ವಿಶಾಖಪಟ್ಟಣಂ: ಐಪಿಎಲ್ ಪಂದ್ಯಾವಳಿ ವೇಳೆ ಯಾವುದೇ ಕೆಟ್ಟ ಹವ್ಯಾಸಗಳಿಗೆ ಬಲಿಯಾಗದಂತೆ ಮತ್ತು ಕೆಲಸದೊತ್ತಡವನ್ನು ಸಮರ್ಥವಾಗಿ ನಿಭಾಯಿಸುವಂತೆ ಟೀಂ ಇಂಡಿಯಾ ಆಟಗಾರರಿಗೆ ನಾಯಕ ವಿರಾಟ್ ಕೊಹ್ಲಿ ಎಚ್ಚರಿಕೆಯ ಸಲಹೆ ನೀಡಿದ್ದಾರೆ.
ಟೀಂ ಇಂಡಿಯಾ ಆಟಗಾರರು ವಿಶ್ವಕಪ್ ಗಿಂತ ಮೊದಲು ಐಪಿಎಲ್ ನಲ್ಲಿ ಭಾಗವಹಿಸುತ್ತಿದ್ದು, ಯಾವುದೇ ಕಾರಣಕ್ಕೂ ಐಪಿಎಲ್‌ನಲ್ಲಿ ಕೆಟ್ಟ ಹವ್ಯಾಸಗಳನ್ನು ರೂಢಿಸಿಕೊಳ್ಳಬಾರದು ಮತ್ತು ಫಿಟ್ನೆಸ್ ಬಗ್ಗೆ ಹೆಚ್ಚಿನ ಗಮನವನ್ನಿಟ್ಟುಕೊಳ್ಳುವಂತೆ ಕೊಹ್ಲಿ ಸೂಚಿಸಿದ್ದಾರೆ.
ಐಪಿಎಲ್ ಹಿನ್ನಲೆಯಲ್ಲಿ ವಿಶ್ವಕಪ್ ಸಂಭವನೀಯ ಆಟಗಾರರ ಕೆಲಸದೊತ್ತಡ ಬಗ್ಗೆ ವ್ಯಾಪಕ ಚರ್ಚೆಗಳು ನಡೆಯುತ್ತಿದೆ. ಹಾಗಾಗಿ ವಿವಿಧ ಫ್ರಾಂಚೈಸಿನಲ್ಲಿರುವ ಆಟಗಾರರು ತಮ್ಮ ಕೆಲಸದೊತ್ತಡವನ್ನು ಸಮರ್ಥವಾಗಿ ನಿಭಾಯಿಸುವಂತೆ ಹೇಳಿದ್ದಾರೆ.
ಏಕದಿನ ಮನೋಸ್ಥಿತಿಯನ್ನು ಚುಟುಕು ಪಂದ್ಯ ಕಸಿದುಕೊಳ್ಳದಂತೆ ಆಟಗಾರರು ಗಮನ ಹರಿಸಬೇಕು. ಹಾಗೆಯೇ ತಮ್ಮ ಅಭ್ಯಾಸದ ಮೇಲೆ ಹೆಚ್ಚಿನ ಗಮನ ಕೇಂದ್ರಿಸಿಕೊಳ್ಳಬೇಕು ಎಂದು ಟೀಂ ಇಂಡಿಯಾ ನಾಯಕ ಹೇಳಿದ್ದಾರೆ.
ವಿಶ್ವಕಪ್ ಹಿನ್ನಲೆಯಲ್ಲಿ ಈ ಬಾರಿಯ ಐಪಿಎಲ್ ಬೇಗನೇ ಆರಂಭವಾಗುತ್ತಿದ್ದು, ಮಾರ್ಚ್ 23ರಿಂದ ಮೇ 13ರ ವರೆಗೆ ನಡೆಯಲಿದೆ. ತದಾ ಬಳಿಕ ಮೇ30ರಂದು ವಿಶ್ವಕಪ್ ಆರಂಭವಾಗಲಿದೆ. ಭಾರತ ತನ್ನ ಮೊದಲ ಪಂದ್ಯದಲ್ಲಿ ಜೂನ್ 5ರಂದು ದಕ್ಷಿಣ ಆಫ್ರಿಕಾ ಸವಾಲನ್ನು ಎದುರಿಸಲಿದೆ.
