ಪ್ಲಾಸ್ಟಿಕ್ ಸರ್ಜರಿ ಎಂದರೇನು? ಈ ಸರ್ಜರಿಯ ಕೆಲವು ಸತ್ಯ-ಮಿಥ್ಯ ಸಂಗತಿಗಳು ಇಲ್ಲಿವೆ...

ಇತ್ತೀಚಿನ ದಿನಗಳಲ್ಲಿ ಪ್ಲಾಸ್ಟಿಕ್ ಸರ್ಜರಿಯ ಪ್ರವೃತ್ತಿಯು ಬಹಳಷ್ಟು ಹೆಚ್ಚಾಗಿದೆ. ಪ್ಲಾಸ್ಟಿಕ್ ಸರ್ಜರಿಯು ಭಾರತದೊಂದಿಗೆ ಆಳವಾದ ಸಂಬಂಧವನ್ನು ಹೊಂದಿದೆ. ಏಕೆಂದರೆ ಈ ಪರಿಕಲ್ಪನೆ ಮೊದಲು ಹುಟ್ಟಿಕೊಂಡದ್ದು ಭಾರತದಲ್ಲಿ. ಪ್ರಾಚೀನ ವೈದ್ಯ ಮತ್ತು ಶಸ್ತ್ರಚಿಕಿತ್ಸಕ ಸುಶ್ರುತರನ್ನು ಪ್ಲಾಸ್ಟಿಕ್ ಸರ್ಜರಿಯ ಪಿತಾಮಹ ಎಂದು ಕರೆಯಲಾಗುತ್ತದೆ. ಜುಲೈ 15 ಭಾರತದಲ್ಲಿ ರಾಷ್ಟ್ರೀಯ ಪ್ಲಾಸ್ಟಿಕ್ ಸರ್ಜರಿ ದಿನವನ್ನು ಆಚರಿಸಲಾಗುತ್ತದೆ. ಸಮಾಜದಲ್ಲಿ ಪ್ಲಾಸ್ಟಿಕ್ ಸರ್ಜನ್ ಗಳ ಪಾತ್ರದ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲು ಈ ದಿನವನ್ನು ಆಚರಿಸಲಾಗುತ್ತದೆ.

ಪ್ಲಾಸ್ಟಿಕ್‌ ಎಂಬ ಪದ ಗ್ರೀಕ್‌ ಪದ ಪ್ಲಾಸ್ಟಿಕೋಸ್‌ದಿಂದ ಬಂದಿದೆ. ಅದರ್ಥ ಮೆಲೆಬಲ್ ಅಥವಾ ಅಚ್ಚು ಎಂಬರ್ಥವನ್ನು ನೀಡುತ್ತದೆ, ಪ್ಲಾಸ್ಟಿಕ್‌ ಸರ್ಜರಿಯಲ್ಲಿ ಸಿಲಿಕಾನ್, ಕೋರ್‌ ಟೆಕ್ಸ್, ಮೆಡ್‌ಪೋರ್‌ ಈ ಮೂರು ವಸ್ತುಗಳನ್ನು ಸಾಮಾನ್ಯವಾಗಿ ಬಳಸಲಾಗುತ್ತದೆ. ಈ ಸರ್ಜರಿಯನ್ನು ಸಮಸ್ಯೆ ಬಗೆಹರಿಸಲು ಬಳಸಲಾಗುವುದೇ ಹೊರತು ಹೊಸ ಸಮಸ್ಯೆ ಹುಟ್ಟು ಹಾಕುವುದಕ್ಕೆ ಅಲ್ಲ.

ಪ್ಲಾಸ್ಟಿಕ್‌ ಸರ್ಜರಿ ಅನ್ನು ಬರೀ ಸೌಂದರ್ಯವೃದ್ಧಿಗಷ್ಟೇ ಅಲ್ಲ ಅನೇಕ ಆರೋಗ್ಯ ಸಮಸ್ಯೆ ಹೋಗಲಾಡಿಸಲೂ ಕೂಡ ಬಳಸಲಾಗುತ್ತಿದೆ. ಸುಟ್ಟ ಗಾಯಗಳನ್ನು ಮರೆ ಮಾಚಲು, ಆಕ್ಸಿಡೆಂಟ್‌ನಿಂದ ಹಾಳಾದ ಮುಖದ ಚಹರೆ ಸರಿಪಡಿಸಲು ಹೀಗೆ ಅನೇಕ ಸಮಸ್ಯೆ ಪರಿಹರಿಸಲು ಬಳಸಲಾಗುತ್ತದೆ.

