ಈ ಪಂದ್ಯದಲ್ಲಿ ಇಂಗ್ಲೆಂಡ್ 104 ರನ್ ಗಳಿಂದ ಭರ್ಜರಿ ಜಯ ಸಾಧಿಸಿತ್ತು. ಆದರೆ, ಈ ಪಂದ್ಯದಲ್ಲಿ ಅತ್ಯಂತ ಕುತೂಹಲ ಕೆರಳಿಸಿದ್ದು, ಬೆನ್ ಸ್ಟೋಕ್ಸ್ ಹಿಡಿದ ಕ್ಯಾಚ್! ಆದಿಲ್ ರಶೀದ್ ಬೌಲಿಂಗ್ ನಲ್ಲಿ ಆಫ್ರಿಕಾದ ಆ್ಯಂಡಿಲೆ ಫೆಹ್ಲುಕ್ವಾಯೊ ಅವರು ಸ್ವೀಪ್ ಸ್ಲಾಗ್ ಶಾಟ್ ಹೊಡೆದರು. ಈ ವೇಳೆ ಚೆಂಡು ವೇಗವಾಗಿ ಬೌಂಡರಿ ಲೈನ್ ಸಮೀಪ ಹೋಗುತ್ತಿತ್ತು. ಅಲ್ಲೇ ಇದ್ದ ಬೆನ್ ಸ್ಟೋಕ್ಸ್ ಗಾಳಿಯಲ್ಲಿ ಹಾರಿ ಒಂದೇ ಕೈಯನ್ನು ಚಾಚಿ ಹಿಡಿದ ಕ್ಯಾಚ್ ನೋಡಲು ಅದ್ಭುತವಾಗಿತ್ತು. ಇದು ಪಂದ್ಯದ ಪ್ರಮುಖ ಆಕರ್ಷಣೆಯಾಗಿತ್ತು.
