ನಸುಕಿನ ಜಾವ 2 ಗಂಟೆಗೆ ಮಳೆ; 4 ಗಂಟೆಗೆ ಪ್ರವಾಹ

ಬೆಂಗಳೂರು: ಬೆಂಗಳೂರು ನಗರದ ಹಲವು ಪ್ರದೇಶಗಳು ನಿನ್ನೆ ಅಕ್ಷರಶಃ ನೆರೆ ಪೀಡಿತವಾಗಿತ್ತು. ನಿನ್ನೆ ಬೆಳಗ್ಗಿನ ಜಾವದಲ್ಲಿ ದಕ್ಷಿಣ ಬೆಂಗಳೂರಿನ ಸುಮಾರು 500 ಕುಟುಂಬಗಳು ಪ್ರವಾಹದಲ್ಲಿ ಸಿಲುಕಿ ಹಾಕಿಕೊಂಡಿದ್ದರು.

ರಸ್ತೆಯಿಂದ 4 ಅಡಿಯವರೆಗೆ ನೀರು ಏರಿಕೆಯಾಗಿದ್ದು, ಕೋಡಿಚಿಕ್ಕನಹಳ್ಳಿ, ಹುಳಿಮಾವು, ಅನುಗ್ರಹ ಲೇ ಔಟ್, ದಿಯೊ ಎನ್ ಕ್ಲೇವ್, ಅಕ್ಷಯ್ ನಗರ್, ಹೆಚ್ ಎಸ್ ಆರ್ ಲೇ ಔಟ್ ಮೊದಲಾದ ಕಡೆಗಳಲ್ಲಿ ಮನೆಯೊಳಗೆ ನೀರು ನುಗ್ಗಿವೆ. ಬಿಬಿಎಂಪಿ ಸಿಬ್ಬಂದಿಯೊಂದಿಗೆ ಅಗ್ನಿಶಾಮಕ ದಳದವರು ದೋಣಿಗಳ ಸಹಾಯದಿಂದ 600ಕ್ಕೂ ಹೆಚ್ಚು ಮಂದಿಯನ್ನು ರಕ್ಷಿಸಿದರು.

ನಿನ್ನೆ ಮಧ್ಯರಾತ್ರಿ ಕಳೆದು ನಸುಕಿನ ಜಾವ 2 ಗಂಟೆಗೆ ಸುರಿಯಲು ಆರಂಭವಾದ ಮಳೆ ಮಧ್ಯಾಹ್ನದವೆರೆಗೂ ಬೀಳುತ್ತಿತ್ತು. ಬೆಳಗ್ಗೆ ಎದ್ದು ನೋಡುವಾಗ ಮನೆ ಮುಂದೆ ಪ್ರವಾಹ ಉಂಟಾಗಿದ್ದನ್ನು ನೋಡಿ ಜನರು ಆತಂಕಕ್ಕೀಡಾದರು. 

''ನಾನು ನಸುಕಿನ ಜಾವ 2 ಗಂಟೆಗೆ ಎದ್ದಾಗ ಹೊರಗೆ ಮಳೆ ಸುರಿಯುತ್ತಿತ್ತು. 4 ಗಂಟೆಯ ಹೊತ್ತಿಗೆ ಪ್ರವಾಹ ಉಂಟಾಗಿ ಕೆಲವರ ಮನೆಯೊಳಗೆ ನೀರು ನುಗ್ಗಿತು. ನಾನು ಸಹಾಯಕ್ಕಾಗಿ ಅಗ್ನಿಶಾಮಕ ದಳದವರಿಗೆ ಫೋನ್ ಮಾಡಿದೆ. ನಮ್ಮ ಮನೆ ತಗ್ಗು ಪ್ರದೇಶದಲ್ಲಿದೆ. ನೀರು ತುಂಬಿದ್ದರಿಂದ ನನ್ನ ಪೋಷಕರೊಂದಿಗೆ ಮಹಡಿಗೆ ಹೋಗಿ ರಕ್ಷಣಾ ತಂಡ ಬರುವವರೆಗೂ ಕಾದು ಕುಳಿತೆವು ಎನ್ನುತ್ತಾರೆ ಟೆಲಿಕಾಂ ಸಲಹೆಗಾರ ದಿಯೊ ಎನ್ ಕ್ಲೇವ್ ನಲ್ಲಿ ವಾಸಿಸುತ್ತಿರುವ ಗುರು ಪ್ರಸಾದ್. 

ಕೋಡಿಚಿಕ್ಕನಹಳ್ಳಿಯಲ್ಲಿ ಬಹುರಾಷ್ಟ್ರೀಯ ಕಂಪೆನಿಯೊಂದರಲ್ಲಿ ಕೆಲಸ ಮಾಡುತ್ತಿರುವ ಅನೂಪ್, ನೀರು ನೆಲಮಾಳಿಗೆ ಮತ್ತು ತಮ್ಮ ಕಾರಿನೊಳಗೆ ಕೂಡ ಪ್ರವೇಶಿಸಿತು ಎನ್ನುತ್ತಾರೆ.

ನನ್ನ ಕಾರನ್ನು ಹೊರತೆಗೆಯಲು ಸಾಧ್ಯವಾಗಲಿಲ್ಲ. ಮನೆಯಲ್ಲಿ ಕೂಡ ವಿದ್ಯುತ್ ಇರಲಿಲ್ಲ ಎನ್ನುತ್ತಾರೆ.

ಬೆಳಗ್ಗೆ 6 ಗಂಟೆ ಹೊತ್ತಿಗೆ ಅಗ್ನಿಶಾಮಕ ದಳಕ್ಕೆ ಹಲವೆಡೆ ನೀರು ತುಂಬಿರುವ, ಪ್ರವಾಹ ಉಂಟಾಗಿರುವ ಬಗ್ಗೆ ಸಂದೇಶ ಬರಲಾರಂಭಿಸಿತು. ತೀವ್ರ ಮಳೆಯಿಂದ ಹವಾಮಾನಕ್ಕೆ ಒಗ್ಗಿಕೊಳ್ಳಲಾಗದೆ 6 ಮಂದಿ ಹಿರಿಯ ನಾಗರಿಕರನ್ನು ಆಸ್ಪತ್ರೆಗೆ ಸೇರಿಸಲಾಯಿತು.