಗ, ಚಿತ್ರದ ಮುಂಗಡ ಮಾರಾಟವು ಜೋರಾಗಿ ನಡೆಯುತ್ತಿದೆ. ಸಿನಿಮಾದ ಮುಂಗಡ ಬುಕಿಂಗ್ ಅಂಕಿಅಂಶಗಳಲ್ಲಿ ಹಿಂದಿ ಆವೃತ್ತಿಯಲ್ಲಿ ಅತಿ ಹೆಚ್ಚು ಸುಮಾರು 8.91 ಕೋಟಿ ರೂ. ಮುಂಗಡ ಮಾರಾಟ ಆಗಿದ್ದು, ಒಟ್ಟು ಒಟ್ಟು ಸಂಗ್ರಹದ ಸುಮಾರು 88% ರಷ್ಟಿದೆ.
ಕನ್ನಡ ಆವೃತ್ತಿಯಲ್ಲಿ ಸುಮಾರು 96.57 ಲಕ್ಷ ರೂ.ಗಳನ್ನು ಗಳಿಸಿದರೆ, ತೆಲುಗು ಆವೃತ್ತಿಯಲ್ಲಿ ಸುಮಾರು 28.11 ಲಕ್ಷ ರೂ.ಗಳನ್ನು ದಾಖಲಿಸಿದೆ. ಆದಾಗ್ಯೂ ಡಬ್ಬಿಂಗ್ ಆವೃತ್ತಿಗಳ ಬುಕಿಂಗ್‌ಗಳು ಸಹ ಚಿತ್ರದ ಒಟ್ಟಾರೆ ಪ್ರದರ್ಶನಕ್ಕೆ ಕೊಡುಗೆ ನೀಡುತ್ತಿವೆ. ಬಿಡುಗಡೆ ದಿನಾಂಕ ಸಮೀಪಿಸುತ್ತಿದ್ದಂತೆ ಮುಂಗಡ ಮಾರಾಟವು ಮತ್ತಷ್ಟು ಹೆಚ್ಚಾಗಬಹುದು.
ಮುಂಗಡ ಬುಕಿಂಗ್‌ಗಳಲ್ಲಿ ಮಹಾರಾಷ್ಟ್ರವು ಅಗ್ರಸ್ಥಾನದಲ್ಲಿದ್ದು, ಸುಮಾರು 2.31 ಕೋಟಿ ರೂ.ಗಳ ಕೊಡುಗೆ ನೀಡಿದೆ. ದೆಹಲಿ 2.13 ಕೋಟಿ ರೂ.ಗಳೊಂದಿಗೆ ನಂತರದ ಸ್ಥಾನದಲ್ಲಿದ್ದರೆ, ಕರ್ನಾಟಕವು ಸುಮಾರು 1.45 ಕೋಟಿ ರೂ.ಗಳನ್ನು ದಾಖಲಿಸಿದೆ. ನಗರವಾರು ಮಾರುಕಟ್ಟೆಗಳನ್ನು ಪರಿಗಣಿಸಿದರೆ, ನ್ಯಾಷನಲ್ ಕ್ಯಾಪಿಟಲ್ ರೀಜನ್ (NCR) 27,177 ಟಿಕೆಟ್‌ಗಳ ಮಾರಾಟದ ಮೂಲಕ 2.13 ಕೋಟಿ ರೂ.ಗಳನ್ನು ಗಳಿಸಿ ಮುಂಚೂಣಿಯಲ್ಲಿದೆ. ಮುಂಬೈ 22,864 ಟಿಕೆಟ್‌ಗಳ ಮಾರಾಟದೊಂದಿಗೆ ಸುಮಾರು 1.60 ಕೋಟಿ ರೂ.ಗಳನ್ನು ಗಳಿಸಿ ನಂತರದ ಸ್ಥಾನದಲ್ಲಿದೆ.
ಬೆಂಗಳೂರಿನಲ್ಲೂ ಉತ್ತಮ ಬೇಡಿಕೆ ಕಂಡುಬಂದಿದ್ದು, 18,147 ಟಿಕೆಟ್‌ಗಳ ಮಾರಾಟದಿಂದ ಸುಮಾರು 1.20 ಕೋಟಿ ರೂ. ಸಂಗ್ರಹವಾಗಿದೆ. ಹೈದರಾಬಾದ್ ಸುಮಾರು 62 ಲಕ್ಷ ರೂ.ಗಳ ಕೊಡುಗೆ ನೀಡಿದ್ದರೆ, ಪುಣೆ ಸುಮಾರು 45.72 ಲಕ್ಷ ರೂ.ಗಳ ಮುಂಗಡ ಟಿಕೆಟ್ ಮಾರಾಟವನ್ನು ದಾಖಲಿಸಿದೆ. ಈ ಅಂಕಿಅಂಶಗಳು, ಚಲನಚಿತ್ರದ ಆರಂಭಿಕ ಟಿಕೆಟ್ ಮಾರಾಟದಲ್ಲಿ ಪ್ರಮುಖ ಮಹಾನಗರಗಳ ಮಾರುಕಟ್ಟೆಗಳು ಗಮನಾರ್ಹ ಕೊಡುಗೆ ನೀಡುತ್ತಿವೆ ಎಂಬುದನ್ನು ಸೂಚಿಸುತ್ತವೆ.
