ಮೂತ್ರದಲ್ಲಿ ಪ್ರೋಟೀನ್ ಸೋರಿಕೆ ಮತ್ತು ಮೂತ್ರಕೋಶದ ಕಲ್ಲಿನ ಸಮಸ್ಯೆ (ಕುಶಲವೇ ಕ್ಷೇಮವೇ)

ಮೂತ್ರದಲ್ಲಿ ಪ್ರೋಟೀನ್ ಸೋರಿಕೆಯಾಗುವುದು ಮೂತ್ರಕೋಶಗಳು ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂಬುದರ ಆರಂಭಿಕ ಚಿಹ್ನೆಗಳಲ್ಲಿ ಒಂದು. ಇದನ್ನು ವೈದ್ಯಕೀಯ ಪರಿಭಾಷೆಯಲ್ಲಿ ಪ್ರೋಟೀನುರಿಯಾ ಎಂದು ಕರೆಯುತ್ತಾರೆ.

ಮೂತ್ರಕೋಶಗಳ ಪಾತ್ರ

ನಮ್ಮ ದೇಹದಲ್ಲಿ ಮೂತ್ರಕೋಶಗಳು ತ್ಯಾಜ್ಯ ಮತ್ತು ಹೆಚ್ಚುವರಿ ದ್ರವಗಳನ್ನು ಫಿಲ್ಟರ್ ಮಾಡಿ ಅಗತ್ಯ ಪ್ರೋಟೀನುಗಳು ರಕ್ತಪ್ರವಾಹದೊಳಗೆ ಉಳಿಯುವಂತೆ ಮಾಡುತ್ತವೆ. ಆದರೆ ಈ ಶೋಧಕ ವ್ಯವಸ್ಥೆಯು ಹಾನಿಗೊಳಗಾದಾಗ ಪ್ರೋಟಿನ್ ಸರಿಯಾಗಿ ಫಿಲ್ಟರ್ ಆಗದೇ ಮೂತ್ರದ ಮೂಲಕ ಸೋರಿ ಹೊರಬರಲು ಪ್ರಾರಂಭಿಸುತ್ತದೆ. ಈ ಸೋರಿಕೆಗೆ ಕಾರಣವಾಗುವ ಹಲವು ಪರಿಸ್ಥಿತಿಗಳು ಮೂತ್ರಕೋಶದ ಕಲ್ಲುಗಳ ಅಪಾಯವನ್ನು ಹೆಚ್ಚಿಸಬಹುದು.

ಪ್ರೋಟೀನುರಿಯಾ

ರಕ್ತದಲ್ಲಿ ಪ್ರೋಟೀನ್ ಸೋರಿಕೆಗೆ ಸ್ವಯಂನಿರೋಧಕ (ಆಟೋಇಮ್ಯೂನ್) ಕಾಯಿಲೆ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಹೆಚ್ಚಿನ ಸಂದರ್ಭಗಳಲ್ಲಿ ಉದಾಹರಣೆಗೆ ಲೂಪಸ್ ನೆಫ್ರೈಟಿಸ್, ಐಜಿಎ ನೆಫ್ರೋಪತಿ ಮತ್ತು ಗ್ಲೋಮೆರುಲೋನೆಫ್ರಿಟಿಸ್‌ನ ಇತರ ರೂಪಗಳಲ್ಲಿ ರೋಗನಿರೋಧಕ ವ್ಯವಸ್ಥೆಯು ತಪ್ಪಾಗಿ ಮೂತ್ರಕೋಶದ ಫಿಲ್ಟರಿಂಗ್ ಘಟಕಗಳ ಮೇಲೆ ದಾಳಿ ಮಾಡುತ್ತದೆ. ಗ್ಲೋಮೆರುಲಿ ಎಂಬ ಈ ಫಿಲ್ಟರ್‌ಗಳು ಉಬ್ಬಿಕೊಳ್ಳುತ್ತವೆ ಮತ್ತು ಅಗತ್ಯವಾದ ಪ್ರೋಟೀನ್‌ಗಳು ಮೂತ್ರದೊಂದಿಗೆ ಹೊರಹೋಗುವುದನ್ನು ತಡೆಯುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತವೆ.

