ಶ್ರೀಲಂಕಾದ ಮಾಜಿ ನಾಯಕ ಸನತ್ ಜಯಸೂರ್ಯ ಅವರು ಯುವ ಬ್ಯಾಟಿಂಗ್ ಪ್ರತಿಭೆ ವೈಭವ್ ಸೂರ್ಯವಂಶಿ ಅವರನ್ನು 'ವಿಭಿನ್ನ ರೀತಿಯ ಪ್ರತಿಭೆ' ಎಂದು ಬಣ್ಣಿಸಿದರಾದರೂ, ಅವರನ್ನು ಭಾರತದ ಆಡುವ ಬಳಗಕ್ಕೆ (ಪ್ಲೇಯಿಂಗ್ 11) ತರಾತುರಿಯಲ್ಲಿ ಸೇರಿಸದಂತೆ ಸಲಹೆ ನೀಡಿದರು. ಅಫ್ಘಾನಿಸ್ತಾನ ವಿರುದ್ಧದ ಇತ್ತೀಚಿನ ಮೂರು ಪಂದ್ಯಗಳ ಟಿ20 ಸರಣಿಗಾಗಿ ಸೂರ್ಯವಂಶಿ ಭಾರತದ ತಂಡದಲ್ಲಿದ್ದರು. ಆದರೆ, ತಂಡದ ಆಡಳಿತ ಮಂಡಳಿಯು ಸಂಜು ಸ್ಯಾಮ್ಸನ್ ಮತ್ತು ಅಭಿಷೇಕ್ ಶರ್ಮಾ ಅವರನ್ನೇ ಆರಂಭಿಕ ಜೋಡಿಯಾಗಿ ಮುಂದುವರಿಸಿತು.
'ಅವನೊಬ್ಬ ವಿಭಿನ್ನ ರೀತಿಯ ಪ್ರತಿಭೆ. ಅವನು ಭಾರತದ ಭವಿಷ್ಯ ಎಂದು ನಾನು ಭಾವಿಸುತ್ತೇನೆ. ಅವನಿಗೆ ಸಾಕಷ್ಟು ಸಮಯವಿದೆ. ಆದ್ದರಿಂದ, ಅವನಿಗೆ ಉತ್ತಮ ಪ್ರದರ್ಶನ ನೀಡಲು ಅವಕಾಶ ನೀಡಿ; ಖಂಡಿತವಾಗಿಯೂ ಆತ ಉತ್ತಮವಾಗಿ ಆಡುತ್ತಾನೆ' ಎಂದು 'ಕಾರ್ಪೊರೇಟ್ ವರ್ಲ್ಡ್ ಕಪ್' ಉದ್ಘಾಟನಾ ಸಮಾರಂಭದ ವೇಳೆ ಜಯಸೂರ್ಯ ಸುದ್ದಿಸಂಸ್ಥೆ ಪಿಟಿಐಗೆ ತಿಳಿಸಿದರು.
ಶ್ರೀಲಂಕಾ ಪರ 1996ರ ವಿಶ್ವಕಪ್ನಲ್ಲಿ ಮಿಂಚಿದ ಆಟಗಾರ, 'ಅವಕಾಶಗಳು ಖಂಡಿತವಾಗಿಯೂ ಸಿಗುತ್ತವೆ. ಅವರು ಯಾವ ಸ್ಥಾನದಲ್ಲಿ ಆಡುತ್ತಾರೆ ಎಂದು ಈಗಲೇ ಹೇಳಲಾಗುವುದಿಲ್ಲ, ಅದು ಸಂದರ್ಭವನ್ನು ಅವಲಂಬಿಸಿರುತ್ತದೆ. ಆದರೆ ಅವಕಾಶ ಸಿಕ್ಕಾಗ ಅವರು ಅದನ್ನು ಖಂಡಿತವಾಗಿಯೂ ಬಳಸಿಕೊಳ್ಳುತ್ತಾರೆ. ಹಾಗಾಗಿ, ಕಾದು ನೋಡೋಣ' ಎಂದರು.
'ಆಟಗಾರರ ಆಯ್ಕೆ ಮತ್ತು ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆ ನಾನು ಪ್ರತಿಕ್ರಿಯಿಸಲಾರೆ. ಆದರೆ, ಅವರು ಅತ್ಯಂತ ಪ್ರತಿಭಾವಂತರು ಎಂದು ನಾನು ಭಾವಿಸುತ್ತೇನೆ. ಈ ಹಿನ್ನೆಲೆಯಲ್ಲಿ, ಅಭಿಷೇಕ್ ಮತ್ತು ಸ್ಯಾಮ್ಸನ್ ತಮ್ಮ ಉತ್ತಮ ಪ್ರದರ್ಶನವನ್ನು ಮುಂದುವರಿಸಬೇಕು' ಎಂದರು.
