'ತಂಡಕ್ಕೂ ಕೆಲವು ನೀತಿಗಳಿರುತ್ತವೆ': ಭಾರತದ T20I ತಂಡದಿಂದ ಸೂರ್ಯಕುಮಾರ್ ಯಾದವ್ ಕೈಬಿಟ್ಟಿದ್ದಕ್ಕೆ BCCI ವಿರುದ್ಧ ಆರ್ ಅಶ್ವಿನ್ ಆಕ್ರೋಶ

ಸೂರ್ಯಕುಮಾರ್ ಯಾದವ್ ಅವರನ್ನು ರಾಷ್ಟ್ರೀಯ ಟಿ20ಐ ತಂಡದಿಂದ ಕೈಬಿಟ್ಟಿದ್ದನ್ನು ಭಾರತದ ಮಾಜಿ ಆಫ್ ಸ್ಪಿನ್ನರ್ ಆರ್. ಅಶ್ವಿನ್ ಟೀಕಿಸಿದ್ದು, ಈ ಕ್ರಮವು ಭವಿಷ್ಯದ ಆಯ್ಕೆ ಪ್ರಕ್ರಿಯೆಗಳಿಗೆ 'ಪೂರ್ವನಿದರ್ಶನ'ವಾಗುತ್ತದೆ ಎಂದಿದ್ದಾರೆ. 2024ರಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತರಾದ ಅಶ್ವಿನ್, ಸೂರ್ಯಕುಮಾರ್ ಅವರನ್ನು ಭಾರತದ ಟಿ20ಐ ತಂಡದಿಂದ ಸಂಪೂರ್ಣವಾಗಿ ಕೈಬಿಡುವ ಬದಲು ಬ್ಯಾಟ್ಸ್‌ಮನ್ ಆಗಿಯಾದರೂ ಹೆಚ್ಚಿನ ಸಮಯ ನೀಡಬಹುದಿತ್ತು. 'ಇದು ತುಂಬಾ ಆಸಕ್ತಿದಾಯಕ ಪೂರ್ವನಿದರ್ಶನ ಎಂದು ನಾನು ಭಾವಿಸುತ್ತೇನೆ... ಒಟ್ಟಾರೆಯಾಗಿ, ಅದನ್ನು ಮಾಡಿದ ರೀತಿ, ಇಡೀ ವಿಷಯದ ಬಗ್ಗೆ ನನಗೆ ಸ್ವಲ್ಪ ಆತಂಕವಿದೆ' ಎಂದು ಅಶ್ವಿನ್ ಇಎಸ್‌ಪಿಎನ್‌ಕ್ರಿಕ್‌ಇನ್‌ಫೋದ ವಿಡಿಯೋ ಕಾರ್ಯಕ್ರಮದಲ್ಲಿ ಹೇಳಿದರು.

'ಆಯ್ಕೆಯ ವಿಚಾರದಲ್ಲಿ ಇದು ಸಾಕಷ್ಟು ಮಹತ್ವದ ದಿನ. ಏಕೆಂದರೆ, ಮುಂದಿನ ಬಾರಿ ಅಂತಹ ವಿಷಯ ಬಂದಾಗ ಇದನ್ನು ಒಂದು ರೀತಿಯ ಪೂರ್ವನಿದರ್ಶನವಾಗಿ ತೆಗೆದುಕೊಳ್ಳಲಾಗುತ್ತದೆ' ಎಂದರು.

