ಡ್ರೈವ್ ಮಾಡುತ್ತಲೇ ನ್ಯಾಯಾಧೀಶರ ಹತ್ಯೆಗೈದ ಐಸಿಸ್

ಕೈರೋ: ಟ್ಯುನೀಷಿಯಾ ಮತ್ತು ಕುವೈತ್ ದಾಳಿ ಬೆನ್ನಲ್ಲೇ ಐಸಿಸ್ ಉಗ್ರರು ಈಜಿಪ್ಟ್ ನಲ್ಲಿ ಹಲವು ಹೈ ಪ್ರೊಫೈಲ್ ನ್ಯಾಯಾಧೀಶರನ್ನು ಹತ್ಯೆಗೈಯ್ಯುವ ಭಯಾನಕ ವಿಡಿಯೋವನ್ನು
ಬಹಿರಂಗಪಡಿಸಿದೆ.

ಸೋಮವಾರ ಕಾರು ಬಾಂಬ್ ಸ್ಫೋಟದಲ್ಲಿ ಈಜಿಪ್ಟ್ ನ ಖ್ಯಾತ ನ್ಯಾಯವಾದಿ ಹಿಶಾಮ್ ಬರಾಕತ್ ಮೃತಪಟ್ಟ ಕೆಲವೇ ಗಂಟೆಗಳಲ್ಲಿ ಈ ವಿಡಿಯೋ ಬಿಡುಗಡೆಯಾಗಿದೆ. ಈ ಸ್ಫೋಟ ನಡೆಸಿದ್ದೂ ಈಜಿಪ್ಟ್ ನಲ್ಲಿರುವ ಐಸಿಸ್ ಅಂಗಸಂಸ್ಥೆ. ಬರಾಕತ್ ಅವರು ನೂರಾರು ಮಂದಿ ಇಸ್ಲಾಮಿಕ್ ಉಗ್ರರ ವಿರುದ್ಧವಾದ ಮಾಡಿದವರು. ಈ ಘಟನೆ ನಡೆದ ಸ್ವಲ್ಪ ಹೊತ್ತಲ್ಲೇ ನ್ಯಾಯಾಧೀಶರಿದ್ದ ಕಾರಿನ ಮೇಲೆ ದಾಳಿ ನಡೆಸುವ ವಿಡಿಯೋವನ್ನು ಉಗ್ರರು ಬಿಡುಗಡೆ ಮಾಡಿದ್ದಾರೆ. ಉಗ್ರರು ಕುಳಿತಿದ್ದ ಕಾರು ನ್ಯಾಯಾಧೀಶರಿದ್ದ ಕಾರಿನ ಸಮೀಪಕ್ಕೆ ಬರುತ್ತಿದ್ದಂತೆ ಗನ್ ತೆಗೆಯುವ ಇಬ್ಬರು, ನ್ಯಾಯಾಧೀಶರಿದ್ದ ಕಾರಿನ ಮೇಲೆ ಗುಂಡಿನ ಮಳೆಗೆರೆಯುವ ಭೀಕರ ದೃಶ್ಯ ವಿಡಿಯೋದಲ್ಲಿ ಸೆರೆಯಾಗಿದೆ ಎಂದು ಡೈಲಿ ಮೇಲ್ ವರದಿ ಮಾಡಿದೆ.

ಇಸ್ಲಾಮಿಕ್ ಸ್ಟೇಟ್ ಎನ್ನಬೇಡಿ
ಐಸಿಸ್ ಅನ್ನು ಇಸ್ಲಾಮಿಕ್ ಸ್ಟೇಟ್ ಎಂದು ಕರೆಯಬೇಡಿ. ಹಾಗೆ ಕರೆದರೆ ಜಗತ್ತಿನಲ್ಲಿರುವ ಎಷ್ಟೋ ಮುಸ್ಲಿಮರಿಗೆ ಜಿಗುಪ್ಸೆ ಹುಟ್ಟಬಹುದು. ಶ್ರೇಷ್ಠ ಧರ್ಮವೊಂದನ್ನು ಉಗ್ರರು ಈ ರೀತಿ ಅಡ್ಡದಾರಿಗೆ ಎಳೆಯುತ್ತಿರುವ ಬಗ್ಗೆ ಬೇಸರವಾಗಬಹುದು ಎಂದು ಬ್ರಿಟನ್ ಪ್ರಧಾನಿ ಡೇವಿಡ್ ಕ್ಯಾಮರೂನ್ ಅವರು ಸೋಮವಾರ ಬಿಬಿಸಿಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.