ಈ ಪ್ಲಾಸ್ಟಿಕ್ ಸರ್ಜರಿಯು ವಿಶೇಷ ಶಸ್ತ್ರಚಿಕಿತ್ಸಾ ವಿಧಾನವಾಗಿದ್ದು, ಅದು ಅಪಘಾತ ಅಥವಾ ಕಾಯಿಲೆಯಿಂದ ಹಾನಿಗೊಳಗಾದ ಅಂಗಗಳನ್ನು ಸರಿಪಡಿಸುವ ಅಂಶವನ್ನೂ ಒಳಗೊಂಡಿರುತ್ತದೆ.

ಪ್ಲಾಸ್ಟಿಕ್ ಸರ್ಜರಿಯ ಬಗೆಗಿನ ಕೆಲವೊಂದು ಮಿಥ್ಯಗಳು

ಪ್ಲಾಸ್ಟಿಕ್ ಸರ್ಜರಿಗೆ ಸಂಬಂಧಿಸಿದಂತೆ ಜನರಲ್ಲಿ ಅನೇಕ ತಪ್ಪು ಕಲ್ಪನೆಗಳಿವೆ. ಕೇವಲ ರೂಪದರ್ಶಿಗಳು ಅಥವಾ ತಾರೆಯರು ಮಾತ್ರ ಪ್ಲಾಸ್ಟಿಕ್ ಸರ್ಜರಿ ಮಾಡುತ್ತಾರೆ ಎಂದು ಕೆಲವು ಜನರು ಭಾವಿಸುತ್ತಾರೆ ನಿಜ ಹೇಳಬೇಕೆಂದರೆ ಇದು ಕಾಸ್ಮೆಟಿಕ್ ಸರ್ಜರಿಯಾಗಿದೆ. ಮತ್ತು ಅಪಘಾತ ಅಥವಾ ಕಾಯಿಲೆಯಿಂದ ಹಾನಿಗೊಳಗಾದ ಅಂಗಗಳನ್ನು ಸರಿಪಡಿಸಲು ಪ್ಲಾಸ್ಟಿಕ್ ಸರ್ಜರಿಯನ್ನು ಮಾಡಲಾಗುತ್ತದೆ. ಪ್ಲಾಸ್ಟಿಕ್ ಸರ್ಜರಿಗೆ ಸಂಬಂಧಿಸಿದ ಕೆಲವು ಮಿಥ್ಯ ಹಾಗೂ ಅದರ ನಿಜವಾದ ಸತ್ಯಾಂಶ ಏನೆಂಬುದನ್ನು ತಿಳಿಯೋಣ.

ಪ್ಲಾಸ್ಟಿಕ್ ಸರ್ಜರಿಯಲ್ಲಿ ಪ್ಲಾಸ್ಟಿಕ್ ಬಳಸಲಾಗುತ್ತದೆ

ಪ್ಲಾಸ್ಟಿಕ್ ಸರ್ಜರಿಯಲ್ಲಿ ಪ್ಲಾಸ್ಟಿಕ್ ಎಂಬ ಪದ ಬಳಕೆ ಇರುವ ಕಾರಣ ಈ ಚಿಕಿತ್ಸೆಯಲ್ಲಿ ಪ್ಲಾಸ್ಟಿಕ್ ಅಥವಾ ಯಾವುದೇ ಕೃತಕ ವಸ್ತುಗಳನ್ನು ಬಳಸಲಾಗುತ್ತದೆ ಎಂದು ಅನೇಕ ಜನರು ಭಾವಿಸುತ್ತಾರೆ. ಆದರೆ ಅದು ತಪ್ಪು ಕಲ್ಪನೆ. ಪ್ಲಾಸ್ಟಿಕ್ ಸರ್ಜರಿಯಲ್ಲಿನ ಪ್ಲಾಸ್ಟಿಕ್ ಎಂಬ ಪದವು ಗ್ರೀಕ್ ಪದವಾದ ಪ್ಲಾಸ್ಟಿಕೋಸ್ ಎಂಬ ಪದದಿಂದ ಬಂದಿದೆ. ಇದರರ್ಥ ಅಚ್ಚು. ಈ ಶಸ್ತ್ರಚಿಕಿತ್ಸೆಯಲ್ಲಿ ಹಾನಿಗೊಳಗಾದ ದೇಹದ ಭಾಗಗಳಿಗೆ ಮತ್ತೆ ಸರಿಯಾದ ಆಕಾರವನ್ನು ನೀಡಲಾಗುತ್ತದೆ. ಆದ್ದರಿಂದ ಇದನ್ನು ಪ್ಲಾಸ್ಟಿಕ್ ಸರ್ಜರಿ ಎಂದು ಕರೆಯಲಾಗುತ್ತದೆ.

