ಗದಗದಲ್ಲಿ ಅತಿ ಹೆಚ್ಚು ಕೋವಿಡ್-19 ಚೇತರಿಕೆ ಪ್ರಮಾಣ: ಆರಂಭಿಕ ಪತ್ತೆಯೇ ಇದಕ್ಕೆ ಕಾರಣ!

ರಾಜ್ಯದಲ್ಲಿ ಗದಗ ಜಿಲ್ಲೆ ಅತಿ ಹೆಚ್ಚು ಕೋವಿಡ್-19 ಚೇತರಿಕೆ ಪ್ರಮಾಣ ಹೊಂದಿದ್ದು, ಶೇ.91.7 ರಷ್ಟು ಮಂದಿ ಕೋವಿಡ್-19 ನಿಂದ ಚೇತರಿಸಿಕೊಂಡಿದ್ದಾರೆ. 

ಅ.02 ರಂದು ಬಿಡುಗಡೆಯಾದ ಅಂಕಿ-ಅಂಶಗಳ ಪ್ರಕಾರ ಜಿಲ್ಲೆಯಲ್ಲಿ ಒಟ್ಟಾರೆ 9,342 ಪ್ರಕರಣಗಳು ವರದಿಯಾಗಿದ್ದು, 8,556 ಮಂದಿ ಚೇತರಿಸಿಕೊಂಡಿದ್ದಾರೆ.

ರಾಜ್ಯದಲ್ಲೇ ಮಾದರಿಯೆಂಬುವಂತಹ ಚೇತರಿಕೆ ಪ್ರಮಾಣ ಹೊಂದಿರುವ ಗದಗದ ಈ ಸಾಧನೆಗೆ ಕಾರಣವಾಗಿರುವುದು ಕೋವಿಡ್-19 ಪ್ರಕರಣಗಳನ್ನು ಉಲ್ಬಣವಾಗಲು ಬಿಡದೇ ಆರಂಭದಲ್ಲೇ ಪತ್ತೆ ಹಚ್ಚುತ್ತಿರುವುದಾಗಿದೆ. 

ಸ್ಲಮ್ ಗಳಲ್ಲಿ ಹಾಗೂ ಜನಸಂಖ್ಯೆ ದಟ್ಟವಾಗಿರುವ ಪ್ರದೇಶಗಳಲ್ಲಿ ರ್ಯಾಂಡಮ್ ಸ್ಯಾಂಪಲ್ ಟೆಸ್ಟ್ ಗಳನ್ನು ಜಿಲ್ಲಾಡಳಿತ ನಡೆಸಿತ್ತು. ಏಕಕಾಲಕ್ಕೆ ಎರಡು ಹಂತಗಳಲ್ಲಿ ಗ್ರಾಮೀಣ ಹಾಗೂ ನಗರಗಳ ಪ್ರದೇಶಗಳಲ್ಲಿ ರ್ಯಾಂಡಮ್ ಟೆಸ್ಟಿಂಗ್ ಮಾಡಲು ಸಿಬ್ಬಂದಿಗಳನ್ನು ನಿಯೋಜನೆ ಮಾಡಲಾಗಿದೆ.

ನನಗೆ ಜ್ವರ, ಕೆಮ್ಮು ಇತ್ತು. ಆರೋಗ್ಯ ಸಿಬ್ಬಂದಿಗಳು ಕೋವಿಡ್-19 ಪರೀಕ್ಷೆ ಮಾಡಿಸಿಕೊಳ್ಳುವುದಕ್ಕೆ ಸೂಚಿಸಿದರು ಜಿಐಎಂಎಸ್ ಆಸ್ಪತ್ರೆಯಲ್ಲಿ ನಡೆಸಿದ ಪರೀಕ್ಷೆಯಲ್ಲಿ ಕೊರೋನಾ ಸೋಂಕು ದೃಢಪಟ್ಟಿದೆ. ಅರ್ಧಗಂಟೆಯಲ್ಲಿ ಆಸ್ಪತ್ರೆಗೆ ದಾಖಲಾದೆ ಈಗ ಚೇತರಿಸಿಕೊಂಡಿದ್ದೇನೆ, ನನ್ನೊಂದಿಗೆ 111 ಜನರು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ ಎಂದು ಕೊರೋನಾದಿಂದ ಪಾರಾದವರೊಬ್ಬರು ತಿಳಿಸಿದ್ದಾರೆ.

ಗದಗದ ಜಿಲ್ಲಾ ಆರೋಗ್ಯ ಅಧಿಕಾರಿ ಸತೀಶ್ ಬಸರಿಗಿಡಾದ್ ಮಾತನಾಡಿದ್ದು 1500  ಜನರನ್ನು ದಿನವೊಂದಕ್ಕೆ ತಪಾಸಣೆ ಮಾಡುತ್ತಿದ್ದೇವೆ. ಸಮಯಕ್ಕೆ ತಕ್ಕಂತೆ ಹಾಗೂ ಪ್ರಾರಂಭಿಕ ಹಂತದಲ್ಲೇ ಕೋವಿಡ್-19 ತಪಾಸಣೆ ಮಾಡಿಸಲಾಗುತ್ತಿದೆ ಎಂದು ಹೇಳಿದ್ದಾರೆ.