ತಲೆ ಸ್ನಾನದ ನಂತರವೂ ಕೂದಲು ಎಣ್ಣೆಯುಕ್ತವಾಗಿ ಕಾಣಿಸುತ್ತಿದೆಯೇ? ಇದರ ಹಿಂದಿನ ಕಾರಣ ಇಲ್ಲಿದೆ..

ಮಳೆಗಾಲ ಶುರುವಾದರೆ ಸಾಕು, ಕೂದಲಿನ ಆರೈಕೆ ದೊಡ್ಡ ಸವಾಲಾಗುತ್ತದೆ. ಉತ್ತಮ ಶಾಂಪೂ ಬಳಸಿ ತಲೆ ತೊಳೆದಿದ್ದರೂ, ಕೆಲವೇ ಗಂಟೆಗಳಲ್ಲಿ ಅಥವಾ ಮಳೆನೀರು ಒಂದೆರಡು ಹನಿ ತಲೆ ಮೇಲೆ ಬಿದ್ದರೂ ಕೂದಲು ಜಿಡ್ಡಾಗಿ, ಅಂಟಿಕೊಂಡಂತೆ ಕಾಣಲು ಆರಂಭಿಸುತ್ತದೆ. ಇದರಿಂದ "ಇವಾಗಷ್ಟೇ ತಲೆ ತೊಳೆದಿದ್ದೇನೆ, ಮತ್ತೇಕೆ ಜಿಡ್ಡಾಗಿದೆ?" ಎಂಬ ಪ್ರಶ್ನೆ ಹಲವರಲ್ಲಿ ಮೂಡುತ್ತದೆ.

ವಾಸ್ತವವಾಗಿ ಇದಕ್ಕೆ ಕಾರಣ ನಿಮ್ಮ ಶಾಂಪೂ ಅಥವಾ ಕೂದಲು ಅಲ್ಲ. ಮಳೆಗಾಲದ ಹವಾಮಾನ ಮತ್ತು ಮಳೆನೀರಿನ ಗುಣಲಕ್ಷಣಗಳು. ಹಾಗಾದರೆ ಮಳೆಗಾಲದಲ್ಲಿ ಕೂದಲು ಏಕೆ ಬೇಗ ಎಣ್ಣೆಯುಕ್ತವಾಗಿ ಕಾಣಿಸುತ್ತದೆ? ಇಲ್ಲಿದೆ ಅದರ ವೈಜ್ಞಾನಿಕ ಕಾರಣಗಳು...

ಮಳೆನೀರು ಬಿದ್ದಾಗ ಕೂದಲು ಚಪ್ಪಟೆಯಾಗುತ್ತದೆ

ಮಳೆನೀರು ಕೂದಲಿನ ಮೇಲೆ ಬಿದ್ದಾಗ ಕೂದಲಿನ ಎಳೆಗಳು ಒಂದಕ್ಕೊಂದು ಅಂಟಿಕೊಳ್ಳುತ್ತವೆ. ಇದರಿಂದ ಕೂದಲಿನ ಸಹಜ ಉಬ್ಬರ (Volume) ಕಡಿಮೆಯಾಗಿ ಚಪ್ಪಟೆಯಾಗಿ ಕಾಣಿಸುತ್ತದೆ.

ಈ ವೇಳೆ ತಲೆಚರ್ಮದಲ್ಲಿರುವ ನೈಸರ್ಗಿಕ ಎಣ್ಣೆ (Sebum) ಹೆಚ್ಚು ಗೋಚರಿಸುತ್ತದೆ. ಇದರಿಂದ ಕೂದಲು ಎಣ್ಣೆ ಹಚ್ಚಿದಂತೆ ಕಾಣುತ್ತದೆ.

ತೇವಾಂಶವೇ ಪ್ರಮುಖ ಕಾರಣ

ಮಳೆಗಾಲದಲ್ಲಿ ವಾತಾವರಣದಲ್ಲಿ ತೇವಾಂಶ (Humidity) ಬಹಳ ಹೆಚ್ಚಿರುತ್ತದೆ. ಮಳೆ ಬಂದರೂ ದೇಹ ಬೆವರುವುದು ಇದೇ ಕಾರಣಕ್ಕೆ.

ಈ ಬೆವರು ತಲೆಚರ್ಮದಲ್ಲಿರುವ ನೈಸರ್ಗಿಕ ಎಣ್ಣೆಯೊಂದಿಗೆ ಸೇರಿ ಕೂದಲನ್ನು ಜಿಡ್ಡಾಗಿ, ಭಾರವಾಗಿರುವಂತೆ ಮಾಡುತ್ತದೆ. ಇದರಿಂದ ಹೊಸದಾಗಿ ತೊಳೆದ ಕೂದಲೂ ಕೆಲವೇ ಸಮಯದಲ್ಲಿ ಎಣ್ಣೆಯುಕ್ತವಾಗಿ ಕಾಣುತ್ತದೆ.

ಮಳೆನೀರು ಶುದ್ಧ ನೀರಲ್ಲ

ಹಲವರು ಮಳೆನೀರು ಸಂಪೂರ್ಣ ಶುದ್ಧ ಎಂದು ಭಾವಿಸುತ್ತಾರೆ. ಆದರೆ, ಗಾಳಿಯಲ್ಲಿರುವ ಧೂಳು, ಹೊಗೆ, ಪರಾಗಕಣಗಳು (Pollen) ಹಾಗೂ ಇತರ ಸೂಕ್ಷ್ಮ ಮಾಲಿನ್ಯ ಕಣಗಳು ಮಳೆನೀರಿನೊಂದಿಗೆ ಬೆರೆತು ಕೂದಲಿನ ಮೇಲೆ ಅಂಟಿಕೊಳ್ಳುತ್ತವೆ. ಇದರಿಂದ ಕೂದಲು ಕೊಳಕಾದಂತೆ, ಅಂಟಿಕೊಂಡಂತೆ ಹಾಗೂ ಎಣ್ಣೆಯುಕ್ತವಾಗಿ ಕಾಣುತ್ತದೆ.