ಪ್ಲಾಸ್ಟಿಕ್ ಸರ್ಜರಿ ಕಲೆಮುಕ್ತ

ಪ್ಲಾಸ್ಟಿಕ್ ಸರ್ಜರಿಯ ಸಮಯದಲ್ಲಿ ಹಾನಿಗೊಳದಾದ ದೇಹದ ಭಾಗಗಳನ್ನು ಕತ್ತರಿಸುವುದಾದಲಿ ಅಥವಾ ಅದನ್ನು ಹೊಲಿಯುವುದಾಗಲಿ ಮಾಡುವುದಿಲ್ಲ ಹಾಗೂ ಹೊಲಿಗೆಗಳ ಗುರುತು ಇರುವುದಿಲ್ಲ ಎಂದು ಜನರು ಭಾವಿಸುತ್ತಾರೆ. ಆದರೆ, ಸತ್ಯವೆಂದರೆ ಶಸ್ತ್ರಚಿಕಿತ್ಸಕರು ಹಾನಿಗೊಳಗಾದ ದೇಹದ ಭಾಗವನ್ನು ಕತ್ತರಿಸಿ, ಸರ್ಜರಿ ಮಾಡಿ ಹೊಲಿಗೆ ಹಾಕುತ್ತಾರೆ. ಆದರೆ, ಅದು ಕಡಿಮೆ ಗೋಚರಿಸುತ್ತದೆ. ಅಲ್ಲಿ ಉದ್ದವಾದ ಹೊಲಿಗೆಗಳನ್ನು ಹಾಕಲಾಗುತ್ತದೆ. ಶಸ್ತ್ರಚಿಕಿತ್ಸೆಯ ನಂತರ ಒಂದು ವರ್ಷದವರೆಗೆ ಇದನ್ನು ಕಾಣಬಹುದು.

ಪ್ಲಾಸ್ಟಿಕ್ ಸರ್ಜರಿ ಮಾಡಿ ಇನ್ನೊಬ್ಬ ವ್ಯಕ್ತಿಯ ರೂಪ ನೀಡಬಹುದು

ಪ್ಲಾಸ್ಟಿಕ್ ಸರ್ಜನ್ ಗಳಾಗಿ, ನಿಮ್ಮ ನೋಟಕ್ಕೆ ಸೂಕ್ಷ್ಮ ಬದಲಾವಣೆಗಳನ್ನು ಮಾಡುವಾಗ ನಿಮ್ಮ ಅನನ್ಯತೆಯನ್ನು ಕಾಪಾಡಿಕೊಳ್ಳುವುದು ನಮ್ಮ ಗುರಿಯಾಗಿದೆ. ಪ್ಲಾಸ್ಟಿಕ್ ಸರ್ಜರಿಯಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗುವ ವ್ಯಕ್ತಿ ಇನ್ನೊಬ್ಬ ವ್ಯಕ್ತಿಯ ರೂಪವನ್ನು ಪಡೆಯುತ್ತಾನೆ ಎಂದು ಚಲನಚಿತ್ರಗಳಲ್ಲಿ ಹೆಚ್ಚಾಗಿ ತೋರಿಸಲಾಗುತ್ತದೆ, ಆದರೆ, ಸತ್ಯವೆಂದರೆ ಅಲ್ಲಿ ನಿಮ್ಮ ರೂಪವನ್ನು ಬದಲಿಸಲಾಗುವುದಿಲ್ಲ.