ದೀರ್ಘಕಾಲದ ರೋಗನಿರೋಧಕ ಶಕ್ತಿಗೆ ಸಂಬಂಧಿತ ಉರಿಯೂತವು ಮೂತ್ರದಲ್ಲಿ ಖನಿಜ ಸಮತೋಲನವನ್ನು ಅಡ್ಡಿಪಡಿಸುತ್ತದೆ. ಇದು ಮೂತ್ರಕೋಶದಲ್ಲಿ ಕಲ್ಲು ಉಂಟಾಗುವ ಪರಿಸ್ಥಿತಿಗಳನ್ನು ಸೃಷ್ಟಿಸುತ್ತದೆ. ಇದರ ಪರಿಣಾಮವಾಗಿ ಯೂರಿಕ್ ಆಮ್ಲ ಮತ್ತು ಕ್ಯಾಲ್ಸಿಯಂನ ನಿರ್ವಹಣೆ ತೊಂದರೆಗೊಳಗಾಗುತ್ತದೆ. ಇದು ಹರಳುಗಟ್ಟುವಿಕೆ ಮತ್ತು ನಂತರ ಕಲ್ಲುಗಳು ಉಂಟಾಗಲು ಕಾರಣವಾಗಬಹುದು. ಸ್ವಯಂನಿರೋಧಕ ಮೂತ್ರಕೋಶ ಕಾಯಿಲೆ ಇರುವ ಹೆಚ್ಚಿನ ರೋಗಿಗಳು ಪ್ರೋಟೀನುರಿಯಾ ಮತ್ತು ಕಲ್ಲುಗಳ ಸಮಸ್ಯೆಯನ್ನು ಎದುರಿಸುತ್ತಾರೆ. ಈ ಕಾರಣಕ್ಕಾಗಿ ಶಾಶ್ವತ ಹಾನಿಗೆ ಕಾರಣವಾಗುವ ಮೂತ್ರಪಿಂಡದ ದುರ್ಬಲತೆಯನ್ನು ತಪ್ಪಿಸಲು ಆರಂಭಿಕ ರೋಗನಿರ್ಣಯ ಮತ್ತು ವೈದ್ಯಕೀಯ ಚಿಕಿತ್ಸೆಯು ಬಹಳ ಮುಖ್ಯ.

ಪ್ರೋಟೀನುರಿಯಾ ಸಮಸ್ಯೆಗೆ ಕಾರಣ

ಪ್ರಪಂಚದಾದ್ಯಂತ ಪ್ರೋಟೀನುರಿಯಾದ ಸಾಮಾನ್ಯ ಕಾರಣವೆಂದರೆ ಅನಿಯಂತ್ರಿತ ಮಧುಮೇಹ. ರಕ್ತದಲ್ಲಿ ಸಕ್ಕರೆಯ ಮಟ್ಟ ಹೆಚ್ಚಾದಾಗ ಮೂತ್ರಕೋಶಗಳಲ್ಲಿರುವ ಸಣ್ಣ ರಕ್ತನಾಳಗಳನ್ನು ನಾಶವಾಗುತ್ತವೆ. ಇದನ್ನು ವೈದ್ಯಕೀಯ ಪರಿಭಾಷೆಯಲ್ಲಿ ಡಯಾಬಿಟಿಸ್ ನೆಫ್ರೋಪತಿ ಎಂದು ಕರೆಯುತ್ತಾರೆ.

