ಟೀಂ ಇಂಡಿಯಾದ ಮಾಜಿ ಉಪನಾಯಕ ಮತ್ತು ಅನುಭವಿ ಬ್ಯಾಟ್ಸ್‌ಮನ್ 37 ವರ್ಷದ ಅಜಿಂಕ್ಯ ರಹಾನೆ ಇಂಗ್ಲೆಂಡ್ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯವನ್ನು ವೀಕ್ಷಿಸಲು ಲಾರ್ಡ್ಸ್‌ನಲ್ಲಿ ಹಾಜರಿದ್ದು, ಟೆಸ್ಟ್ ಕ್ರಿಕೆಟ್ ಬಗೆಗಿನ ತಮ್ಮ ನಿರಂತರ ಉತ್ಸಾಹ ಮತ್ತು ಮತ್ತೆ ತಂಡಕ್ಕೆ ಮರಳಲು ಪ್ರಯತ್ನಿಸುತ್ತಿದ್ದರೂ ಭಾರತೀಯ ಆಯ್ಕೆದಾರರ ಮೌನದ ಬಗ್ಗೆ ಮಾತನಾಡಿದ್ದಾರೆ.
2023ರ ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿ ಭಾರತ ಪರ ಕೊನೆಯ ಬಾರಿಗೆ ಆಡಿದ್ದ ರಹಾನೆ ಅವರನ್ನು ಕೂಡಲೇ ತಂಡದಿಂದ ಕೈಬಿಡಲಾಯಿತು ಮತ್ತು ಅಂದಿನಿಂದ ದೇಶೀಯ ಕ್ರಿಕೆಟ್‌ನಲ್ಲಿ ರಹಾನೆ ಆಡುತ್ತಿದ್ದಾರೆ. ಲಾರ್ಡ್ಸ್‌ನಲ್ಲಿ 3ನೇ ದಿನದಂದು ಸ್ಕೈ ಸ್ಪೋರ್ಟ್ಸ್ ಜೊತೆಗೆ ಮಾತನಾಡಿದ ಅವರು, ರೆಡ್-ಬಾಲ್ ಸ್ವರೂಪದ ಮೇಲಿನ ತನ್ನ ಪ್ರೀತಿ ಎಂದಿನಂತೆ ಪ್ರಬಲವಾಗಿದೆ. ಆದರೆ, ಹೆಚ್ಚು ಕಟು ವಿಷಯವೆಂದರೆ, ರಾಷ್ಟ್ರೀಯ ಆಯ್ಕೆದಾರರನ್ನು ತಲುಪುವ ತನ್ನ ಪ್ರಯತ್ನಗಳಿಗೆ ಮೌನವೇ ಉತ್ತರವಾಗಿದೆ ಎಂದಿದ್ದಾರೆ.
'ನಾನಿನ್ನೂ ಟೆಸ್ಟ್ ಕ್ರಿಕೆಟ್ ಆಡಲು ಬಯಸುತ್ತೇನೆ. ನನಗೆ ಟೆಸ್ಟ್ ಕ್ರಿಕೆಟ್ ಬಗ್ಗೆ ಉತ್ಸಾಹವಿದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾನು ಆಯ್ಕೆದಾರರೊಂದಿಗೆ ಸಂಭಾಷಣೆ ನಡೆಸಲು ಪ್ರಯತ್ನಿಸಿದೆ, ಆದರೆ ನನಗೆ ಯಾವುದೇ ಪ್ರತಿಕ್ರಿಯೆ ಸಿಗಲಿಲ್ಲ. ನಾನು ಏನು ಮಾಡಬಲ್ಲೆ ಎಂದರೆ ಆಟವಾಡುವುದನ್ನು ಮುಂದುವರಿಸುವುದು. ನನಗೆ ಟೆಸ್ಟ್ ಕ್ರಿಕೆಟ್ ತುಂಬಾ ಇಷ್ಟ. ನನಗೆ ರೆಡ್ ಬಾಲ್ ಕ್ರಿಕೆಟ್ ಆಡಲು ತುಂಬಾ ಇಷ್ಟ. ಅದೊಂದು ಬತ್ತದ ಉತ್ಸಾಹ' ಎಂದು ತಿಳಿಸಿದರು.
ಅಪಾರ ಅನುಭವ ಹೊಂದಿರುವ ರಹಾನೆ ಅವರು ಭಾರತದ ಕೆಲವು ಐತಿಹಾಸಿಕ ಟೆಸ್ಟ್ ವಿಜಯಗಳಲ್ಲಿ, ವಿಶೇಷವಾಗಿ 2020–21ರ ಬಾರ್ಡರ್-ಗವಾಸ್ಕರ್ ಟ್ರೋಫಿಯಲ್ಲಿ ಆಸ್ಟ್ರೇಲಿಯಾದಲ್ಲಿ ಅಪಾರ ಕೊಡುಗೆ ನೀಡಿದ್ದಾರೆ. ಅವರು ಕೊನೆಯ ಮೂರು ಟೆಸ್ಟ್‌ಗಳಲ್ಲಿ ಭಾರತವನ್ನು ಮುನ್ನಡೆಸಿದರು. ಈ ಮೂರರಲ್ಲೂ ಭಾರತ ಅಜೇಯವಾಗಿ ಉಳಿಯಿತು.
