ಮನೆಯೆಂದರೆ ನಾಲ್ಕು ಗೋಡೆ, ಒಂದು ಛಾವಣಿಗೆ ಸೀಮಿತ ಅಲ್ಲ: ಪ್ರಧಾನಿ

ನವದೆಹಲಿ: ಗ್ರಾಹಕರ ಹಕ್ಕುಗಳನ್ನು ಎಲ್ಲಾ ಸಮಯದಲ್ಲಿಯೂ ರಕ್ಷಿಸುವುದು ತಮ್ಮ ಸರ್ಕಾರದ ಜವಾಬ್ದಾರಿಯಾಗಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ತಿಳಿಸಿದ್ದಾರೆ.

ನಗರ ಪ್ರದೇಶಗಳಲ್ಲಿ ಮನೆ ಖರೀದಿಸುವಾಗ ಜನರು ಎದುರಿಸುವ ತೊಂದರೆಗಳ ಕುರಿತು ಮಾತನಾಡಿದ ಅವರು, ಇಂದು ನಮ್ಮ ದೇಶದಲ್ಲಿ ಬಿಲ್ಡರ್ ಗಳ ಚಿತ್ರಣ ಬದಲಾಗಿದೆ. ಗ್ರಾಹಕರು ಅವರನ್ನು ಋಣಾತ್ಮಕವಾಗಿ ನೋಡುತ್ತಾರೆ.

ನಗರಗಳ ಖಾಸಗಿ ಬಿಲ್ಡರ್ ಗಳ ಮೇಲೆ ವಾಗ್ದಾಳಿ ನಡೆಸಿದ ಪ್ರಧಾನಮಂತ್ರಿ, ನಗರಗಳು ಹೇಗೆ ಬೆಳೆಯಬೇಕು ಎಂಬುದನ್ನು ಖಾಸಗಿ ಬಿಲ್ಡರ್ ಗಳು ನಿರ್ಧಾರ ಮಾಡಬಾರದು. ಅದನ್ನು ನಗರ ನಿವಾಸಿಗಳು ಮತ್ತು  ನಾಯಕರು ನಿರ್ಧಾರ ಮಾಡಬೇಕು ಎಂದು ಹೇಳಿದರು.

ಮನೆ ಖರೀದಿಸುವವರಿಗೆ ಎದುರಾಗುವ ಸಮಸ್ಯೆಗಳನ್ನು ಆಲಿಸಲು ಶೀಘ್ರವೇ ಕಾನೂನನ್ನು ಜಾರಿಗೆ ತರಲಾಗುವುದು. ಸ್ವಂತ ಸೂರು ಹೊಂದುವುದು ಪ್ರತಿಯೊಬ್ಬರ ಕನಸಾಗಿರುತ್ತದೆ. ಮನೆಯೆಂದರೆ ನಾಲ್ಕು ಗೋಡೆ ಮತ್ತು ಛಾವಣಿಗೆ ಸೀಮಿತವಾಗಿಲ್ಲ. ಅದರಿಂದಾಚೆ ಅನೇಕ ವಿಷಯಗಳಿರುತ್ತವೆ ಎಂದು ಪ್ರಧಾನಿ ಹೇಳಿದರು.