ಈ ಸಮಸ್ಯೆಯಿಂದ ಹಲವು ವರ್ಷಗಳ ನಂತರ ಫಿಲ್ಟರಿಂಗ್ ಘಟಕಗಳು ದಪ್ಪವಾಗುತ್ತವೆ ಮತ್ತು ಗಟ್ಟಿಯಾಗುತ್ತವೆ. ಇದರಿಂದಾಗಿ ತ್ಯಾಜ್ಯವನ್ನು ಫಿಲ್ಟರ್ ಮಾಡಲು ಅವುಗಳಿಗೆ ಹೆಚ್ಚು ಸಾಮರ್ಥ್ಯ ಇರುವುದಿಲ್ಲ. ಈ ಫಿಲ್ಟರಿಂಗ್ ಘಟಕಗಳು ಅಂತಿಮವಾಗಿ ದುರ್ಬಲಗೊಂಡು ಪ್ರೋಟಿನ್ ಮೂತ್ರದ ಮೂಲಕ ಹೊರಹೋಗಲು ಪ್ರಾರಂಭಿಸುತ್ತದೆ.

ಮಧುಮೇಹ

ಮಧುಮೇಹವು ದೇಹದಲ್ಲಿ ಹಲವಾರು ಪ್ರಮುಖ ಖನಿಜಗಳ ಸಂಸ್ಕರಣೆಯ ಮೇಲೆ ಪ್ರಭಾವ ಬೀರುತ್ತದೆ. ರಕ್ತದಲ್ಲಿ ಅಧಿಕ ಸಕ್ಕರೆ ಅಂಶ ಇರುವ ಜನರು ಮೂತ್ರದ ಮೂಲಕ ಹೆಚ್ಚಿನ ಪ್ರಮಾಣದಲ್ಲಿ ಕ್ಯಾಲ್ಸಿಯಂ, ಯೂರಿಕ್ ಆಮ್ಲ ಮತ್ತು ಆಕ್ಸಲೇಟ್‌ಗಳನ್ನು ಹೊರಹಾಕುತ್ತಾರೆ. ಅದೇ ಸಮಯದಲ್ಲಿ ಅವರು ಸಾಮಾನ್ಯವಾಗಿ ಕಡಿಮೆ ಮಟ್ಟದ ಸಿಟ್ರೇಟನ್ನು ಹೊಂದಿರುತ್ತಾರೆ. ಸಿಟ್ರೇಟ್ ಕಲ್ಲುಗಳ ರಚನೆಯನ್ನು ತಡೆಯುವ ನೈಸರ್ಗಿಕ ವಸ್ತುವಾಗಿದೆ. ಇದು ಅವರನ್ನು ಮೂತ್ರಕೋಶದ ಕೊಲಿಕ್‌ಗೆ (ಮೂತ್ರಪಿಂಡದ ಕಲ್ಲಿನಿಂದ ಉಂಟಾಗುವ ತೀವ್ರವಾದ ಹೊಟ್ಟೆ ಅಥವಾ ಬೆನ್ನಿನ ನೋವು) ಕಾರಣವಾಗಬಹುದು. ಮಧುಮೇಹವನ್ನು ಸರಿಯಾಗಿ ನಿಯಂತ್ರಿಸದೇ ಹೋದರೆ ರೋಗಿಗಳು ಹೆಚ್ಚು ಹೆಚ್ಚು ಆಮ್ಲೀಯ ಮೂತ್ರವನ್ನು ವಿಸರ್ಜಿಸಬಹುದು/ಇದು ಯೂರಿಕ್ ಆಮ್ಲ ಕಲ್ಲುಗಳ ಅಪಾಯವನ್ನು ಹೆಚ್ಚಿಸುತ್ತದೆ. ರಕ್ತದಲ್ಲಿನ ಸಕ್ಕರೆ ನಿರ್ವಹಣೆಯು ಮೂತ್ರಕೋಶದ ಕಾರ್ಯ ಮತ್ತು ಒಟ್ಟಾರೆ ಮೂತ್ರದ ಆರೋಗ್ಯ ಎರಡನ್ನೂ ರಕ್ಷಿಸಲು ಉತ್ತಮ ಮಾರ್ಗಗಳಲ್ಲಿ ಒಂದಾಗಿದೆ. ಮೂತ್ರಕೋಶಗಳು ದುರ್ಬಲಗೊಂಡಂತೆ ಮೂತ್ರದಲ್ಲಿನ ಖನಿಜ ಸಮತೋಲನವು ಬದಲಾಗುತ್ತದೆ. ಕ್ಯಾಲ್ಸಿಯಂ ಮಟ್ಟ ಹೆಚ್ಚಾಗುತ್ತದೆ. ಇದು ಕ್ಯಾಲ್ಸಿಯಂ ಕಲ್ಲುಗಳು ಉಂಟಾಗುವ ಅಪಾಯವನ್ನು ಹೆಚ್ಚಿಸುತ್ತದೆ. ಮೂತ್ರಕೋಶದ ಕಲ್ಲುಗಳು ರೂಪುಗೊಂಡರೆ ಅವು ಮೂತ್ರ ವ್ಯವಸ್ಥೆಯನ್ನು ಮತ್ತಷ್ಟು ಹದಗೆಡಿಸಬಹುದು ಮತ್ತು ರಕ್ತದೊತ್ತಡವನ್ನು ಹೆಚ್ಚಿಸಬಹುದು.

