ಚೆನ್ನೈ: `ಇಂದಿರಾಗಾಂಧಿ ಶಾಂತಿ ಪ್ರಶಸ್ತಿ' ಘೋಷಣೆಯಾದ ಮಾರನೇ ದಿನವೇ ಇಸ್ರೋಗೆ ಮತ್ತೊಂದು ಸಿಹಿ. ಅಮೆರಿಕದ ಜಿಪಿಎಸ್‍ಗೆ ಪರ್ಯಾಯವಾಗಿ ಇಸ್ರೋ ಐಆರ್‍ಎನ್‍ಎಸ್ ಎಸ್-1ಡಿ ಉಪಗ್ರಹವನ್ನು ಶನಿವಾರ ಯಶಸ್ವಿಯಾಗಿ ಉಡಾವಣೆ ಮಾಡಿದೆ.
ಆಂಧ್ರದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಸಂಜೆ ಸರಿಯಾಗಿ 5.19ಕ್ಕೆ ನಭಕ್ಕೆ ಚಿಮ್ಮಿದ ಬಾಹ್ಯಾಕಾಶ ನೌಕೆ ಪಿಎಸ್‍ಎಲ್‍ವಿ-ಸಿ27 ಸ್ವಲ್ಪ ಹೊತ್ತಲ್ಲೇ 1,425 ಕೆಜಿ ತೂಕದ ಐಆರ್‍ಎನ್‍ಎಸ್‍ಎಸ್-1ಡಿ(ಇಂಡಿಯನ್ ರೀಜನಲ್ ನ್ಯಾವಿಗೇಷನ್ ಸ್ಯಾಟಲೈಟ್ ಸಿಸ್ಟಂ) ಉಪಗ್ರಹವನ್ನು ಕಕ್ಷೆಗೆ ಸೇರಿಸಿತು.
ಇಸ್ರೋ ಉಡಾವಣೆ ಮಾಡಲುದ್ದೇಶಿಸಿರುವ 7 ಉಪಗ್ರಹಗಳ ಸರಣಿಯಲ್ಲಿ ಇದು ನಾಲ್ಕನೆಯದು. ಈ ಉಪಗ್ರಹಗಳ ಮೂಲಕ ಐಆರ್‍ಎನ್‍ಎಸ್‍ಎಸ್ ವ್ಯವಸ್ಥೆಯ ಕಾರ್ಯನಿರ್ವಹಣೆ ಆರಂಭಿಸುವುದು ಇಸ್ರೋ ಉದ್ದೇಶ. ಹಿಂದಿನ ಮೂರು ಉಡಾವಣೆಯ ಮಾದರಿಯಲ್ಲೇ ಇಸ್ರೋ ಈ ಬಾರಿಯೂ ಪಿಎಸ್‍ಎಲ್‍ವಿಯ `ಎಕ್ಸ್‍ಎಲ್' ಆವೃತ್ತಿಯನ್ನು ಬಳಸಿತು. ಚಂದ್ರಯಾನ 1, ಜಿಸ್ಯಾಟ್ 12, ರಿಸ್ಯಾಟ್ 1, ಐಆರ್‍ಎನ್ನೆಸ್ಸೆಸ್-1ಎ, ಮಾರ್ಸ್ ಆರ್ಬಿಟರ್ ಸ್ಪೇಸ್‍ಕ್ರಾಫ್ಟ್, ಐಆರೆನ್ನೆಸ್ಸೆಸ್-1ಬಿ ಮತ್ತು ಐಆರೆನ್ನೆಸ್ಸೆಸ್-1ಸಿ ಯಲ್ಲೂ ಇದೇ ಆವೃತ್ತಿಯನ್ನು ಬಳಸಲಾಗಿತ್ತು.
2 ಪೇಲೋಡ್‍ಗಳು: ಐಆರೆನ್ನೆಸ್ಸೆಸ್ 1ಡಿ ಎರಡು ಪೇಲೋಡ್‍ಗಳನ್ನು ಹೊಂದಿದೆ. ಮೊದಲನೆಯದ್ದು ನೇವಿಗೇಷನ್, ಎರಡನೆಯದ್ದು ರೇಂಜಿಂಗ್ ಪೇಲೋಡ್. ಇಲ್ಲಿ ನೇವಿಗೇಷನ್ ಪೇಲೋಡ್ ಬಳಕೆದಾರರಿಗೆ ದಿಶಾದರ್ಶನ ಸೇವೆಯ ಸಿಗ್ನಲ್‍ಗಳನ್ನು ರವಾನಿಸುತ್ತದೆ. ರೇಜಿಂಗ್ ಪೇಲೋಡ್ ಉಪಗ್ರಹದ ಸ್ಪಷ್ಟ ವ್ಯಾಪ್ತಿಯನ್ನು ಕಂಡುಹಿಡಿಯುತ್ತದೆ. ಒಟ್ಟಾರೆ ಈ ಹೊಸ ಉಪಗ್ರಹವು ಭೂಮಿಯಲ್ಲಿರುವ ವ್ಯಕ್ತಿಗೆ ತಾನಿರುವ ಭೌಗೋಳಿಕ ಪ್ರದೇಶವನ್ನು ಪತ್ತೆಹಚ್ಚಲು ನೆರವಾಗುತ್ತದೆ ಎಂದಿದ್ದಾರೆ ಇಸ್ರೋ ಅಧ್ಯಕ್ಷ ಎ.ಎಸ್.ಕಿರಣ್‍ಕುಮಾರ್.
