'ನಾನು ಅದನ್ನು ಮುಗಿಸಿದ್ದೇನೆ': ಭವಿಷ್ಯದ ಕುರಿತಾದ ಪ್ರಶ್ನೆಗೆ ಸ್ಪಷ್ಟನೆ ನೀಡಿದ ಟೀಂ ಇಂಡಿಯಾ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ!

ಟೆಸ್ಟ್ ಕ್ರಿಕೆಟ್‌ಗೆ ಮರಳುವ ಯಾವುದೇ ಸಾಧ್ಯತೆಯನ್ನು ಭಾರತದ ಬ್ಯಾಟಿಂಗ್ ಐಕಾನ್ ವಿರಾಟ್ ಕೊಹ್ಲಿ ತಳ್ಳಿಹಾಕಿದ್ದು, 'ಅದರೊಂದಿಗೆ ಮುಗಿದಿದೆ' ಎಂದು ಹೇಳಿದ್ದಾರೆ. ವಿರಾಟ್ ಭಾನುವಾರ ರಾಷ್ಟ್ರ ರಾಜಧಾನಿಯಲ್ಲಿ ನಡೆದ ಸ್ಪೋರ್ಟ್ಸ್‌ವೇರ್ ಬ್ರಾಂಡ್ ಒನ್8 ಲಾಂಚ್ ಸಮಾರಂಭದಲ್ಲಿ ಮಾತನಾಡುತ್ತಿದ್ದರು. ಕೊಹ್ಲಿ ಕೂಡ ಇದರ ಸಹ-ಸಂಸ್ಥಾಪಕರಾಗಿದ್ದಾರೆ. ಬ್ರ್ಯಾಂಡ್‌ನ ಒಂದು ಶೂ ಬೆಲೆ 9,230 ರೂಪಾಯಿ ಆಗಿದ್ದು, ಅವರ ಟೆಸ್ಟ್ ರನ್‌ಗಳಷ್ಟೇ ಎಂದು ನಿರೂಪಕ ಮತ್ತು ಹಾಸ್ಯನಟ ಡ್ಯಾನಿಶ್ ಸೇಠ್ ಹೇಳಿದರು. 37 ವರ್ಷದ ಆಟಗಾರನನ್ನು ಹೆಚ್ಚಿನ ರನ್ ಗಳಿಸಲು ಮತ್ತು ಐಟಂನ ಬೆಲೆಯನ್ನು ಹೆಚ್ಚಿಸಲು ಮತ್ತೆ ಟೆಸ್ಟ್ ಕ್ರಿಕೆಟ್‌ಗೆ ಮರಳಲು ಬಯಸುತ್ತೀರಾ ಎಂದು ಕೇಳಿದರು. ಅದಕ್ಕೆ ವಿರಾಟ್, 'ನಾನು ಕಡಿಮೆ ಮಾರಾಟ ಮಾಡಲು ಬಯಸುತ್ತೇನೆ, ಐ ಆ್ಯಮ್ ಡನ್ ವಿತ್ ಇಟ್', ಧನ್ಯವಾದಗಳು ಎಂದು ಹೇಳಿದರು.

ಕಳೆದ ವರ್ಷ ಮೇ ತಿಂಗಳಲ್ಲಿ ಕೊಹ್ಲಿ ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತಿ ಘೋಷಿಸಿದರು. ಈ ಮೂಲಕ ತಮ್ಮ 14 ವರ್ಷಗಳ ವೃತ್ತಿಜೀವನಕ್ಕೆ ಅಂತ್ಯ ಹಾಡಿದರು.

ತಮ್ಮ ಟೆಸ್ಟ್ ವೃತ್ತಿಜೀವನದಲ್ಲಿ, 36 ವರ್ಷದ ಕೊಹ್ಲಿ 123 ಪಂದ್ಯಗಳನ್ನು ಆಡಿದ್ದಾರೆ. 46.85ರ ಸರಾಸರಿಯಲ್ಲಿ 9,230 ರನ್ ಗಳಿಸಿದ್ದಾರೆ. 210 ಇನಿಂಗ್ಸ್‌ಗಳಲ್ಲಿ 30 ಶತಕಗಳು ಮತ್ತು 31 ಅರ್ಧಶತಕಗಳು ಮತ್ತು 254* ಅವರ ಅತ್ಯುತ್ತಮ ಸ್ಕೋರ್ ಆಗಿದೆ. ಅವರು ಸಚಿನ್ ತೆಂಡೂಲ್ಕರ್ (15,921 ರನ್‌ಗಳು), ರಾಹುಲ್ ದ್ರಾವಿಡ್ (13,265 ರನ್‌ಗಳು) ಮತ್ತು ಸುನೀಲ್ ಗವಾಸ್ಕರ್ (10,122 ರನ್‌ಗಳು) ನಂತರ ಅತಿ ಹೆಚ್ಚು ರನ್ ಗಳಿಸಿದ ಭಾರತದ ನಾಲ್ಕನೇ ಆಟಗಾರರಾಗಿದ್ದಾರೆ.

