ಮಹೇಂದ್ರ ಸಿಂಗ್ ಧೋನಿಗಾಗಿ ಐಪಿಎಲ್ 2018 ಕಪ್ ಗೆದ್ದೇ ಗೆಲ್ತೀವಿ: ಸುರೇಶ್ ರೈನಾ

ಮುಂಬೈ: ಐಪಿಎಲ್ 2018ರ ಟೂರ್ನಿ ನಿರ್ಣಾಯಕ ಹಂತ ತಲುಪಿದ್ದು, ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿರುವಂತೆಯೇ ಇತ್ತ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಆಟಗಾರ ಸುರೇಶ್ ರೈನಾ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿಗಾಗಿ ಈ ಬಾರಿ ಕಪ್ ಗೆದ್ದೇ ಗೆಲ್ಲುತ್ತೇವೆ ಎಂದು ಹೇಳಿದ್ದಾರೆ.

ನಿಷೇಧದ ಬಳಿಕ ಕಮ್ ಬ್ಯಾಕ್ ಮಾಡಿರುವ ಚೆನ್ನೈ ತಂಡ ಇದೀಗ ಮತ್ತೆ ಫೈನಲ್ ತಲುಪಿದ್ದು, ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಮಹೇಂದ್ರ್ ಸಿಂಗ್ ಧೋನಿ ಮತ್ತೊಮ್ಮೆ ತಾವು ಯಶಸ್ವೀ ನಾಯಕ ಎಂಬುದನ್ನು ಸಾಬೀತು ಪಡಿಸಿದ್ದಾರೆ. ಇದೇ ಕಾರಣಕ್ಕೆ ತಂಡದ ಆಟಗಾರ ಸುರೇಶ್ ರೈನಾ ನಾಯತ ಧೋನಿಗಾಗಿ ಈ ಬಾರಿ ಕಪ್ ಗೆದ್ದೇ ಗೆಲ್ಲುತ್ತೇವೆ ಎಂದು ಹೇಳಿಕೆ ನೀಡಿದ್ದಾರೆ. 

ಫೈನಲ್ ಹಣಾಹಣಿಗೂ ಮುನ್ನ ಕೊನೆಯ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸುರೇಶ್ ರೈನಾ, ಧೋನಿ​ ನಾಯಕತ್ವದಲ್ಲಿ ಸಿಎಸ್​​ಕೆ, ಟೂರ್ನಿಯಲ್ಲಿ ಭರ್ಜರಿ ಪ್ರದರ್ಶನ​ ನೀಡುತ್ತಿದೆ. ಅನುಭವಿಗಳಿಂದ ಕೂಡಿರುವ ತಂಡ, ಟೂರ್ನಿಯುದ್ದಕ್ಕೂ ಸಂಘಟಿತ ಹೋರಾಟ ನಡೆಸುತ್ತಾ ಬಂದಿದೆ. ಇನ್ನು ಫೈನಲ್​ನಲ್ಲೂ ಇದೇ ಫಾರ್ಮ್​ ಮುಂದುವರೆಯಲಿದೆ. ಧೋನಿಗಾಗಿ ಈ ಬಾರಿ ಕಪ್ ಗೆದ್ದೇ ಗೆಲ್ಲುತ್ತೇವೆ ಎಂದು ಸುರೇಶ್ ರೈನಾ ಹೇಳಿದ್ದಾರೆ.

ಇನ್ನು ಐಪಿಎಲ್​ ಆರಂಭವಾಗಿದ್ದರಿಂದ ಇದುವರೆಗೂ ಸಿಎಸ್​​​ಕೆ​​​ ತಂಡವನ್ನು ಧೋನಿ, ಯಶಸ್ವಿಯಾಗಿ ಮುನ್ನಡೆಸುತ್ತಿದ್ದಾರೆ. 2 ವರ್ಷಗಳ ನಿಷೇಧದ ಅವಧಿಯನ್ನು ಹೊರತು ಪಡಿಸಿದರೆ, ಇದುವರೆಗೂ ಆಡಿರುವ 9 ಟೂರ್ನಿಗಳಲ್ಲಿ 7 ಬಾರಿ ತಂಡವನ್ನು ಫೈನಲ್​ ಹಂತಕ್ಕೇರಿಸಿದ್ದಾರೆ. ಇನ್ನು ಮುಂದಿನ ಐಪಿಎಲ್​​ನಲ್ಲಿ ಧೋನಿ​ ಆಡುವುದು ಬಹುತೇಕ ಅನುಮಾನವಾಗಿದೆ ಎಂದು ಹೇಳಲಾಗುತ್ತಿದೆ.