ಬೆಂಗಳೂರು: ಪುನೀತ್ ರಾಜಕುಮಾರ್ ಅರ್ಪಿಸಲಿರುವ ಎನ್ ಎಸ್ ರಾಜಕುಮಾರ್ ನಿರ್ಮಾಣದ 'ನಟರಾಜ್ ಸರ್ವಿಸ್' ಸಿನೆಮಾಗೆ ಸಿ ಎಂ ಬಾಲ ಖಳನಾಯಕರಾಗಿ ಆಯ್ಕೆಯಾಗಿದ್ದಾರೆ. ಈ ಸಿನೆಮಾವನ್ನು ನಿರ್ದೇಶಕ ಪವನ್ ಒಡೆಯರ್ ನಿರ್ದೇಶಿಸುತ್ತಿದ್ದು ಶರಣ್ ನಾಯಕ ನಟ. "ನನಗೆ ಜನಪ್ರಿಯ ನಟನ ಅವಶಕತೆ ಇತ್ತು. ಪಾತ್ರಕ್ಕೆ ಬಾಲ ಸರಿಯಾಗಿ ಹೊಂದಾಣಿಕೆಯಾದರು" ಎನ್ನುತ್ತಾರೆ ಪವನ್.
ದಕ್ಷಿಣ ಭಾರತ ಚಿತ್ರರಂಗದಲ್ಲಿ ಬಾಲ ಜನಪ್ರಿಯ ನಟ. ಕಾಂಚನ -೨ ರಲ್ಲಿ ಅವರ ನಟನೆ ಎಲ್ಲರ ಗಮನ ಸೆಳೆದಿತ್ತು. "ಪವನ್ ಕಾಂಚನ-೨ ರಲ್ಲಿ ನನ್ನ ನಟನೆಯನ್ನು ನೋಡಿ ಆಯ್ಕೆ ಮಾಡಿದ್ದಾರೆ" ಎನ್ನುತ್ತಾರೆ ನಟ.
ಬಾಲ ಅನಂತರಾಜು ನಿರ್ದೇಶನದ ಕಲ್ಪನಾ-೨ ನಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಕಾಂಚನ೨ ರಿಮೇಕ್ ಕಲ್ಪನಾ ೨. ಈ ಸಿನೆಮಾದಲ್ಲೂ ತಮಿಳು ಮೂಲದಲ್ಲಿ ನಟಿಸಿದ್ದ ಪಾತ್ರವನ್ನೇ ಮಾಡಲಿದ್ದಾರೆ.
ಶರಣ್ ನಟಿಸಿರುವ ಒಂದೆರಡು ಸಿನೆಮಾಗಳನ್ನು ನೋಡಿರುವ ಬಾಲ ಶರಣ್ ಒಳ್ಳೆಯ ಮನರಂಜನೆ ನೀಡುವ ನಟ ಎಂದಿದ್ದಾರೆ. "ಕಾಮಿಡಿ ಟ್ರ್ಯಾಕ್ ಇರುವ ಸಿನೆಮಾದಲ್ಲಿ ಖಳನಟನಾಗಿ ಅಭಿನಯಿಸುವುದು ಸವಾಲು. ನಟರಾಜ ಸರ್ವಿಸ್ ನಲ್ಲಿ ನಟಿಸಲು ಎದುರು ನೋಡುತ್ತಿದ್ದೇನೆ" ಎನ್ನುತ್ತಾರೆ ಬಾಲ.
ನವೆಂಬರ್ ೨೦ ರಿಂದ ಚಿತ್ರೀಕರಣ ಪ್ರಾರಂಭವಾಗಲಿದೆ ಎನ್ನಲಾಗಿದೆ.
