ಇಡ್ಲಿ, ದೋಸೆ, ವಡೆ ಪ್ರಿಯರೇ ಎಚ್ಚರ.. ಬೇಸಿಗೆಯಲ್ಲಿ fermented ಆಹಾರಗಳು ಉತ್ತಮವೇ? FSSAI ಮಾರ್ಗಸೂಚಿ ಹೇಳೋದೇನು?

ಬೆಂಗಳೂರು: ಬೆಂಗಳೂರಿನ ಖಾಸಗಿ ಕಂಪನಿಯ ಕ್ಯಾಂಟೀನ್‌ನಲ್ಲಿ ಇಡ್ಲಿ, ವಡೆ ಮತ್ತು ಸಾಂಬಾರ್-ಅನ್ನ ತಿಂದ ನಂತರ 97 ಉದ್ಯೋಗಿಗಳು ಅಸ್ವಸ್ಥಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದು, ಈ ಬೆಳವಣಿಗೆ ಬೆನ್ನಲ್ಲೇ fermented foodsಗಳ ಕುರಿತು ಚರ್ಚೆಗಳು ಆರಂಭವಾಗಿವೆ.

ಹೌದು.. ಇಡ್ಲಿ, ದೋಸೆ ಮತ್ತು ವಡೆಯಂತಹ ಹುದುಗಿಸಿದ ಆಹಾರ ಪದಾರ್ಥಗಳನ್ನು ಸಾಮಾನ್ಯವಾಗಿ ಕರುಳಿನ ಆರೋಗ್ಯಕ್ಕೆ ಉತ್ತಮ ಮತ್ತು ಸುಲಭವಾಗಿ ಜೀರ್ಣವಾಗುವ ಆಹಾರವೆಂದು ಪರಿಗಣಿಸಲಾಗುತ್ತದೆ.

ಆದರೆ, ಬೇಸಿಗೆಯ ಹೆಚ್ಚಿನ ತಾಪಮಾನದಲ್ಲಿ ಆಹಾರ ಪದಾರ್ಥಗಳು ಬೇಗನೆ ಹಾಳಾಗುವ ಸಾಧ್ಯತೆ ಇರುತ್ತದೆ. ಬೇಸಿಗೆಯ ತಿಂಗಳುಗಳಲ್ಲಿ ಈ ಪದಾರ್ಥಗಳು ಬ್ಯಾಕ್ಟೀರಿಯಾದ ಸೋಂಕಿಗೆ ಒಳಗಾಗುವ ಸಾಧ್ಯತೆ ಹೆಚ್ಚಿರುತ್ತದೆ.

ಇದು ಆಹಾರ ವಿಷಾಹಾರವಾಗಲು (food poisoning) ಕಾರಣವಾಗಬಹುದು ಎಂದು ಆಹಾರ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಬೇಸಿಗೆಯಲ್ಲಿ fermented ಆಹಾರಗಳಿಗೆ ಹೆಚ್ಚಿನ ಕಾಳಜಿ ಏಕೆ ಬೇಕು?

ಹುದುಗಿಸಿದ ಆಹಾರಗಳು ಎಂದರೆ ಬ್ಯಾಕ್ಟೀರಿಯಾ, ಯೀಸ್ಟ್ ಅಥವಾ ಶಿಲೀಂಧ್ರಗಳಂತಹ ಸೂಕ್ಷ್ಮಜೀವಿಗಳ ಕ್ರಿಯೆಯ ಮೂಲಕ ರೂಪಾಂತರಗೊಂಡ ಪದಾರ್ಥಗಳಾಗಿವೆ.

ತಜ್ಞರ ಪ್ರಕಾರ, ಈ ಪ್ರಕ್ರಿಯೆಯಲ್ಲಿ, ಈ ಸೂಕ್ಷ್ಮಜೀವಿಗಳು ನೈಸರ್ಗಿಕ ಸಕ್ಕರೆ ಮತ್ತು ಪಿಷ್ಟವನ್ನು ಆಮ್ಲಗಳು, ಅನಿಲಗಳು ಅಥವಾ ಆಲ್ಕೋಹಾಲ್‌ನಂತಹ ಸರಳ ಸಂಯುಕ್ತಗಳಾಗಿ ವಿಭಜಿಸುತ್ತವೆ.

ಇದು ಆಹಾರವನ್ನು ಸಂರಕ್ಷಿಸಲು ಸಹಾಯ ಮಾಡುತ್ತದೆ ಮತ್ತು ಅದರ ರುಚಿ, ವಿನ್ಯಾಸ ಹಾಗೂ ಪೌಷ್ಟಿಕಾಂಶದ ಮೌಲ್ಯವನ್ನು ಹೆಚ್ಚಿಸುತ್ತದೆ.

