ಯಶ್ ಚಿತ್ರಕ್ಕೂ ಎದುರಾಯ್ತ ಪೈರಸಿ ಭೂತ; ಬಿಡುಗಡೆಗೂ ಮುನ್ನ ಕೆಜಿಎಫ್ ಲೀಕ್?

ಬೆಂಗಳೂರು: ದೇಶಾದ್ಯಂತ ತೀವ್ರ ಕುತೂಹಲ ಕೆರಳಿಸಿರುವ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಕೆಜಿಎಫ್ ಚಿತ್ರ ಇದೇ ವಾರ ಬಿಡುಗಡೆಯಾಗುತ್ತಿದ್ದು ಬಿಡುಗಡೆಗೂ ಮುನ್ನ ಚಿತ್ರತಂಡಕ್ಕೆ ದೊಡ್ಡ ಆಘಾತ ಎದುರಾಗಿದೆ. 

ಹೌದು ಕೆಜಿಎಫ್ ಚಿತ್ರ ಬಿಡುಗಡೆಗೂ ಮುನ್ನವೇ ಲೀಕ್ ಆಗಿದೆ ಎನ್ನಲಾಗುತ್ತಿದೆ. ಲೀಕ್ ದೃಶ್ಯಗಳ ಸ್ಕ್ರಿನ್ ಶಾಟ್ ಹರಿದಾಡುತ್ತಿದೆ. ಹಿರಿಯ ನಟ ಅನಂತ್ ನಾಗ್ ಕುಳಿತ್ತಿರುವ ದೃಶ್ಯ ಹಾಗೂ ದಗ ದಗಿಸುತ್ತಿರುವ ಬೆಂಕಿಯ ಮುಂದೆ ಯಶ್ ನಡೆದುಕೊಂಡು ಬರುತ್ತಿರುವ ದೃಶ್ಯಗಳು ಸೋರಿಕೆಯಾಗಿವೆ ಎಂದು ಹೇಳಲಾಗುತ್ತಿದೆ. ಇನ್ನು ಪೈರಸಿಗಳ ವಿರುದ್ಧ ಹೋರಾಡಲು ಒಂದು ತಂಡವನ್ನೇ ಕೆಜಿಎಫ್ ಚಿತ್ರತಂಡ ಸಿದ್ಧಪಡಿಸಿದೆ ಎನ್ನಲಾಗಿದೆ. 

ಐದು ಭಾಷೆಗಳಲ್ಲಿ ಚಿತ್ರ ಬಿಡುಗೆಯಾಗುತ್ತಿದ್ದು ಇದೇ ಡಿಸೆಂಬರ್ 21ಕ್ಕೆ ದೇಶಾದ್ಯಂತ ಸರಿಸುಮಾರು 2 ಸಾವಿರ ಥಿಯೇಟರ್ ಗಳಲ್ಲಿ ಕೆಜಿಎಫ್ ಚಿತ್ರ ಅಬ್ಬರಿಸಲಿದೆ. ದೊಡ್ಡ ಮಟ್ಟದಲ್ಲಿ ನಿರೀಕ್ಷೆ ಹುಟ್ಟಿಸಿರುವ ಚಿತ್ರಕ್ಕೆ ಇದೀಗ ಪೈರಸಿ ಕಂಟಕ ಶುರುವಾಗಿದೆ. 

ಇನ್ನು ಕೆಜಿಎಫ್ ಚಿತ್ರ ಸೋರಿಕೆಯಾಗಿಲ್ಲ ಎಂದು ಚಿತ್ರತಂಡ ಸ್ಪಷ್ಟಪಡಿಸಿದ್ದು ಇನ್ನು ಕೆಜಿಎಫ್ ಚಿತ್ರದ ಪೈರಸಿ ವಿರುದ್ಧ ಹೋರಾಡಲು ಚಿತ್ರ ತಂಡ ಸಖಲ ಸಿದ್ಧತೆ ಮಾಡಿಕೊಂಡಿದೆ.