ಅಧಿಕ ರಕ್ತದೊತ್ತಡ

ಅಧಿಕ ರಕ್ತದೊತ್ತಡ ಮತ್ತು ಮೂತ್ರಕೋಶದ ಕಲ್ಲುಗಳು ಆರೋಗ್ಯವನ್ನು ಕೆಡಿಸುತ್ತವೆ. ಆದ್ದರಿಂದ ರಕ್ತದೊತ್ತಡವನ್ನು ನಿಯಂತ್ರಿಸುವುದು ಪ್ರೋಟೀನುರಿಯಾ ಮತ್ತು ಕಲ್ಲುಗಳ ರಚನೆಯನ್ನು ತಡೆಗಟ್ಟುವ ಪ್ರಮುಖ ಹಂತಗಳಲ್ಲಿ ಒಂದಾಗಿದೆ. ಈ ಸಮಸ್ಯೆಯನ್ನು ತಡೆಗಟ್ಟಲು ಹೆಚ್ಚಾಗಿ ನೀರು ಕುಡಿದು ದೇಹವನ್ನು ಸುಸ್ಥಿತಿಯಲ್ಲಿಟ್ಟುಕೊಳ್ಳುವುದು (ಹೈಡ್ರೇಷನ್-ಜಲೀಕರಣ), ಉಪ್ಪಿನ ಸೇವನೆಯನ್ನು ಕಡಿಮೆ ಮಾಡುವುದು ಮತ್ತು ಕ್ಯಾಲ್ಸಿಯಂ ಮಟ್ಟದ ಮೇಲೆ ಗಮನ ಇಡುವುದು ಒಳ್ಳೆಯದು. ಇದರಿಂದ ಮೂತ್ರಕೋಶದಲ್ಲಿ ಕಲ್ಲು ಉಂಟಾಗುವುದನ್ನು ತಪ್ಪಿಸಬಹುದು.

ದೀರ್ಘಕಾಲದ ಅಧಿಕ ರಕ್ತದೊತ್ತಡವು ಮೂತ್ರಕೋಶಗಳ ಒಳಗೆ ಇರುವ ಸೂಕ್ಷ್ಮ ಅಂಗಾಂಶಗಳ ಮೇಲೆ ನಿರಂತರ ಒತ್ತಡವನ್ನುಂಟುಮಾಡುತ್ತದೆ. ಕ್ರಮೇಣ ಅವುಗಳನ್ನು ಕ್ಷೀಣಿಸುತ್ತದೆ. ಈ ನಿರಂತರ ಒತ್ತಡವು ರಕ್ತಪ್ರವಾಹದಲ್ಲಿ ಅಗತ್ಯ ಪ್ರೋಟೀನುಗಳನ್ನು ಇರುವಂತೆ ಮಾಡುವ ಶೋಧನೆಯ ತಡೆಗೋಡೆಯನ್ನು ದುರ್ಬಲಗೊಳಿಸುತ್ತದೆ.