ಇದೇ ಕಾರಣಕ್ಕಾಗಿ ಇಡ್ಲಿ, ದೋಸೆ ಮತ್ತು ವಡೆಯಂತಹ ಹುದುಗಿಸಿದ ಆಹಾರಗಳಿಗೆ ಬೇಸಿಗೆಯ ತಿಂಗಳುಗಳಲ್ಲಿ ಹೆಚ್ಚಿನ ಕಾಳಜಿಯ ಅಗತ್ಯವಿರುತ್ತದೆ.

ಬೇಸಿಗೆಯಲ್ಲಿ ಎದುರಾಗುವ ಅಪಾಯಗಳು

ಸಾಮಾನ್ಯವಾಗಿ ಬೇಸಿಗೆಯ ಹೆಚ್ಚಿನ ತಾಪಮಾನದಲ್ಲಿ ಆಹಾರ ಪದಾರ್ಥಗಳು ಬೇಗನೆ ಹಾಳಾಗುವ ಸಾಧ್ಯತೆ ಇರುತ್ತದೆ. ಬೇಸಿಗೆಯ ತಿಂಗಳುಗಳಲ್ಲಿ ಈ ಪದಾರ್ಥಗಳು ಬ್ಯಾಕ್ಟೀರಿಯಾದ ಸೋಂಕಿಗೆ ಒಳಗಾಗುವ ಸಾಧ್ಯತೆ ಹೆಚ್ಚಿರುತ್ತದೆ.

ವೇಗದ ಹುದುಗುವಿಕೆ:

ಹೆಚ್ಚಿನ ತಾಪಮಾನದಿಂದಾಗಿ, 8-10 ಗಂಟೆ ತೆಗೆದುಕೊಳ್ಳುವ ಪ್ರಕ್ರಿಯೆಯು ಅರ್ಧದಷ್ಟು ಸಮಯದಲ್ಲೇ ಪೂರ್ಣಗೊಳ್ಳುತ್ತದೆ. ಗಮನಿಸದೆ ಬಿಟ್ಟರೆ ಇದು ಅತಿಯಾದ ಹುದುಗುವಿಕೆಗೆ ಕಾರಣವಾಗಿ, ಆಹಾರವು ವಿಷಕಾರಿಯಾಗಬಹುದು.

ಹಾಳಾಗುವ ಭೀತಿ:

ಶಾಖ ಮತ್ತು ತೇವಾಂಶವು ಅನಗತ್ಯ ಬ್ಯಾಕ್ಟೀರಿಯಾ ಮತ್ತು ಬೂಸ್ಟ್ ಬೆಳೆಯಲು ಪೂರಕವಾಗಿರುತ್ತದೆ, ಇದು ಆಹಾರ ವಿಷಾಹಾರವಾಗಲು (Food Poisoning) ಕಾರಣವಾಗುತ್ತದೆ.

ಕಡಿಮೆ ಬಾಳಿಕೆ:

ಬೇಸಿಗೆಯಲ್ಲಿ ಆಹಾರವು ಬೇಗನೆ ಪ್ರತಿಕ್ರಿಯಿಸುವುದರಿಂದ ಅವುಗಳ ಬಾಳಿಕೆ ಅವಧಿ ಕಡಿಮೆಯಿರುತ್ತದೆ. ಇವುಗಳನ್ನು ತಾಜಾವಾಗಿಡಲು ಫ್ರಿಡ್ಜ್‌ನಲ್ಲಿ ಸಂಗ್ರಹಿಸುವುದು ಉತ್ತಮ.

ಕಲುಷಿತ ನೀರು:

ನಲ್ಲಿ ನೀರನ್ನು ಬಳಸುವುದರಿಂದ ಬ್ಯಾಕ್ಟೀರಿಯಾಗಳು ಹರಡಬಹುದು. ಆದ್ದರಿಂದ ಶೋಧಿಸಿದ (Filtered) ನೀರನ್ನು ಬಳಸುವುದು ಸುರಕ್ಷಿತ.

FSSAI ನಿಯಮಗಳು

ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರವು (FSSAI) ಕೆಲವು ಮಾನದಂಡಗಳನ್ನು ವಿಧಿಸಿದೆ.

ಹಾಲಿನ ಉತ್ಪನ್ನಗಳು:

ಹುದುಗುವ ಹಾಲಿನ ಉತ್ಪನ್ನಗಳಲ್ಲಿ ಕನಿಷ್ಠ 2.9% ಪ್ರೋಟೀನ್ ಮತ್ತು 0.45% ಆಮ್ಲೀಯತೆ ಇರಬೇಕು.