ಹೇರ್ ಪ್ರಾಡಕ್ಟ್‌ಗಳ ಎಫೆಕ್ಟ್

ಲೀವ್-ಇನ್ ಕಂಡೀಷನರ್, ಹೇರ್ ಸೀರಮ್, ಡ್ರೈ ಶಾಂಪೂ, ಹೇರ್ ಪರ್ಫ್ಯೂಮ್ ಮುಂತಾದ ಉತ್ಪನ್ನಗಳನ್ನು ಹಲವರು ಬಳಸುತ್ತಾರೆ.

ಮಳೆನೀರು ತಲೆಗೆ ಬಿದ್ದಾಗ ಇವು ಮತ್ತೆ ತೇವಗೊಂಡು ತಲೆಚರ್ಮದ ಮೇಲೆ ಅಂಟಿಕೊಳ್ಳುತ್ತವೆ. ಇದರಿಂದ ಕೂದಲು ಹೆಚ್ಚು ಜಿಡ್ಡಾಗಿ ಹಾಗೂ ಭಾರವಾಗಿರುವ ಅನುಭವ ಉಂಟಾಗುತ್ತದೆ.

ಮಳೆಗಾಲದಲ್ಲಿ ಕೂದಲು ಜಿಡ್ಡಾಗದಿರಲು ಏನು ಮಾಡಬೇಕು?

• ಮಳೆಯಲ್ಲಿ ನೆನೆದ ಕೂಡಲೇ ಕೂದಲನ್ನು ಒಣ ಟವೆಲ್‌ನಿಂದ ಸೌಮ್ಯವಾಗಿ ಒರೆಸಿಕೊಳ್ಳಿ.

• ವಾರಕ್ಕೆ 2–3 ಬಾರಿ ನಿಮ್ಮ ಕೂದಲಿನ ಸ್ವಭಾವಕ್ಕೆ ತಕ್ಕ ಶಾಂಪೂ ಬಳಸಿ ತಲೆ ತೊಳೆಯಿರಿ.

• ಹೆಚ್ಚು ಪ್ರಮಾಣದಲ್ಲಿ ಹೇರ್ ಸೀರಮ್ ಅಥವಾ ಲೀವ್-ಇನ್ ಉತ್ಪನ್ನಗಳನ್ನು ಬಳಸುವುದನ್ನು ತಪ್ಪಿಸಿ.

• ಕೂದಲನ್ನು ಸಂಪೂರ್ಣ ಒಣಗಿಸಿದ ಬಳಿಕವೇ ಕಟ್ಟಿಕೊಳ್ಳಿ.

• ಮಳೆಯಲ್ಲಿ ಹೊರಗೆ ಹೋಗುವಾಗ ಛತ್ರಿ ಅಥವಾ ಕ್ಯಾಪ್ ಬಳಸುವುದು ಉತ್ತಮ.

• ತಲೆಚರ್ಮವನ್ನು ಸ್ವಚ್ಛವಾಗಿಡುವುದರಿಂದ ಎಣ್ಣೆ ಮತ್ತು ಧೂಳು ಸಂಗ್ರಹವಾಗುವುದನ್ನು ಕಡಿಮೆ ಮಾಡಬಹುದು.

ಯಾವಾಗ ವೈದ್ಯರನ್ನು ಸಂಪರ್ಕಿಸಬೇಕು?

ಮಳೆಗಾಲದಲ್ಲಿ ಜಿಡ್ಡು ಕಾಣಿಸುವುದು ಸಾಮಾನ್ಯ. ಆದರೆ, ಇದರೊಂದಿಗೆ ತೀವ್ರ ತಲೆಹೊಟ್ಟು, ತುರಿಕೆ, ಕೆಂಪಾಗುವುದು, ಕೂದಲು ಅತಿಯಾಗಿ ಉದುರುವುದು ಅಥವಾ ದುರ್ವಾಸನೆ ಕಾಣಿಸಿಕೊಂಡರೆ ಚರ್ಮರೋಗ ತಜ್ಞರನ್ನು ಸಂಪರ್ಕಿಸುವುದು ಉತ್ತಮ. ಇದು ತಲೆಚರ್ಮದ ಸೋಂಕು ಅಥವಾ ಸೆಬೋರಿಕ್ ಡರ್ಮಟೈಟಿಸ್‌ನಂತಹ ಸಮಸ್ಯೆಯ ಲಕ್ಷಣವಾಗಿರಬಹುದು.

ಮಳೆಗಾಲದಲ್ಲಿ ಕೂದಲು ಎಣ್ಣೆಯುಕ್ತವಾಗಿ ಕಾಣಿಸುವುದು ಹೆಚ್ಚಿನ ಸಂದರ್ಭಗಳಲ್ಲಿ ಹವಾಮಾನ ಮತ್ತು ತೇವಾಂಶದ ಪರಿಣಾಮವೇ ಹೊರತು ಸ್ವಚ್ಛತೆಯ ಕೊರತೆಯ ಸೂಚಕವಲ್ಲ. ಸರಿಯಾದ ಕೂದಲಿನ ಆರೈಕೆ ಮತ್ತು ಕೆಲವು ಸರಳ ಮುನ್ನೆಚ್ಚರಿಕೆಗಳನ್ನು ಪಾಲಿಸಿದರೆ ಈ ಸಮಸ್ಯೆಯನ್ನು ಸುಲಭವಾಗಿ ನಿಯಂತ್ರಿಸಬಹುದು.