ನವದೆಹಲಿ: ಎಟಿಎಂ ಉಚಿತ ಬಳಕೆ ಕುರಿತು ಆರ್‌ಬಿಐ ಜಾರಿಗೆ ತಂದಿರುವ ಹೊಸ ನಿಯಮಕ್ಕೆ ಸಂಬಂಧಿಸಿದಂತೆ ದೆಹಲಿ ಹೈಕೋರ್ಟ್ ಆರ್‌ಬಿಐಯನ್ನು ತರಾಟೆಗೆ ತೆಗೆದುಕೊಂಡಿದ್ದು, ಗ್ರಾಹಕರಿಗೆ ಅನಗತ್ಯವಾಗಿ ತೆರಿಗೆ ಹಾಕಲಾಗುತ್ತಿದೆ ಎಂದು ಹೇಳಿದೆ.
ಕೆಲವು ತಿಂಗಳ ಹಿಂದೆ ಆರ್‌ಬಿಐ ಎಟಿಎಂ ಬಳಕೆಗೆ ಹೊಸ ನಿಯಮ ಜಾರಿ ತಂದಿತ್ತು. ಈ ನಿಯಮದ ಪ್ರಕಾರ ಮೆಟ್ರೋ ನಗರಗಳಾದ ದೆಹಲಿ, ಮುಂಬೈ, ಚೆನ್ನೈ, ಕೊಲ್ಕತಾ, ಹೈದ್ರಾಬಾದ್ ಮತ್ತು ಬೆಂಗಳೂರುನಲ್ಲಿ ಬ್ಯಾಂಕ್ ಗ್ರಾಹಕರು ತಿಂಗಳಿಗೆ 5ಕ್ಕಿಂತ ಹೆಚ್ಚು ಬಾರಿ ಎಟಿಎಂನಲ್ಲಿ ಹಣ ಪಡೆದರೆ, ಅದಕ್ಕೆ ತೆರಿಗೆ ವಿಧಿಸಲಾಗುತ್ತದೆ. 5ಕ್ಕಿಂತ ಹೆಚ್ಚು ಬಾರಿ ನಡೆಸುವ ವಹಿವಾಟಿಗೆ ರು.20 ತೆರಿಗೆ ವಿಧಿಸಲಾಗುತ್ತದೆ ಎಂದು ಹೇಳಿತ್ತು.
ಇದನ್ನು ಪ್ರಶ್ನಿಸಿ ವಕೀಲೆ ಸ್ವಾತಿ ಅರ್ಗವಾಲ್ ಎಂಬುವವರು ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದ್ದರು. ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಾಲಯ ಬ್ಯಾಂಕ್‌ಗಳಿಗೆ ನೋಟೀಸ್ ನೀಡಿದೆ.
ನ್ಯಾಯಾಮೂರ್ತಿ ಜಿ.ರೋಹಿಣಿ ಮತ್ತು ನ್ಯಾಯಾಮೂರ್ತಿ ಪಿ.ಎಸ್. ತೆಜಿ ಅವರನ್ನೊಳಗೊಂಡ ನ್ಯಾಯಾಪೀಠ ಅನಗತ್ಯವಾಗಿ ಗ್ರಾಹಕರ ಮೇಲೆ ಹೊರೆ ಆಕಲಾಗುತ್ತಿದೆ. ನಿಮ್ಮ ಗ್ರಾಹಕರಿಗೆ ನಿವೇ ಏಕೆ ಅನಗತ್ಯವಾಗಿ ತೆರಿಗೆ ಹಾಕುತ್ತಿದ್ದೀರಿ? ಎಂದು ಹೇಳಿದ್ದು, ಆರ್‌ಬಿಐ, ಐಬಿಎ ಮತ್ತು ಸ್ಟೇಟ್ ಬ್ಯಾಂಕ್ ಆಪ್ ಇಂಡಿಯಾಗೆ ನೋಟೀಸ್ ನೀಡಿದೆ. ನೋಟೀಸ್‌ಗೆ ಮುಂದಿನ ವಿಚಾರಣೆ ವೇಳೆ ಉತ್ತರಿಸುವಂತೆ ಸೂಚಿಸಿದೆ.