'... ನಾನು ಸೂರ್ಯ ಅವರ ಸ್ಥಾನದಲ್ಲಿ ನನ್ನನ್ನು ಇರಿಸಿಕೊಂಡು ಅದರ ಬಗ್ಗೆ ಯೋಚಿಸುತ್ತಿದ್ದೇನೆ. ಖಂಡಿತ, ಕಳೆದ 18 ತಿಂಗಳು ಅಥವಾ 15 ತಿಂಗಳುಗಳಲ್ಲಿ ನನ್ನ ಬ್ಯಾಟಿಂಗ್ ಫಾರ್ಮ್ ನಿರಾಸೆಗೊಳಿಸಿದೆ ಅಥವಾ ಅದು ಏನೇ ಇರಲಿ. ಅವರು ಇರಬಹುದಾದ ಅತ್ಯುತ್ತಮ ಫಾರ್ಮ್‌ನಲ್ಲಿ ಇರಲಿಲ್ಲ. ಆದರೆ, ಅವರು ದೇಶಕ್ಕಾಗಿ ಟಿ20 ವಿಶ್ವಕಪ್ ಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ. ಟಿ20 ವಿಶ್ವಕಪ್‌ನಲ್ಲಿಯೂ ಸೂರ್ಯಕುಮಾರ್ ಬ್ಯಾಟ್ಸ್‌ಮನ್ ಆಗಿ ನೀರಸ ಪ್ರದರ್ಶನ ನೀಡಿದ್ದರು. 136.72 ಸ್ಟ್ರೈಕ್ ರೇಟ್‌ನಲ್ಲಿ 242 ರನ್ ಗಳಿಸಿದರು ಮತ್ತು ನಂತರದ ಐಪಿಎಲ್‌ನಲ್ಲಿ ಮುಂಬೈ ಇಂಡಿಯನ್ಸ್ ಪರ 147.54 ಸ್ಟ್ರೈಕ್ ರೇಟ್‌ನಲ್ಲಿ 270 ರನ್ ಗಳಿಸವ ಮೂಲಕ ಫಾರ್ಮ್ ತಲುಪಲು ಸಾಧ್ಯವಾಗಲಿಲ್ಲ' ಎಂದು ಹೇಳಿದರು.

'ಒಬ್ಬ ಬ್ಯಾಟ್ಸ್‌ಮನ್ ಆಗಿ ಉತ್ತಮ ಪ್ರದರ್ಶನ ನೀಡುವಲ್ಲಿ ಎಡವಿರಬಹುದು. ಆದರೆ, ಖಂಡಿತವಾಗಿಯೂ, ತಂಡದಲ್ಲಿರುವ ಎಲ್ಲರಂತೆ - ಕೋಚ್, ಉಪನಾಯಕ, ಬ್ಯಾಟ್ಸ್‌ಮನ್ ಮತ್ತು ಬೌಲರ್ ಅತ್ಯುತ್ತಮ ಪ್ರದರ್ಶನ ನೀಡಿದಂತೆಯೇ ನಾಯಕನಾಗಿ ಅವರು (ಸೂರ್ಯಕುಮಾರ್ ಯಾದವ್) ಕೂಡ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ, ಅಲ್ಲವೇ? ಅವರು ತಮ್ಮ ಪಾತ್ರವನ್ನು ನಿರ್ವಹಿಸಿದ್ದಾರೆ' ಎಂದು ಅಶ್ವಿನ್ ಹೇಳಿದರು.

'ನಾವು ನಾಯಕರಾಗಿದ್ದ ಇತರ ದೊಡ್ಡ ದಿಗ್ಗಜರ ವಿಚಾರವನ್ನು ನೋಡೋಣವೇ? ಟಿ20 ವಿಶ್ವಕಪ್ ಗೆದ್ದ ನಾಯಕನನ್ನು ಯಾವುದೇ ಅಂತಿಮ ಸೂಚನೆ ಇಲ್ಲದೆ ಹೊರಗಿಟ್ಟ ಉದಾಹರಣೆ ಇದೆಯೇ? ಈ ಬಗ್ಗೆ ಮಾತುಕತೆ ನಡೆದಿದೆ ಎಂದು ನನಗೆ ಖಚಿತವಾಗಿದೆ' ಎಂದು ಭಾರತದ ಪರ 106 ಟೆಸ್ಟ್, 116 ಏಕದಿನ ಮತ್ತು 65 ಟಿ20 ಪಂದ್ಯಗಳನ್ನು ಆಡಿರುವ 39 ವರ್ಷದ ಅಶ್ವಿನ್ ಹೇಳಿದರು. ಅವರು ಕ್ರಮವಾಗಿ 537, 156 ಮತ್ತು 72 ವಿಕೆಟ್‌ಗಳನ್ನು ಪಡೆದಿದ್ದಾರೆ.