ವಿರಾಟ್ ಕೊಹ್ಲಿ ಪಿತೃತ್ವ ರಜೆಯ ಮೇಲೆ ನಿರ್ಗಮಿಸಿದ ನಂತರ 2021 ರಲ್ಲಿ ಅವರು ಭಾರತವನ್ನು ಸರಣಿ ಗೆಲುವಿನತ್ತ ಮುನ್ನಡೆಸಿದರು. ಅವರ ಶಾಂತ ನಾಯಕತ್ವದಲ್ಲಿ, ಭಾರತ ಮೆಲ್ಬೋರ್ನ್‌ನಲ್ಲಿ ಗೆದ್ದಿತು ಮತ್ತು ಪ್ರಸಿದ್ಧ ಗಬ್ಬಾ ಕೋಟೆಯನ್ನು ಭೇದಿಸಿತು. ಅವರು ಬ್ಯಾಟಿಂಗ್‌ನಲ್ಲೂ ಕೊಡುಗೆ ನೀಡಿದರು. MCG ಯಲ್ಲಿ ಶತಕ ಸೇರಿದಂತೆ ಸರಣಿಯಲ್ಲಿ 268 ರನ್‌ಗಳನ್ನು ಗಳಿಸಿದರು.
'ನಾನು ಯಾವಾಗಲೂ ನನ್ನ ಶೈಲಿ, ಚಿಂತನೆ ಮತ್ತು ಪ್ರವೃತ್ತಿಯನ್ನು ಬೆಂಬಲಿಸಲು ಬಯಸುತ್ತೇನೆ. ಪ್ರತಿಯೊಬ್ಬ ನಾಯಕನಿಗೆ ತನ್ನದೇ ಆದ ಶೈಲಿ ಇರಬೇಕು... ನನಗೆ, ಅದು ನನ್ನ ವ್ಯಕ್ತಿತ್ವಕ್ಕೆ ಅನುಗುಣವಾಗಿರುತ್ತದೆ' ಎಂದು ಆ ಸರಣಿಯಲ್ಲಿ ಅವರ ನಾಯಕತ್ವದ ಬಗ್ಗೆ ಕೇಳಿದಾಗ ರಹಾನೆ ಹೇಳಿದರು.
ಭಾರತೀಯ ಆಯ್ಕೆದಾರರು ಯುವ ಆಟಗಾರರನ್ನು ಬೆಂಬಲಿಸುತ್ತಿರುವುದರಿಂದ ರಹಾನೆ ಅವರ ಆಯ್ಕೆ ಅಷ್ಟು ಸುಲಭವಲ್ಲ. ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಅವರ ನಿವೃತ್ತಿಯ ನಂತರ ಅವರಿಗೆ ಬಾಗಿಲು ತೆರೆಯಬಹುದಿತ್ತು. ಆದರೆ, ಇಂಗ್ಲೆಂಡ್ ಸರಣಿಗೆ ರಹಾನೆಯನ್ನು ಮತ್ತೊಮ್ಮೆ ಕಡೆಗಣಿಸಲಾಯಿತು. ಬದಲಾಗಿ, ದೇಶೀಯ ಕ್ರಿಕೆಟ್‌ನಲ್ಲಿ ರನ್ ಸ್ಕೋರಿಂಗ್‌ನಲ್ಲಿ ರಹಾನೆಗಿಂತ ಹೆಚ್ಚು ಗಳಿಸಿದ್ದ ಕರುಣ್ ನಾಯರ್ ಅವರನ್ನು ಭಾರತ ತಂಡಕ್ಕೆ ಸೇರಿಸಿಕೊಳ್ಳಲಾಯಿತು.
ರಹಾನೆಗೆ ಸಾಕಷ್ಟು ಅವಕಾಶಗಳು ಸಿಕ್ಕಿದ್ದವು. ಅವರು ಭಾರತದ ಸ್ಥಿರ ಐದನೇ ಬ್ಯಾಟ್ಸ್‌ಮನ್ ಆಗಿದ್ದರು. 2020 ರಿಂದ 2023 ರವರೆಗೆ ಅವರು 19 ಟೆಸ್ಟ್‌ಗಳನ್ನು ಆಡಿದ್ದಾರೆ. ಇದು ರೋಹಿತ್ ಶರ್ಮಾ (13) ಗಿಂತ ಹೆಚ್ಚು. ಆದಾಗ್ಯೂ, ರಹಾನೆ 24.08 ರ ಸರಾಸರಿಯಲ್ಲಿ ಕೇವಲ 819 ರನ್‌ಗಳನ್ನು ಮಾತ್ರ ಗಳಿಸಲು ಸಾಧ್ಯವಾಯಿತು.
ದೇಶೀಯ ಕ್ರಿಕೆಟ್‌ನಲ್ಲಿ ರಹಾನೆ ಮುಂಬೈ ತಂಡವನ್ನು ರಣಜಿ ಟ್ರೋಫಿ ಸೆಮಿಫೈನಲ್‌ಗೆ ಕರೆದೊಯ್ದರು. ಒಂಬತ್ತು ಪಂದ್ಯಗಳಲ್ಲಿ 467 ರನ್‌ಗಳನ್ನು ಗಳಿಸಿದರು. ರನ್‌ಗಳು ಮತ್ತು ನಾಯಕತ್ವ ಸ್ಥಿರವಾಗಿದ್ದರೂ, ಅವರು ಮತ್ತೆ ತಂಡಕ್ಕೆ ಮರಳಲು ಅವು ಸಾಕಾಗಲಿಲ್ಲ.
Advertisement