ಸೌಂದರ್ಯ ಹೆಚ್ಟಿಸಿಕೊಳ್ಳಲು ಪ್ಲಾಸ್ಟಿಕ್ ಸರ್ಜರಿ ಮಾಡಲಾಗುತ್ತದೆ

ನೀವು ಭಾವಿಸಿದಂತೆ ಇದು ನಿಜವಲ್ಲ. ಹೆಚ್ಚಿನ ಸಂದರ್ಭದಲ್ಲಿ ಹಾನಿಗೊಳಗಾದ ದೇಹದ ಭಾಗಗಳು ಅಥವಾ ಅಪಘಾತದಲ್ಲಿ ವಿರೂಪಗೊಂಡಂತಹ ಮುಖದಂತಹದ ಭಾಗಗಳನ್ನು ಸರಿಪಡಿಸಲು ಅಗತ್ಯಕ್ಕೆ ತಕ್ಕ ಚಿಕಿತ್ಸೆ ನೀಡಲಾಗುತ್ತದೆ.

ಪ್ಲಾಸ್ಟಿಕ್ ಸರ್ಜರಿ ಮತ್ತು ಕಾಸ್ಮೆಟಿಕ್ ಸರ್ಜರಿ ಎರಡು ಒಂದೇ ಅಲ್ಲ

ಹೆಚ್ಚಿನ ಜನರು ಪ್ಲಾಸ್ಟಿಕ್ ಸರ್ಜರಿ ಮತ್ತು ಕಾಸ್ಮೆಟಿಕ್ ಸರ್ಜರಿ ಎರಡೂ ಒಂದೇ ಎಂದು ಭಾವಿಸುತ್ತಾರೆ. ಆದರೆ ಇದು ನಿಜವಲ್ಲ. ಪ್ಲಾಸ್ಟಿಕ್ ಸರ್ಜರಿಯು ಸುಟ್ಟ ಗಾಯ, ಸೀಳು ತುಟಿ ಅಥವಾ ಕ್ಯಾನ್ಸರ್ ನಂತಹ ಕಾಯಿಲೆಗಳಿಂದ ದೇಹದಲ್ಲಿ ಉಂಟಾಗವ ವಿಕಾರಗಳನ್ನು ಸರಿಪಡಿಸುವ ಚಿಕಿತ್ಸೆಯಾಗಿದೆ. ಆದರೆ ಕಾಸ್ಮೆಟಿಕ್ ಸರ್ಜರಿಯು ಪ್ಲಾಸ್ಟಿಕ್ ಸರ್ಜರಿಯ ಒಂದು ಭಾಗವಾಗಿದೆ. ಇದು ಮುಖ್ಯವಾಗಿ ಮೂಗು ಅಥವಾ ತುಟಿಗಳ ತಿದ್ದುಪಡಿಯ ಮೇಲೆ ಕೇಂದ್ರೀಕರಿಸುತ್ತದೆ. ಮತ್ತು ಮುಖದ ಸೌಂದರ್ಯ ಮತ್ತು ದೇಹದ ಆಕಾರವನ್ನು ಹೆಚ್ಚಿಸಲು ಕಾಸ್ಮೆಟಿಕ್ ಸರ್ಜರಿಯನ್ನು ಮಾಡಲಾಗುತ್ತದೆ.

ಪ್ಲಾಸ್ಟಿಕ್ ಸರ್ಜರಿಯು ವೈದ್ಯಕೀಯ ಸೂಪರ್-ಸ್ಪೆಷಾಲಿಟಿ ಚಿಕಿತ್ಸೆಯಾಗಿದ್ದು, ಈ ಸರ್ಜರಿ ನಡೆಸುವ ವೈದ್ಯರಿಗೆ MBBS (ಬ್ಯಾಚುಲರ್ ಆಫ್ ಮೆಡಿಸಿನ್ ಮತ್ತು ಬ್ಯಾಚುಲರ್ ಆಫ್ ಸರ್ಜರಿ), ನಂತರ MS (ಜನರಲ್ ಸರ್ಜರಿ) ಮತ್ತು ಅಂತಿಮವಾಗಿ MCH/DNB (ಪ್ಲಾಸ್ಟಿಕ್ ಸರ್ಜರಿ) ನಲ್ಲಿ ಕನಿಷ್ಠ 12-13 ವರ್ಷಗಳ ವಿದ್ಯಾಭ್ಯಾಸದ ಅಗತ್ಯವಿರುತ್ತದೆ.

