ನವದೆಹಲಿ: ಇಂದಿನಿಂದ ಪ್ರಾರಂಭವಾದ ಕೇಂದ್ರ ಬಜೆಟ್ ಅಧಿವೇಶನಕ್ಕೆ ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರು ಚಕ್ಕರ್‌ ಹೊಡೆದಿದ್ದಾರೆ.
ಕಳೆದ ಸಾಲು ಸಾಲು ಚುನಾವಣೆಗಳ ಸೋಲಿನಿಂದ ಕಂಗೆಟ್ಟಿರುವ ಬಗ್ಗೆ ವಿಮರ್ಶೆ ನಡೆಸಲು ಮತ್ತು 130 ವರ್ಷಗಳಷ್ಟು ಹಳೆಯದಾದ ಪಕ್ಷದ ಭವಿಷ್ಯದ ಬಗ್ಗೆ ಕಾರ್ಯತಂತ್ರ ರೂಪಿಸಲು ರಾಹುಲ್ ಗಾಂಧಿ ಅವರು ‘ಅಧ್ಯಯನ ರಜೆ’ ಪಡೆದಿದ್ದಾರೆ. ‘ಸ್ವಯಂ ಚಿಂತನ–ಮಂಥನಕ್ಕಾಗಿ ರಾಹುಲ್‌ಗೆ ರಜೆ ನೀಡಲಾಗಿದ್ದು, ಈ ವಾರಾಂತ್ಯದವರೆಗೂ ಅವರು ದೆಹಲಿಯಲ್ಲಿರುವುದಿಲ್ಲ. ಬಜೆಟ್ ಮಂಡನೆ ವೇಳೆಯೂ ಉಪಸ್ಥಿತರಿರುವುದಿಲ್ಲ’ ಎಂದು ಪಕ್ಷದ ಮೂಲಗಳು ಸ್ಪಷ್ಟಪಡಿಸಿವೆ.
ರಾಹುಲ್ ರಜೆಯ ಬಗೆಗಿನ ಪ್ರಶ್ನೆಗೆ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು, ‘ಕೆಲ ವಾರಗಳ ರಜೆ ನೀಡಲಾಗಿದೆ. ಆತನಿಗೆ ಸ್ವಲ್ಪ ಸಮಯ ಬೇಕು’ ಎಂದಷ್ಟೇ ಪ್ರತಿಕ್ರಿಯಿಸಿದ್ದಾರೆ. ‘ಪಕ್ಷದ ಭವಿಷ್ಯದ ಕಾರ್ಯತಂತ್ರದ ಬಗ್ಗೆ ಚಿಂತನ–ಮಂಥನ ನಡೆಸಲು ಸ್ವಲ್ಪ ಕಾಲಾವಕಾಶ ನೀಡುವಂತೆ ರಾಹುಲ್ ಅವರು, ಸೋನಿಯಾ ಗಾಂಧಿ ಅವರಿಗೆ ಮನವಿ ಮಾಡಿದ್ದರು ಎಂದೂ ಮೂಲಗಳು ಹೇಳಿವೆ.
ಅಧಿವೇಶನದಿಂದ ಹಿಂದೆ ಸರಿದ ರಾಹುಲ್ ಅವರ ನಿರ್ಧಾರವು ಅವರು ರಾಜಕೀಯದಿಂದ ಹಿಂದೆ ಸರಿಯುತ್ತಿರುವ ಮುನ್ಸೂಚನೆಯೇ ಎಂಬ ಪ್ರಶ್ನೆಯನ್ನು ಹುಟ್ಟುಹಾಕಿದೆ.
ಕೆಲವೊಂದು ಮೂಲಗಳ ಪ್ರಕಾರ, ರಾಹುಲ್ ಗಾಂಧಿ ಹಲವು ಕಾಂಗ್ರೆಸ್ ಹಿರಿಯ ನಾಯಕರ ವಿರುದ್ಧ ಮುನಿಸಿಕೊಂಡಿದ್ದು, ಇದೇ ಕಾರಣಕ್ಕಾಗಿ ಅವರು ಅಧಿವೇಶನದಿಂದ ದೂರ ಉಳಿಯಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.