ಈ ತಡೆಗೋಡೆ ಹಾನಿಗೊಳಗಾದ ನಂತರ ಪ್ರೋಟೀನ್ ಮೂತ್ರದಲ್ಲಿ ಸೋರಿಕೆಯಾಗಲು ಪ್ರಾರಂಭಿಸುತ್ತದೆ. ಅನಿಯಂತ್ರಿತ ಅಧಿಕ ರಕ್ತದೊತ್ತಡವು ಮೂತ್ರಕೋಶಗಳಿಗೆ ರಕ್ತದ ಹರಿವನ್ನು ನಿರ್ಬಂಧಿಸುತ್ತದೆ. ಅವುಗಳ ಆಮ್ಲಜನಕದ ಪೂರೈಕೆಯನ್ನು ಕಡಿಮೆ ಮಾಡುತ್ತದೆ ಮತ್ತು ಮತ್ತಷ್ಟು ಅಂಗಾಂಶ ಗಾಯಕ್ಕೆ ಕಾರಣವಾಗುತ್ತದೆ. ಇದು ಅಂತಿಮವಾಗಿ ಒಟ್ಟಾರೆ ಮೂತ್ರಕೋಶದ ಕಾರ್ಯವನ್ನು ದುರ್ಬಲಗೊಳಿಸುತ್ತದೆ.

ಮೂತ್ರಕೋಶಗಳ ಆರೋಗ್ಯ

ಮೂತ್ರಕೋಶಗಳ ಆರೋಗ್ಯಕ್ಕಾಗಿ ಸಾಕಷ್ಟು ನೀರು ಕುಡಿಯುವುದು ಮತ್ತು ಉತ್ತಮ ಆಹಾರ ಕ್ರಮವನ್ನು ಪಾಲಿಸುವುದು ಮುಖ್ಯ. ಚೆನ್ನಾಗಿ ನೀರು ಕುಡಿಯುವುದು ಮೂತ್ರಕೋಶಗಳು ಚೆನ್ನಾಗಿ ಕಾರ್ಯನಿರ್ವಹಿಸಲು ಸಹಾಯ ಮಾಡುತ್ತದೆ. ಜೊತೆಗೆ ಕಲ್ಲುಗಳು ಉಂಟಾಗುವುದನ್ನು ತಡೆಯುತ್ತದೆ. ಹೆಚ್ಚು ಉಪ್ಪು ಮತ್ತು ಸಕ್ಕರೆ ಇರುವ ಪದಾರ್ಥಗಳ ಸೇವನೆ ಬೇಡ. ಸಂಸ್ಕರಿಸಿದ ಆಹಾರಗಳನ್ನು ಸೇವಿಸುವುದನ್ನು ಕಡಿಮೆ ಮಾಡಬೇಕು. ಸಮತೋಲಿತ ಆಹಾರ ಸೇವನೆ ಬಹಳ ಒಳ್ಳೆಯದು. ತಾಜಾ ಹಣ್ಣುಗಳು, ತರಕಾರಿಗಳು ಮತ್ತು ಸಂಪೂರ್ಣ ಧಾನ್ಯಗಳನ್ನು ಆಹಾರದಲ್ಲಿ ಸೇರಿಸುವುದು ಒಟ್ಟಾರೆ ಮೂತ್ರಕೋಶದ ಕಾರ್ಯಕ್ಷಮತೆಯನ್ನು ಹೆಚ್ಚಿಸಿ ದೀರ್ಘಕಾಲದ ಆರೋಗ್ಯಕ್ಕೆ ಸಹಾಯಕವಾಗುತ್ತದೆ.