ಇದು ಸುಟ್ಟಗಾಯಗಳ ಚಿಕಿತ್ಸೆ, ಆಘಾತ/ಕ್ಯಾನ್ಸರ್ ಪುನರ್ನಿರ್ಮಾಣ, ಸೀಳು/ಕ್ರೇನಿಯೊಫೇಶಿಯಲ್/ಮ್ಯಾಕ್ಸಿಲೊಫೇಶಿಯಲ್ ಶಸ್ತ್ರಚಿಕಿತ್ಸೆಗಳು, ಕೈ ಮತ್ತು ಇತರ ದೇಹದ ಭಾಗಗಳ ಜನ್ಮ ದೋಷಗಳನ್ನು ಸರಿಪಡಿಸುತ್ತದೆ.

ಕಾಸ್ಮೆಟಿಕ್ ಸರ್ಜರಿಯು ಪ್ಲಾಸ್ಟಿಕ್ ಸರ್ಜರಿಯ ಒಂದು ಭಾಗವಾಗಿದ್ದು, ಇದು ಸೌಂದರ್ಯದ ಶಸ್ತ್ರಚಿಕಿತ್ಸೆಯನ್ನು ಒಳಗೊಳ್ಳುತ್ತದೆ. ಈ ವೈದ್ಯರು ಸೌಂದರ್ಯದ ಶಸ್ತ್ರಚಿಕಿತ್ಸೆಯಲ್ಲಿ ಪರಿಣತಿ ಹೊಂದಿರುತ್ತಾದೆ. ತಮ್ಮ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸಲು ಸುಧಾರಿತ ತರಬೇತಿಗಳನ್ನು ಪಡೆದಿರುತ್ತಾರೆ. ಈ ವೈದ್ಯರು ಮೇಕ್ಅಪ್/ಮೂಲ ಚರ್ಮದ ಆರೈಕೆಯಲ್ಲಿ ತರಬೇತಿ ಪಡೆದಿರುತ್ತಾರೆ.

ಈ ಚಿಕಿತ್ಸೆ ಪಡೆಯಲು ಇಚ್ಛಿರುವವರು ಅನರ್ಹ ವೃತ್ತಿಪರರನ್ನು ಭೇಟಿ ಕುರಿತು ಎಚ್ಚರಿಕೆಯಿಂದಿರಬೇಕು. ಏಕೆಂದರೆ ಇವರು ಮಾನವ ಅಂಗರಚನಾಶಾಸ್ತ್ರ ಮತ್ತು ಶರೀರಶಾಸ್ತ್ರದ ಬಗ್ಗೆ ಸರಿಯಾದ ತಿಳುವಳಿಕೆಯನ್ನು ಹೊಂದಿಲ್ಲದವರಾಗಿರುತ್ತಾರೆ. ಇದರಿಂದ ಅಪಾಯಗಳು ಎದುರಾಗಬಹುದು.

ಉತ್ತಮ ಫಲಿತಾಂಶಕ್ಕಾಗಿ ಉತ್ತಮ ಕೌಶಲ್ಯಗಳು, ಅನುಭವ ಮತ್ತು ಅಂಗರಚನಾಶಾಸ್ತ್ರದ ವಿವರವಾದ ಜ್ಞಾನ ಇರುವ ವೈದ್ಯರ ಸಂಪರ್ಕ ಅಗತ್ಯ. ಈ ಶಸ್ತ್ರಚಿಕಿತ್ಸೆಗಳು ಬಹಳ ಸೂಕ್ಷ್ಮವಾಗಿರುವುದರಿಂದ ನಿಮಗೆ ಯಾವುದೇ ಪುನರ್ನಿರ್ಮಾಣ ಅಥವಾ ಸೌಂದರ್ಯದ ಶಸ್ತ್ರಚಿಕಿತ್ಸೆಯ ಸೇವೆಗಳ ಅಗತ್ಯವಿದ್ದರೆ ಅರ್ಹ ಪ್ಲಾಸ್ಟಿಕ್ ಸರ್ಜನ್ ಅನ್ನು ಸಂಪರ್ಕಿಸಬೇಕು.

