ಪೊಲೀಸರ ಪ್ರಕಾರ, ಸುನಿಲ್ ಅಲಿಯಾಸ್ ಪಲ್ಸರ್ ಸುನಿ ತಿಂಗಳ ಹಿಂದೆ ಮಲಯಾಳಂ ಚಿತ್ರವೊಂದರಲ್ಲಿ ಗೋವಾದಲ್ಲಿ ಪ್ರೊಡಕ್ಷನ್ ಯೂನಿಟ್ ನಲ್ಲಿ ಕೆಲಸ ಮಾಡುತ್ತಿದ್ದಾಗ ನಟಿಯನ್ನು ಅಪಹರಿಸಲು ಸಂಚು ರೂಪಿಸಿದ್ದನು. ಗೋವಾದಲ್ಲಿ ನಟಿಯ ಜೊತೆ ತುಂಬ ಒಳ್ಳೆಯವನಂತೆ ನಟಿಸಿ ಹತ್ತಿರವಾಗಲು ನೋಡಿದ್ದನು. ಆಕೆಯ ಜೊತೆ ಫೋಟೋ ತೆಗೆಸಿಕೊಂಡು ಅದನ್ನಿಟ್ಟುಕೊಂಡು ಬ್ಲ್ಯಾಕ್ ಮೇಲ್ ಮಾಡತೊಡಗಿದನು. ಆ ಮೂಲಕ ನಟಿಯಿಂದ 30 ಲಕ್ಷ ರೂಪಾಯಿ ಹಣ ಕೊಳ್ಳೆ ಹೊಡೆಯುವ ಯೋಜನೆ ಮಾಡಿಕೊಂಡಿದ್ದನು ಎನ್ನುತ್ತಾರೆ ತನಿಖಾ ತಂಡದ ಅಧಿಕಾರಿಯೊಬ್ಬರು. ಇದೀಗ ಕಸ್ಟಡಿಯಲ್ಲಿರುವ ನಟಿಯ ಕಾರು ಚಾಲಕ ಮಾರ್ಟಿನ್, ಅಪಹರಣ ಯೋಜನೆಗೆ ಸಹಕರಿಸಿದರೆ ಬರುವ ಹಣದಲ್ಲಿ ಸ್ವಲ್ಪ ಮೊತ್ತವನ್ನು ನೀಡುವುದಾಗಿ ಸುನಿಲ್ ಭರವಸೆ ನೀಡಿದ್ದನು ಎಂದು ಪೊಲೀಸರಿಗೆ ತಿಳಿಸಿದ್ದಾನೆ.
