ಸಬ್ಸಿಡಿ ಸಹಿತ ಸಿಲಿಂಡರ್ ಬೆಲೆ 1 ರೂಪಾಯಿ 93 ಪೈಸೆ ಏರಿಕೆ

ನವದೆಹಲಿ: ಸಬ್ಸಿಡಿ ಅಡುಗೆ ಅನಿಲದ ಬೆಲೆ ಪ್ರತಿ ಸಿಲಿಂಡರ್ ಗೆ 1ರೂಪಾಯಿ 93 ಪೈಸೆ ಏರಿಕೆಯಾಗಿದೆ. ಕಳೆದ ಒಂದು ತಿಂಗಳಲ್ಲಿ ಇದು ಎರಡನೇ ಬಾರಿ ಅಡುಗೆ ಅನಿಲದ ಬೆಲೆ ಏರಿಕೆಗೊಂಡಿದೆ. ಈ ಮಧ್ಯೆ ಕೇಂದ್ರ ಸರ್ಕಾರ ಸಬ್ಸಿಡಿ ಸಿಲಿಂಡರ್ ಗಳ ವಿತರಣೆಯನ್ನು ಕಡಿತಗೊಳಿಸಲು ಮುಂದಾಗಿದೆ.

ಈ ಬಾರಿ ಬೆಲೆ ಹೆಚ್ಚಳದ ನಂತರ ರಾಜಧಾನಿ ದೆಹಲಿಯಲ್ಲಿ 14.2 ಕೆಜಿ ತೂಕದ ಸಬ್ಸಿಡಿ ಸಿಲಿಂಡರ್ ಬೆಲೆ 421 ರೂಪಾಯಿ 16 ಪೈಸೆಯಷ್ಟಾಗಿದೆ.  

ಬೆಂಗಳೂರಿನಲ್ಲಿ ಸಬ್ಸಿಡಿ ಸಹಿತ ಸಿಲಿಂಡರ್ ಬೆಲೆ 428 ರೂಪಾಯಿ 50 ಪೈಸೆಯಷ್ಟಾಗಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆಯಲ್ಲಿನ ವ್ಯತ್ಯಾಸದಂತೆ ಮೊನ್ನೆ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಕಡಿಮೆ ಮಾಡಿದ್ದ ಕೇಂದ್ರ ಸರ್ಕಾರ ಎಲ್ ಪಿಜಿ ಬೆಲೆ ಹೆಚ್ಚಿಸುವ ಮೂಲಕ ಗ್ರಾಹಕರಿಗೆ ಸ್ವಲ್ಪ ಶಾಕ್ ನೀಡಿದೆ.

ಅದೇ ರೀತಿ ಕೇಂದ್ರ ಸರ್ಕಾರ ದೇಶೀಯ ತೈಲ ಕಂಪೆನಿಗಳಿಗೆ 10 ತಿಂಗಳವರೆಗೆ ಪ್ರತಿ ತಿಂಗಳು 25 ಪೈಸೆಯಂತೆ ಸೀಮೆಎಣ್ಣೆ ಬೆಲೆಯನ್ನು ಹೆಚ್ಚಿಸಲು ಸೂಚಿಸಿದೆ. ಅದರಂತೆ ಕಳೆದ ತಿಂಗಳು ಮೊದಲ ಬಾರಿಗೆ 25 ಪೈಸೆ ಹೆಚ್ಚಳವಾಗಿದ್ದ ಸೀಮೆ ಎಣ್ಣೆ ಬೆಲೆ ನಿನ್ನೆ ಮತ್ತೆ 25 ಪೈಸೆಯಷ್ಟು ಹೆಚ್ಚಾಗಿದೆ. ಒಂದು ಲೀಟರ್ ಸೀಮೆಎಣ್ಣೆ ಬೆಲೆ ರಾಜಧಾನಿ ದೆಹಲಿಯಲ್ಲಿ 15 ರೂಪಾಯಿ 46 ಪೈಸೆಯಷ್ಟಾಗಿದೆ.

ಇದೇ ಸಂದರ್ಭದಲ್ಲಿ ತೈಲ ನಿಗಮಗಳು ಸಬ್ಸಿಡಿರಹಿತ ಸಿಲಿಂಡರ್ ಗಳ ಬೆಲೆಯನ್ನು 50 ರೂಪಾಯಿ 5 ಪೈಸೆಯಷ್ಟು ಕಡಿತಗೊಳಿಸಿದೆ. ಸಬ್ಸಿಡಿರಹಿತ ಸಿಲಿಂಡರ್ ಗಳ ಬೆಲೆ ದೆಹಲಿಯಲ್ಲಿ ಇದೀಗ 14.2 ಕೆಜಿಯದ್ದಕ್ಕೆ 487 ರೂಪಾಯಿಯಷ್ಟಾಗಿರುತ್ತದೆ. ಬೆಂಗಳೂರಿನಲ್ಲಿ ಸಬ್ಸಿಡಿರಹಿತ ಸಿಲಿಂಡರ್ ಗಳ ಬೆಲೆ 546 ರೂಪಾಯಿ 50 ಪೈಸೆಯಷ್ಟಾಗಿರುತ್ತದೆ. ಈ ಮಧ್ಯೆ ಟರ್ಬೈನ್ ಇಂಧನದ ಬೆಲೆ 4 ರೂಪಾಯಿ 2 ಪೈಸೆಯಷ್ಟು ಕಡಿತಗೊಂಡಿದೆ.