ನವದೆಹಲಿ: ದಾದ್ರಿ ದುರ್ಘಟನೆಯ ರಾಜಕೀಯ ಕಿಚ್ಚಿಗೆ ತುಪ್ಪ ಸುರಿದಿರುವ ಬಿಜೆಪಿ ಸಂಸದ ಸಾಕ್ಷಿ ಮಹಾರಾಜ್ ಅವರು, ಗೋವುಗಳ ರಕ್ಷಣೆಗಾಗಿ ಬೆರೆಯವರನ್ನು ಸಾಯಿಸಲು ಮತ್ತು ತಾನೂ ಸಾಯಲು ಸಿದ್ಧ ಎಂದಿದ್ದಾರೆ.
'ನಮ್ಮ ತಾಯಿಗೆ ಆಗುವ ಅವಮಾನವನ್ನು ನಾವು ಸಹಿಸಿಕೊಳ್ಳುವುದಿಲ್ಲ. ಇದಕ್ಕಾಗಿ ನಾವು ಸಾಯಲು ಮತ್ತು ಸಾಯಿಸಲೂ ಸಿದ್ದ' ಎಂದು ಸಾಕ್ಷಿ ಮಹಾರಾಜ್ ಹೇಳಿದ್ದಾರೆ.
ದಾದ್ರಿ ಪ್ರಕರಣ ನಿರ್ವಹಣೆಯಲ್ಲಿ ಉತ್ತರ ಪ್ರದೇಶ ಸರ್ಕಾರ ವಿಫಲವಾಗಿದೆ ಎಂದು ಆರೋಪಿಸಿದ ಸಾಕ್ಷಿ ಮಹಾರಾಜ್, ಈ ವಿಚಾರದಲ್ಲಿ ಸಮಾಜವಾದಿ ಪಕ್ಷ ದ್ವಂದ್ವ ನಿಲುವು ತಾಳಿದೆ ಎಂದಿದ್ದಾರೆ.
ಇಖ್ಲಾಕ್ ಕುಟುಂಬಕ್ಕೆ ಅಖಿಲೇಶ್ ಯಾದವ್ ಅವರು 45 ಲಕ್ಷ ರುಪಾಯಿ ಪರಿಹಾರ ಘೋಷಿಸಿರುವುದಕ್ಕೆ ನನ್ನ ವಿರೋಧ ಇಲ್ಲ. ಆದರೆ ಉನ್ನಾವೊದಲ್ಲಿ ಇಬ್ಬರು ಬಾಲಕಿಯರನ್ನು ರೇಪ್ ಮಾಡಿ ಹತ್ಯೆ ಮಾಡಿದ ಪ್ರಕರಣದಲ್ಲಿ ಅವರು ಯಾವುದೇ ಪರಿಹಾರ ನೀಡಿಲ್ಲ ಎಂದರು.
ಇದೇ ವೇಳೆ ಸಮಾಜವಾದಿ ಪಕ್ಷದ ನಾಯಕ ಅಜಂ ಖಾನ್ ವಿರುದ್ಧವೂ ವಾಗ್ದಾಳಿ ನಡೆಸಿದ ಸಾಕ್ಷಿ ಮಹಾರಾಜ್, 'ಅಜಂ ಖಾನ್ ಒಬ್ಬ ಪಾಕಿಸ್ತಾನಿ. ಪಾಕ್ ರಾಜಕೀಯದಲ್ಲಿ ಅವರಿಗೆ ವಿಶ್ವಾಸವಿದೆ' ಎಂದರು.
