ಬೆಂಗಳೂರು: ಹಲಸೂರು ಮಾರುಕಟ್ಟೆಯಲ್ಲಿ 10 ಬೈಕ್‌ಗಳಿಗೆ ಬೆಂಕಿ; ಮೂವರು ಮುಸುಕುಧಾರಿಗಳಿಂದ ದುಷ್ಕೃತ್ಯ!

ಬೆಂಗಳೂರು: ಹಲಸೂರು ಮಾರುಕಟ್ಟೆ ಬಳಿಯ ಬಜಾಜ್‌ ಸ್ಟ್ರೀಟ್‌ ಹಾಗೂ ಕಾಳಿಯಮ್ಮನ ದೇವಸ್ಥಾನದ ಬಳಿ ಸೋಮವಾರ ಬೆಳಗಿನ ಜಾವ 3.30ರ ಸುಮಾರಿಗೆ ದುಷ್ಕರ್ಮಿಗಳು ಮನೆಗಳ ಹೊರಗೆ ನಿಲ್ಲಿಸಿದ್ದ ಹತ್ತಕ್ಕೂ ಹೆಚ್ಚು ದ್ವಿಚಕ್ರ ವಾಹನಗಳಿಗೆ ಬೆಂಕಿ ಹಚ್ಚಿದ್ದರಿಂದ ಅವುಗಳು ಸಂಪೂರ್ಣವಾಗಿ ಸುಟ್ಟು ಭಸ್ಮವಾಗಿವೆ.

ಸುತ್ತಮುತ್ತಲಿನ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಮೂವರು ದುಷ್ಕರ್ಮಿಗಳು ತಮ್ಮ ಮುಖವನ್ನು ಟವೆಲ್‌ನಿಂದ ಮುಚ್ಚಿಕೊಂಡು ಬೈಕ್‌ಗಳು ಮತ್ತು ಕೆಲವು ದಿನಸಿ ಮತ್ತು ತರಕಾರಿ ಅಂಗಡಿಗಳ ಶಟರ್‌ಗಳಿಗೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚುತ್ತಿರುವುದು ಸೆರೆಯಾಗಿದೆ.

ಒಂದು ತಿಂಗಳ ಹಿಂದೆ ಖರೀದಿಸಿದ ಪಲ್ಸರ್ 150 ಸಿಸಿ ಬೈಕ್ ಮತ್ತು ನಾಲ್ಕು ಬೈಸಿಕಲ್‌ಗಳನ್ನು ಸಹ ಸುಟ್ಟುಹಾಕಲಾಗಿದೆ.

ಬೆಳಗಿನ ಜಾವ 3.30 ರ ಸುಮಾರಿಗೆ, ಪಟಾಕಿ ಸಿಡಿಯುವ ಶಬ್ದ ಕೇಳಿದ ನಂತರ ಸ್ಥಳೀಯರೆಲ್ಲರೂ ಎಚ್ಚರಗೊಂಡಿದ್ದಾರೆ. ಈ ಪ್ರದೇಶದಲ್ಲಿ ಇಂತಹ ಘಟನೆ ನಡೆದಿರುವುದು ಇದೇ ಮೊದಲು. ಕಾರಣ ನಿಗೂಢವಾಗಿದೆ.

ಸಂಪ್ ನೀರನ್ನು ಬಳಸಿ ಬೆಂಕಿಯನ್ನು ನಂದಿಸಲಾಗಿದೆ. ಕಿರಿದಾದ ರಸ್ತೆಯಲ್ಲಿ ಮನೆಗಳ ಹೊರಗೆ ಬೈಕ್ ಗಳನ್ನು ನಿಲ್ಲಿಸಲಾಗಿತ್ತು ಎಂದು ನಿವಾಸಿಯೊಬ್ಬರು ತಿಳಿಸಿದರು. ಈ ಸಂಬಂಧ ಹಲಸೂರು ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.