2016 ಮತ್ತು 2019ರ ನಡುವೆ, ವಿರಾಟ್ ಟೆಸ್ಟ್ ಕ್ರಿಕೆಟ್‌ನ ಅತ್ಯಂತ ಬಲಿಷ್ಠ ಬ್ಯಾಟಿಂಗ್ ಪ್ರೈಮ್‌ಗಳಲ್ಲಿ ಒಬ್ಬರಾಗಿದ್ದರು. 43 ಟೆಸ್ಟ್‌ಗಳಲ್ಲಿ 66.79 ಸರಾಸರಿಯಲ್ಲಿ 4,208 ರನ್ ಗಳಿಸಿದ್ದಾರೆ. 69 ಇನಿಂಗ್ಸ್‌ಗಳಲ್ಲಿ 16 ಶತಕಗಳು ಮತ್ತು 10 ಅರ್ಧಶತಕಗಳು ಮತ್ತು 254* ಅವರ ಅತ್ಯುತ್ತಮ ಸ್ಕೋರ್ ಆಗಿದೆ. ಇದರಲ್ಲಿ ಏಳು ದ್ವಿಶತಕಗಳು ಸೇರಿವೆ, ಇದು ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಒಬ್ಬ ನಾಯಕ ಗಳಿಸಿದ ಅತಿ ಹೆಚ್ಚು.

2014ರಲ್ಲಿ ಆಸ್ಟ್ರೇಲಿಯಾ ಪ್ರವಾಸದ ಸಮಯದಲ್ಲಿ ಗಾಯಗೊಂಡ ಎಂಎಸ್ ಧೋನಿ ಅನುಪಸ್ಥಿತಿಯಲ್ಲಿ ಅವರು ಮೊದಲ ಬಾರಿಗೆ ನಾಯಕತ್ವ ವಹಿಸಿಕೊಂಡಾಗಿನಿಂದ, ಅವರು 68 ಪಂದ್ಯಗಳಲ್ಲಿ 40 ಗೆಲುವುಗಳೊಂದಿಗೆ ಭಾರತದ ಅತ್ಯಂತ ಯಶಸ್ವಿ ಟೆಸ್ಟ್ ನಾಯಕರಾಗಿದ್ದರು.

ದ್ವಾರಕಾದಲ್ಲಿ ಕಿಕ್ಕಿರಿದ ಜನಸಮೂಹದ ಮುಂದೆ ಮಾತನಾಡುತ್ತಾ ವಿರಾಟ್, ದೆಹಲಿಯಲ್ಲಿ ಕ್ರಿಕೆಟಿಗನಾಗಿ ತಮ್ಮ ಪ್ರಯಾಣ ಹೇಗೆ ಪ್ರಾರಂಭವಾಯಿತು ಮತ್ತು ಈ ಬ್ರ್ಯಾಂಡ್ ಅನ್ನು ಇಲ್ಲಿ ಲಾಂಚ್ ಮಾಡುತ್ತಿರುವುದಕ್ಕೆ ಸಂತೋಷ ವ್ಯಕ್ತಪಡಿಸಿದರು.

'ದೆಹಲಿ ನಾನು ಎಲ್ಲವನ್ನೂ ಆರಂಭಿಸಿದ ಸ್ಥಳ. ನಾನು ದೆಹಲಿಯಲ್ಲಿ ಹುಟ್ಟಿದ್ದೇನೆ, ನನ್ನ ಕ್ರಿಕೆಟ್ ಪ್ರಯಾಣ ದೆಹಲಿಯಲ್ಲಿ ಪ್ರಾರಂಭವಾಯಿತು ಮತ್ತು ದೆಹಲಿ ಯಾವಾಗಲೂ ನನ್ನ ಒಂದು ಭಾಗವಾಗಿ ಉಳಿಯುತ್ತದೆ. ಹಾಗಾಗಿ, ಹಲವು ವರ್ಷಗಳ ನಂತರ ದೆಹಲಿಯಲ್ಲಿ One8 ಅನ್ನು ಪ್ರಾರಂಭಿಸಲು ಸಾಧ್ಯವಾಗುವುದು, ಸಹ-ಸಂಸ್ಥಾಪಕನಾಗಿರುವುದು, ನಾನು ಯಾವಾಗಲೂ ಕಂಡಿದ್ದ ಕನಸು ನನಸಾಗುವುದು ಉತ್ತಮ ಸಂಗತಿ. ಅದು ವಾಸ್ತವವಾಗುತ್ತದೆ ಎಂದು ನನಗೆ ಖಚಿತವಿರಲಿಲ್ಲ, ಆದರೆ ಹಲವು ವರ್ಷಗಳಿಂದ ನಿಮ್ಮೆಲ್ಲ ಅಭಿಮಾನಿಗಳ ಪ್ರೀತಿಯೇ ನಮ್ಮನ್ನು ಈ ಕ್ಷಣಕ್ಕೆ ಕರೆತಂದಿದೆ' ಎಂದು ಅವರು ಹೇಳಿದರು.