ಪ್ಲಾಸ್ಟಿಕ್ ಸರ್ಜರಿ ದಿನದ ಇತಿಹಾಸ:

ಭಾರತದ ಪ್ಲಾಸ್ಟಿಕ್ ಸರ್ಜನ್​​ಗಳ ಸಂಘದ ಅಧ್ಯಕ್ಷರಾದ ಡಾ. ರಾಜಾ ಸಬಾಪತಿ ಅವರು 2011 ರಲ್ಲಿ ಭಾರತದಲ್ಲಿ ರಾಷ್ಟ್ರೀಯ ಪ್ಲಾಸ್ಟಿಕ್ ಸರ್ಜರಿಯ ದಿನದ ಪರಿಕಲ್ಪನೆಯನ್ನು ಪ್ರಸ್ತಾಪಿಸಿದರು. ಇದಾದ ನಂತರ 2021 ರಲ್ಲಿ ಮೊದಲ ಬಾರಿಗೆ ಜುಲೈ 15 ರಂದು ರಾಷ್ಟ್ರೀಯ ಪ್ಲಾಸ್ಟಿಕ್ ಸರ್ಜರಿಯ ದಿನವನ್ನು ಆಚರಿಸಲಾಯಿತು. 2022 ರಲ್ಲಿ ಜುಲೈ 15 ರಂದು ಪ್ರಪಂಚದಾದ್ಯಂತ ಪ್ಲಾಸ್ಟಿಕ್ ಸರ್ಜರಿಯ ದಿನವನ್ನು ಆಚರಿಸಲು ಪ್ರಾರಂಭಿಸಲಾಯಿತು.

ಪ್ಲಾಸ್ಟಿಕ್ ಸರ್ಜರಿ ದಿನದ ಆಚರಣೆಯ ಮಹತ್ವ:

ಹೆಚ್ಚಿನ ಜನರು, ಪ್ಲಾಸ್ಟಿಕ್ ಸರ್ಜರಿಯು ಕಾಸ್ಮೆಟಿಕ್ ಸರ್ಜರಿಯಾಗಿದೆ ಮತ್ತು ಜನರು ಪ್ಲಾಸ್ಟಿಕ್ ಸರ್ಜನ್ ಗಳನ್ನು ಮುಖ್ಯವಾಗಿ ಕಾಸ್ಮೆಟಿಕ್ ಸರ್ಜನ್ ಗಳು ಎಂದು ಪರಿಗಣಿಸುತ್ತಾರೆ. ಹಾಗಾಗಿ ಈ ಗೊಂದಲವನ್ನು ನಿವಾರಿಸಲು ವಿಶ್ವ ಪ್ಲಾಸ್ಟಿಕ್ ಸರ್ಜರಿ ದಿನವನ್ನು ಆಚರಿಸಲಾಗುತ್ತದೆ. ಈ ದಿನವು ಸಮಾಜದಲ್ಲಿ ಪ್ಲಾಸ್ಟಿಕ್ ಸರ್ಜನ್ ಗಳ ಪಾತ್ರ ಹಾಗೂ ಪ್ಲಾಸ್ಟಿಕ್ ಸರ್ಜರಿಯ ಬಗ್ಗೆ ಜಾಗೃತಿ ಮೂಡಿಸುವ ಗುರಿಯನ್ನು ಹೊಂದಿದೆ. ಹಾಗೂ ವೈದ್ಯಕೀಯ ಕ್ಷೇತ್ರದಲ್ಲಿ ಪ್ಲಾಸ್ಟಿಕ್ ಸರ್ಜರಿಯನ್ನು ಕಡಿಮೆ ಪ್ರಾಮುಖ್ಯತೆಯ ವಿಷಯವೆಂದು ಪರಿಗಣಿಸಲಾಗಿದೆ. ಆದ್ದರಿಂದ ಪ್ಲಾಸ್ಟಿಕ್ ಸರ್ಜರಿಯ ಮಹತ್ವವನ್ನು ಇಡೀ ಜಗತ್ತಿಗೆ ತಿಳಿಸಲು ಈ ದಿನವನ್ನು ಆಚರಿಸಲಾಗುತ್ತದೆ.

Disclaimer

ಈ ಪುಟದಲ್ಲಿ ಒದಗಿಸಲಾದ ಮಾಹಿತಿಯು ಜಾಗೃತಿ ಮೂಡಿಸುವ ಉದ್ದೇಶಕ್ಕಾಗಿ ಮಾತ್ರ. ಈ ಮಾಹಿತಿಯು ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಬದಲಿಯಲ್ಲ. ಯಾವುದೇ ಆರೋಗ್ಯ ಸ್ಥಿತಿಗೆ ಸಂಬಂಧಿಸಿದಂತೆ ಯಾವಾಗಲೂ ವೈದ್ಯಕೀಯ ವೃತ್ತಿಪರರ ಸಹಾಯವನ್ನು ಪಡೆದುಕೊಳ್ಳಿ.