ಸೋಯಾಬೀನ್ ಪೇಸ್ಟ್:

ಇದರಲ್ಲಿರುವ ಅಲರ್ಜಿ ಉಂಟುಮಾಡುವ 'ಟ್ರಿಪ್ಸಿನ್ ಇನ್ಹಿಬಿಟರ್'ಗಳನ್ನು ನಿಷ್ಕ್ರಿಯಗೊಳಿಸುವುದು ಕಡ್ಡಾಯ.

ಪ್ರೊಬಯಾಟಿಕ್:

ಪ್ರೊಬಯಾಟಿಕ್ ಎಂದು ಹೇಳಿಕೊಳ್ಳುವ ಉತ್ಪನ್ನಗಳಲ್ಲಿ ನಿರ್ದಿಷ್ಟ ಪ್ರಮಾಣದ ಬ್ಯಾಕ್ಟೀರಿಯಾ ಕೌಂಟ್ (CFU) ಇರಲೇಬೇಕು.

ಸ್ವಚ್ಛತೆ:

ಉತ್ಪಾದಕರು ಕಡ್ಡಾಯವಾಗಿ ಹೈಜೀನ್ ಮತ್ತು ಲೋಹದ ಕಶ್ಮಲಗಳ ನಿಯಮಗಳನ್ನು ಪಾಲಿಸಬೇಕು. ಆಹಾರವನ್ನು ತಯಾರಿಸುವ ಮೊದಲು ಮತ್ತು ಬಡಿಸುವ ಮೊದಲು ಕೈಗಳನ್ನು ಸೋಪಿನಿಂದ ಚೆನ್ನಾಗಿ ತೊಳೆದುಕೊಳ್ಳಬೇಕು. ಪಾತ್ರೆಗಳು ಮತ್ತು ಅಡುಗೆ ಮಾಡುವ ಸ್ಥಳವು ಸಂಪೂರ್ಣವಾಗಿ ಸ್ವಚ್ಛವಾಗಿರಬೇಕು.

fermented ಆಹಾರಗಳ ಬಳಕೆ ಕುರಿತು FSSAI ಮಾರ್ಗಸೂಚಿ ಹೇಳೋದೇನು?

ಇಂತಹ ಸಮಯದಲ್ಲಿ ಸುರಕ್ಷಿತವಾಗಿರಲು FSSAI (ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ) ಸೂಚಿಸುವ ಕೆಲವು ಪ್ರಮುಖ ಮಾರ್ಗಸೂಚಿಗಳು ಇಲ್ಲಿವೆ:

ತಾಜಾ ಪದಾರ್ಥಗಳ ಬಳಕೆ:

ಹಿಟ್ಟನ್ನು ತಯಾರಿಸಲು ಬಳಸುವ ಅಕ್ಕಿ, ಬೇಳೆ ಮತ್ತು ನೀರು ಶುದ್ಧವಾಗಿರಲಿ. ಹಳೆಯದಾದ ಅಥವಾ ವಾಸನೆ ಬರುತ್ತಿರುವ ಹಿಟ್ಟನ್ನು ಬಳಸಬೇಡಿ.

ಸರಿಯಾದ ಸಂಗ್ರಹಣೆ:

ಹುದುಗಿಸಿದ ಹಿಟ್ಟನ್ನು ಅತಿಯಾದ ತಾಪಮಾನದಲ್ಲಿ ಇಡಬಾರದು. ಹಿಟ್ಟು ಸರಿಯಾದ ಪ್ರಮಾಣದಲ್ಲಿ ಉಬ್ಬಿದ ತಕ್ಷಣ ಅದನ್ನು ಶೈತ್ಯೀಕರಣದಲ್ಲಿ (refrigerator) ಇಡುವುದು ಉತ್ತಮ.

ನೀರಿನ ಸುರಕ್ಷತೆ:

ಆಹಾರ ತಯಾರಿಕೆಯಲ್ಲಿ ಕೇವಲ ಕುದಿಸಿ ಆರಿಸಿದ ಅಥವಾ ಶುದ್ಧೀಕರಿಸಿದ ನೀರನ್ನು ಮಾತ್ರ ಬಳಸಿ.

ಬಡಿಸುವ ವಿಧಾನ:

ಆಹಾರವನ್ನು ತಯಾರಿಸಿದ ನಂತರ ಹೆಚ್ಚು ಸಮಯ ಹೊರಗೆ ಇಡದೆ, ಬಿಸಿಯಾಗಿರುವಾಗಲೇ ಸೇವಿಸುವುದು ಸುರಕ್ಷಿತ.

ಈ ಸರಳ ಕ್ರಮಗಳನ್ನು ಅನುಸರಿಸುವುದರಿಂದ ಆಹಾರ ವಿಷಾಹಾರವಾಗುವುದನ್ನು ತಡೆಗಟ್ಟಬಹುದು ಮತ್ತು ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು ಎಂದು ತಜ್ಞರು ಸಲಹೆ ನೀಡಿದ್ದಾರೆ.