'ಚಿತ್ರ ಲೋಕ' ಗೆ ಯು ಟ್ಯೂಬ್ ಸಿಲ್ವರ್ ಕ್ರಿಯೇಟರ್ ಪ್ರಶಸ್ತಿ

ಬೆಂಗಳೂರು: ಕನ್ನಡ ಚಿತ್ರರಂಗದ ಮೊದಲ ಪೋರ್ಟಲ್ ಎನಿಸಿರುವ ಚಿತ್ರಲೋಕ ಡಾಟ್ ಕಾಮ್ ಇನ್ನೊಂದು ಹೊಸ ಮೈಲಿಗಲ್ಲು ಸಾಧಿಸಿದೆ. ಯು ಟ್ಯೂಬ್ ನಲ್ಲಿ ಚಿತ್ರ ಲೋಕ ಚಾನೆಲ್ ಗೆ ಒಂದು ಲಕ್ಷ ಸಬ್ ಸ್ಕ್ರೈಬರ್ಸ್ ಆಗಿದ್ದಾರೆ. ಈ ಸಾಧನೆಯನ್ನು ಗುರುತಿಸಿರುವ ಯು ಟ್ಯೂಬ್ ಸಂಸ್ಥೆಯು, ಯು ಟ್ಯೂಬ್ ಸಿಲ್ವರ್ ಕ್ರಿಯೇಟರ್ ಅವಾರ್ಡ್ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ.

ಯು ಟ್ಯೂಬ್ ನಲ್ಲಿ ಯಾವುದೇ ಚಾನೆಲ್ ಗೆ ಒಂದು ಲಕ್ಷ ಚಂದಾದಾರಾದ ಸಂದರ್ಭದಲ್ಲಿ ಈ ಪ್ರಶಸ್ತಿ ನೀಡಲಾಗುತ್ತಿದ್ದು, ಈ ಪ್ರಶಸ್ತಿಯನ್ನು ಪಡೆದಿರುವ ಕನ್ನಡ ಕೆಲವು ಬೆರಳಣಿಕೆಯಷ್ಟು ಚಾನೆಲ್ ಗಳಲ್ಲಿ ಚಿತ್ರ ಲೋಕ ಸಹ ಒಂದಾಗಿರುವುದು ವಿಶೇಷವಾಗಿದೆ.

ಕಳೆದ ಕೆಲವು ತಿಂಗಳುಗಳಲ್ಲಿ  ಯೂ ಟ್ಯೂಬ್ ನ ಚಿತ್ರ ಲೋಕ ಚಾನೆಲ್ ನಲ್ಲಿ ಹಲವು ವಿಭಿನ್ನ ಮತ್ತು ವಿನೂತನ ಹೆಜ್ಜೆಗಳನ್ನು ಇಟ್ಟಿದೆ. ಡಾ. ರಾಜ್ ಕುಮಾರ್ ಅವರ ಕಿಡ್ನಾಪ್ ಕುರಿತು ಯಾರಿಗೂ ಗೊತ್ತಿಲ್ಲದ ಮತ್ತು ಇದುವರೆಗೂ ಯಾರೂ ಕೇಳರಿಯದ ಹಲವು ವಿಷಯಗಳನ್ನು ತನ್ನ ಯುಟ್ಯೂಬ್ ಚಾನೆಲ್ ನ ಮೂಲಕ ಚಿತ್ರ ಲೋಕ ಹಂಚಿಕೊಂಡಿದೆ.

ಡಾ. ರಾಜ್ ಕುಮಾರ್ ಅವರ ಹತ್ತಿರದವರಿಂದ ಅಪರೂಪದ ಮಾಹಿತಿಗಳನ್ನು ಸಂಗ್ರಹಿಸಿ, ಕೆಲವರನ್ನು ನೇರವಾಗಿ ಸಂದರ್ಶನ ಮಾಡಿ ಕಾರ್ಯಕ್ರಮ ಪ್ರಸಾರ ಮಾಡಲಾಗಿದೆ ಎಂದು ಚಿತ್ರಲೋಕ ಡಾಟ್ ಕಾಮ್ ನ ವಿರೇಶ್ ಮಾಹಿತಿ ನೀಡಿದ್ದಾರೆ.