'ಪ್ರತಿಯೊಬ್ಬ ಕ್ರಿಕೆಟಿಗನೂ ತನ್ನದೇ ಆದ ಪ್ರತಿಭೆಯನ್ನು ಹೊಂದಿರುತ್ತಾನೆ ಹಾಗೂ ಅಭ್ಯಾಸ ಹಾಗೂ ತರಬೇತಿಯಲ್ಲಿ ಕಠಿಣ ಪರಿಶ್ರಮ ಪಡುತ್ತಾನೆ. ಭಾರತದಲ್ಲಿ ಅವರ ಸ್ಥಾನವನ್ನು ತುಂಬಲು ಮತ್ತು ಉತ್ತಮ ಪ್ರದರ್ಶನ ನೀಡಲು ಸದಾ ಆಟಗಾರರು ಸಿದ್ಧರಿರುತ್ತಾರೆ. ಇಲ್ಲಿ ಪೈಪೋಟಿ ಅಷ್ಟೊಂದು ತೀವ್ರವಾಗಿರುತ್ತದೆ' ಎಂದು ಕ್ರಿಕೆಟ್ನ ಮೂರೂ ಮಾದರಿಗಳಲ್ಲಿ ಭಾರತದ ಗುಣಮಟ್ಟವನ್ನು 57 ವರ್ಷದ ಮಾಜಿ ಆಟಗಾರ ಶ್ಲಾಘಿಸಿದರು.
'ಭಾರತವು ಉನ್ನತ ಮಟ್ಟದ ಕ್ರಿಕೆಟ್ ಅನ್ನು ಹೊಂದಿದೆ. ಅವರು ಏಕದಿನ (ODI), ಟಿ20 ಮತ್ತು ಟೆಸ್ಟ್ ಪಂದ್ಯಗಳೆಲ್ಲವನ್ನೂ ಆಡುತ್ತಾರೆ. ಕ್ರಿಕೆಟ್ನ ಈ ಮೂರೂ ಮಾದರಿಗಳಲ್ಲಿ ಆಡುವುದು ಸುಲಭದ ಮಾತಲ್ಲ. ಭಾರತದಲ್ಲಿ ದೇಶಕ್ಕಾಗಿ ಆಡುವ ಬಗ್ಗೆ ಅತ್ಯುನ್ನತ ಮಟ್ಟದ ಉತ್ಸಾಹವಿದೆ. ಅದಕ್ಕಾಗಿಯೇ ಹೆಚ್ಚಿನ ಆಟಗಾರರು ಉತ್ತಮ ಪ್ರದರ್ಶನ ನೀಡುತ್ತಿದ್ದಾರೆ ಮತ್ತು ದೇಶವನ್ನು ಪ್ರತಿನಿಧಿಸಲು ಬಯಸುತ್ತಿದ್ದಾರೆ' ಎಂದು ಜಯಸೂರ್ಯ ಹೇಳಿದರು.
ಕ್ರೀಡಾ ಕ್ಷೇತ್ರದಲ್ಲಿ ಕಾರ್ಪೊರೇಟ್ ಉಪಸ್ಥಿತಿಯ ಹೆಚ್ಚುತ್ತಿರುವ ಮಹತ್ವ ಹಾಗೂ 'ಕಾರ್ಪೊರೇಟ್ ಕ್ರಿಕೆಟ್ ವಿಶ್ವಕಪ್'ನ ಅಗತ್ಯವನ್ನು ಒತ್ತಿ ಹೇಳಿದ ಜಯಸೂರ್ಯ, ಭಾರತದಾದ್ಯಂತ ವಿವಿಧ ನಗರಗಳಲ್ಲಿ ಆಡುವಾಗ, ಕಾರ್ಪೊರೇಟ್ ವಲಯದ ಆಟಗಾರರು ಸಿಗುತ್ತಾರೆ; ಇವರು ಉತ್ತಮ ಪ್ರದರ್ಶನ ನೀಡಲು ಹಾಗೂ ತಾವು ದೇಶವನ್ನು ಪ್ರತಿನಿಧಿಸಲು ಸಮರ್ಥರು ಎಂಬುದನ್ನು ಸಾಬೀತುಪಡಿಸಲು ಬಯಸುವ ಅವಕಾಶವನ್ನು ಹೊಂದಿರುತ್ತಾರೆ. ಐಪಿಎಲ್ ನಲ್ಲಿ ಅವಕಾಶ ಸಿಗದ ಅನೇಕ ಆಟಗಾರರಿರುತ್ತಾರೆ, ಅವರಿಗೆ ಇಂತಹ ಪಂದ್ಯಾವಳಿಗಳು ಅವಕಾಶಗಳನ್ನು ಒದಗಿಸುತ್ತವೆ' ಎಂದು ತಿಳಿಸಿದರು.
'ಹಾಗಾಗಿ, ಕಾರ್ಪೊರೇಟ್ ವಲಯದಲ್ಲಿರುವ ಹಾಗೂ ಕ್ಲಬ್, ಇತರ ಹಂತಗಳು ಅಥವಾ ರಾಜ್ಯ ಮಟ್ಟದಲ್ಲಿ ಆಡುವ ಅವಕಾಶ ಸಿಗದ ಆಟಗಾರರಿಗೆ ಇಲ್ಲಿ ಬಂದು ಆಡುವ ಅವಕಾಶ ಸಿಗುತ್ತದೆ. ಆದ್ದರಿಂದಲೇ, ಇದು ಭಾರತೀಯ ಕ್ರಿಕೆಟ್ಗೆ ಒಳ್ಳೆಯದಾಗಲಿದೆ ಎಂದು ನಾನು ಭಾವಿಸುತ್ತೇನೆ' ಎಂದರು.