ಎರಡು ವರ್ಷಗಳಿಗೂ ಹೆಚ್ಚು ಕಾಲ ಭಾರತ ಪರ ಟಿ20ಐ ಆಡದಿದ್ದರೂ, ರಾಷ್ಟ್ರೀಯ ಆಯ್ಕೆದಾರರು ಶನಿವಾರ ಶ್ರೇಯಸ್ ಅಯ್ಯರ್ ಅವರನ್ನು ಸೂರ್ಯಕುಮಾರ್ ಯಾದವ್ ಅವರ ಉತ್ತರಾಧಿಕಾರಿಯಾಗಿ ನೇಮಿಸಿದರು. ಆದಾಗ್ಯೂ, ಅಯ್ಯರ್ ಐಪಿಎಲ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದರು. 2024ರಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ತಂಡವನ್ನು ಪ್ರಶಸ್ತಿಗೆ ಮುನ್ನಡೆಸಿದ ನಂತರ 2025 ರಲ್ಲಿ ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್) ತಂಡವನ್ನು ಫೈನಲ್‌ಗೆ ಮುನ್ನಡೆಸಿದರು.

'ಇತ್ತೀಚೆಗೆ, ಟಿ20 ತಂಡಕ್ಕೆ ಸೇರಲು ಶ್ರೇಯಸ್ ಅಯ್ಯರ್ ಅರ್ಹರೇ ಎಂಬುದರ ಕುರಿತು ನಾವು ಮಾತನಾಡಿದ್ದೇವೆ. ನಾನು ಅದಕ್ಕೆ ಸಂಪೂರ್ಣವಾಗಿ ಒಪ್ಪುತ್ತೇನೆ. ಆದರೆ, ನಾನು ಮತ್ತೊಮ್ಮೆ ಆಶ್ಚರ್ಯ ಪಡುತ್ತಿದ್ದೇನೆ... ಟಿ20 ವಿಶ್ವಕಪ್ ಗೆದ್ದ ಆ ತಂಡದ ಇತರ 14 ಸದಸ್ಯರಲ್ಲಿ ನಾನೂ ಒಬ್ಬನಾಗಿದ್ದರೆ, 'ಹೇ, ನಾವು ಸ್ವಲ್ಪ ಸಮಯದಿಂದ ಇಲ್ಲಿದ್ದೇವೆ. ನಾಯಕನ ಸ್ಥಾನವನ್ನು ಪಡೆಯಲು ನಾವು ಸಾಕಷ್ಟು ಮಾಡಿಲ್ಲವೇ?' ಎಂದು ಕೇಳುತ್ತಿದ್ದೆ ಎಂದರು.

'ಶ್ರೇಯಸ್‌ಗೆ ಅನುಕೂಲಕರವಾಗಿ ಕೆಲಸ ಮಾಡಿದ ಒಂದು ವಿಷಯವೆಂದರೆ ಅವರು ಕೆಕೆಆರ್‌ಗೆ ನಾಯಕನಾಗಿ ಐಪಿಎಲ್ ಗೆದ್ದಿದ್ದಾರೆ. ಅವರು ಐಪಿಎಲ್‌ನಲ್ಲಿ ಅದ್ಭುತ ನಾಯಕರಾಗಿದ್ದಾರೆ ಎಂಬ ಅಂಶಕ್ಕೆ ನಾನು ಯಾವುದೇ ಕಪ್ಪು ಚುಕ್ಕೆ ಹಾಕುವುದಿಲ್ಲ. ಅವರು ಸಾಕಷ್ಟು ತಂತ್ರಗಳನ್ನು ಸರಿಯಾಗಿ ಹೊಂದಿದ್ದಾರೆ. ಆದರೆ, ಹಾಗೆ ಮಾಡುವಾಗ ತಂಡಕ್ಕೂ ಕೆಲವು ನೀತಿಗಳು ಇರುತ್ತವೆ. ಉಪನಾಯಕನಾಗಿ ಅಕ್ಷರ್ ಪಟೇಲ್ ದೊಡ್ಡ ಆಯ್ಕೆಯಾಗಿದ್ದರು. ಉಪನಾಯಕ ಮುಂದಿನ ನಾಯಕನಾಗಲು ಸಾಧ್ಯವಾಗದಿದ್ದರೆ, ನಾವು ಆ ರೀತಿಯ ವಿಷಯಗಳನ್ನು ಪ್ರಶ್ನಿಸುತ್ತಾ ಮತ್ತೆ ಮತ್ತೆ ಹಿಂದಕ್ಕೆ ಹೋಗುತ್ತೇವೆ' ಎಂದು ತಿಳಿಸಿದರು.