ಚೆನ್ನೈ: ಸದ್ಯಕ್ಕೆ ದಟ್ಟವಾಗಿ ಹರಡಿರುವ ವದಂತಿಗಳು ನಿಜವಾದರೆ ಬಾಲಿವುಡ್ ಮೆಗಾಸ್ಟಾರ್ ಅಮಿತಾಬ್ ಬಚ್ಚನ್ ಮತ್ತು ಮಲಯಾಳಂ ಸೂಪರ್ಸ್ಟಾರ್ ಮೋಹನ್ ಲಾಲ್ ಅವರು ದೊಡ್ಡ ಬಜೆಟ್ ಚಿತ್ರ 'ಒಡಿಯನ್' (ತಾತ್ಕಾಲಿಕ ಶೀರ್ಷಿಕೆ) ನಲ್ಲಿ ಒಟ್ಟಿಗೆ ನಟಿಸಲಿದ್ದಾರೆ. ಶ್ರೀಕುಮಾರ್ ನಿರ್ದೇಶನದ ಈ ಚಿತ್ರದಲ್ಲಿ ಪ್ರಕಾಶ್ ರಾಜ್ ಮತ್ತು ಮಂಜು ವಾರಿಯರ್ ಕೂಡ ಪ್ರಮುಖ ಪಾತ್ರಗಳಲ್ಲಿ ನಟಿಸಲಿದ್ದಾರೆ ಎಂದು ತಿಳಿದುಬಂದಿದೆ.
೬೦೦ ಕೋಟಿ ಬಜೆಟ್ ನಲ್ಲಿ ನಿರ್ಮಾಣಗೊಳ್ಳಲಿದೆ ಎಂದು ತಿಳಿಯಲಾಗಿರುವ ಈ ಸಿನೆಮಾ ೩ಡಿ ತಂತ್ರಜ್ಞಾನದಲ್ಲಿ ಚಿತ್ರೀಕರಣಗೊಳ್ಳಲಿದೆಯಂತೆ. ಎಲ್ಲವು ಪ್ರಾರಂಭಿಕ ಹಂತದಲ್ಲಿರುವುದರಿಂದ ಯಾವುದು ಅಧಿಕೃತವಾಗಿ ಘೋಷಣೆಯಾಗಿಲ್ಲ.
ಈ ಯೋಜನೆ ಘನೀಕೃತವಾದರೆ, ಬಿಗ್ ಬಿ ಮತ್ತು ಮೋಹನ್ ಲಾಲ್ ಮೂರನೇ ಬಾರಿಗೆ ಒಟ್ಟಾಗಲಿದ್ದಾರೆ, ಈ ಹಿಂದೆ 'ಕಂಧಹಾರ್' ಮತ್ತು ರಾಮ್ ಗೋಪಾಲ್ ವರ್ಮಾಕಿ ಆಗ್ ನಲ್ಲಿ ಒಟ್ಟಿಗೆ ನಟಿಸಿದ್ದರು.
ಈಮಧ್ಯೆ ಮೋಹನ್ ಲಾಲ್ ತಮ್ಮ ಮುಂದಿನ ಸಿನೆಮಾ '೧೯೭೧- ಬಿಯಾಂಡ್ ಬಾರ್ಡರ್ಸ್' ಸಿನೆಮಾದಲ್ಲಿ ನಿರತರಾಗಿರುವುದಲ್ಲದೆ ಮುಂದಿನ ಸಿನೆಮಾ ಬಿ ಉನ್ನಿಕೃಷ್ಣನ್ ನಿರ್ದೇಶನದ ಚಿತ್ರದಲ್ಲಿಯೂ ತೊಡಗಿಸಿಕೊಂಡಿದ್ದಾರೆ.
೯೦ ರ ದಶಕದಲ್ಲಿ ಮೋಹನ್ ಲಾಲ್ ಮತ್ತು ಮಂಜು ವಾರಿಯರ್ ಹಲವು ಸಿನೆಮಾಗಳಲ್ಲಿ ನಟಿಸಿದ್ದಾರೆ. ಜನಪ್ರಿಯ ಆಭರಣ ಬ್ರಾಂಡ್ ಒಂದರ ಜಾಹಿರಾತಿನಲ್ಲಿ ಅಮಿತಾಬ್ ಮತ್ತು ಮಂಜು ಒಟ್ಟಿಗೆ ನಟಿಸಿದ್ದಾರೆ.
