ಹಾಸನ-ಸೋಲಾಪುರ ಎಕ್ಸ್‌ಪ್ರೆಸ್ ರೈಲಿನಲ್ಲಿ ದಟ್ಟ ಹೊಗೆ; ಪ್ರಯಾಣಿಕರಲ್ಲಿ ಆತಂಕ!

ಕಲಬುರಗಿ: ಹಾಸನ-ಸೋಲಾಪುರ ಸೂಪರ್‌ಫಾಸ್ಟ್ ಎಕ್ಸ್‌ಪ್ರೆಸ್ ರೈಲಿನ ಒಂದು ಬೋಗಿಯಿಂದ ಸೋಮವಾರ ಬೆಳಗಿನ ಜಾವ ದಟ್ಟವಾದ ಹೊಗೆ ಹೊರಬಂದಿದ್ದು, ಪ್ರಯಾಣಿಕರು ಭಯಭೀತರಾಗಿದ್ದರು.

ಕಲಬುರಗಿ ಜಿಲ್ಲೆಯ ಮರತೂರು ಗ್ರಾಮದ ಬಳಿ ಇಂದು ಬೆಳಗ್ಗೆ 5:45 ರ ಸುಮಾರಿಗೆ ಈ ಘಟನೆ ಸಂಭವಿಸಿದೆ. 11312 ಸಂಖ್ಯೆಯ ರೈಲು ಸೋಲಾಪುರಕ್ಕೆ ತೆರಳುತ್ತಿತ್ತು. ಈ ವೇಳೆ ತಾಂತ್ರಿಕ ದೋಷದಿಂದಾಗಿ ನಾಲ್ಕನೇ ಬೋಗಿಯ ಬ್ರೇಕ್ ಬೈಂಡಿಂಗ್‌ನಿಂದ ದಟ್ಟವಾದ ಹೊಗೆ ಬರುತ್ತಿರುವುದು ಕಂಡುಬಂದಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.

ಮರತೂರಿನ ರೈಲ್ವೆ ಸಿಬ್ಬಂದಿಯೊಬ್ಬರು ಬ್ರೇಕ್ ಬೈಂಡಿಂಗ್‌ನಿಂದ ದಟ್ಟವಾದ ಹೊಗೆ ಬರುತ್ತಿರುವುದನ್ನು ಗಮನಿಸಿ ತಕ್ಷಣ ರೈಲು ನಿಲ್ಲಿಸುವಂತೆ ರೈಲ್ವೆ ನಿಲ್ದಾಣಕ್ಕೆ ಸೂಚಿಸಿದ್ದಾರೆ.

ರೈಲು ನಿಂತಾಗ, ಆತಂಕಗೊಂಡ ಪ್ರಯಾಣಿಕರು ಬೆಂಕಿ ಹೊತ್ತಿಕೊಳ್ಳುವ ಭಯದಿಂದ ತಮ್ಮ ಲಗೇಜ್‌ಗಳೊಂದಿಗೆ ಆತುರದಿಂದ ರೈಲಿನಿಂದ ಹೊರಬಂದಿದ್ದಾರೆ.

ಆದಾಗ್ಯೂ, ರೈಲ್ವೆ ಸಿಬ್ಬಂದಿ ಸಮಸ್ಯೆಯನ್ನು ತ್ವರಿತವಾಗಿ ಪರಿಹರಿಸಿದ್ದು, ಯಾರಿಗೆ ಯಾವುದೇ ತೊಂದರೆಯಾಗಿಲ್ಲ ಎಂದು ತಿಳಿಸಿದ್ದಾರೆ.

ಕೆಲವೊಮ್ಮೆ ರೈಲು ನಿಲುಗಡೆ ಹಾಗೂ ನಿಧಾನಕ್ಕೆ ಚಲಿಸುವಾಗ ಬ್ರೇಕ್ ಬೈಂಡಿಂಗ್ ಗಾಲಿಗೆ ತಾಗುತ್ತದೆ. ಇದರಿಂದ ಹೊಗೆ ಬರುತ್ತದೆ. ಅದನ್ನು ಮತ್ತೆ ಹಿಂದಕ್ಕೆ ಸರಿಸಿದರೆ ರೈಲು ಸರಾಗವಾಗಿ ಚಲಿಸುತ್ತದೆ. ತಕ್ಷಣವೇ ಸಿಬ್ಬಂದಿ ಅದನ್ನು ಸರಿಪಡಿಸಿದ್ದಾರೆ. ರೈಲು ಕೂಡ ಸೋಲಾಪುರದ ಕಡೆಗೆ ತೆರೆಳಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.