ಕಾರಿನಲ್ಲಿ ಉಸಿರುಗಟ್ಟಿ ಇಬ್ಬರು ಹೆಣ್ಣುಮಕ್ಕಳ ಸಾವು

ಗುರ್ಗಾಂವ್: ಕಾರಿನ ಒಳಗೆ ಆಟವಾಡಲು ಹೋದಾಗ ಕಾರಿನ ಬಾಗಿಲು ಲಾಕ್ ಆಗಿದ್ದರಿಂದ ಇಬ್ಬರು ಹೆಣ್ಣುಮಕ್ಕಳು ಉಸಿರುಗಟ್ಟಿ ಸಾವನ್ನಪ್ಪಿದ ಘಟನೆ ಹರಿಯಾಣದ ಗುರ್ಗಾಂವ್ ನಲ್ಲಿ ನಡೆದಿದೆ.

ಹಿಮಾಂಶಿ(4) ಮತ್ತು ಪಿಂಕಿ(2) ಮೃತಪಟ್ಟ ಮಕ್ಕಳು. ಹಿಮಾಂಶಿ ತನ್ನ ತಂಗಿ ಪಿಂಕಿಯೊಂದಿಗೆ ಆಟಕ್ಕಾಗಿ ಮನೆಯ ಮುಂದೆ ನಿಂತಿದ್ದ ಕಾರಿನಲ್ಲಿ ಹತ್ತಿದ್ದಾರೆ. ಹೈಡ್ ಅಂಡ್ ಸೀಕ್ ಆಟವಾಡುವ ಭರದಲ್ಲಿ ಕಾರಿನ ಬಾಗಿಲುಗಳು ಆಕಸ್ಮಾತ್ ಆಗಿ ಒಳಗಿನಿಂದ ಲಾಕ್ ಆದ ಕಾರಣ ಬಹಳ ಹೊತ್ತು ಇಬ್ಬರು ಕಾರಿನಲ್ಲಿ ಸಿಲುಕಿಕೊಂಡಿದ್ದಾರೆ.

ಬಹಳ ಹೊತ್ತಾದರೂ ಮನೆಯಲ್ಲಿ ಮಕ್ಕಳು ಕಾಣದಾದಾಗ ಅವರ ತಂದೆ ಹುಡುಕಾಟ ನಡೆಸಿದ್ದಾರೆ. ಆದರೆ ಮಕ್ಕಳು ಎಲ್ಲಿಯೂ ಕಾಣದ ಇದ್ದಾಗ ಪೊಲೀಸ್ ಠಾಣೆಯಲ್ಲಿ ದೂರು ನೀಡೋಣವೆಂದು ಕಾರ್ ಹತ್ತಲು ನೋಡಿದಾಗ ಮಕ್ಕಳಿಬ್ಬರು ಪ್ರಜ್ಞಾಹೀನ ಸ್ಥಿತಿಯಲ್ಲಿರುವುದು ಕಂಡುಬಂದಿದೆ.

ಗಾಬರಿಗೊಂಡ ತಂದೆ ಕೂಡಲೇ ಅವರಿಬ್ಬರನ್ನು ಆಸ್ಪತ್ರೆಗೆ ಕೊಂಡೊಯ್ದರಾದರೂ ಅವರಾಗಲೇ ಮೃತಪಟ್ಟಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ. ಈ ಕುರಿತು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.