ನವದೆಹಲಿ: ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರ ಯಾವುದೇ ಭದ್ರತೆ ಒದಗಿಸುವಂತೆ ಕೇಳದಿದ್ದರೂ ಅವರ ಭದ್ರತೆಗೆ ಸಂಬಂಧಿಸಿದ ಮಾಹಿತಿಯನ್ನು ದೆಹಲಿ ಪೊಲೀಸರು ಸೋರಿಕೆ ಮಾಡುತ್ತಿದ್ದಾರೆ ಎಂದು ಮಂಗಳವಾರ ಆಮ್ ಆದ್ಮಿ ಪಕ್ಷ ಆರೋಪಿಸಿದೆ.
ಕೇಜ್ರಿವಾಲ್ ಅವರ ಪಿಎ ವೇದಿಕೆಯಿಂದ ಕೆಳಗಿಳಿಯುವಂತೆ ಪೊಲೀಸರಿಗೆ ಸೂಚಿಸಿದ್ದರು ಎಂಬ ಕೆಲವು ಮಾಧ್ಯಮಗಳ ವರದಿಯ ಬಗ್ಗೆ ಪ್ರತಿಕ್ರಿಯಿಸಿರುವ ಎಎಪಿ ನಾಯಕ ದಿಲಿಪ್ ಪಾಂಡೆ ಅವರು, ದೆಹಲಿ ಪೊಲೀಸರು ಆ ಪೊಲೀಸ್ ಅಧಿಕಾರಿಯ ಹೆಸರು ಬಹಿರಂಗ ಪಡಿಸಿದರೆ, ಆ ಬಗ್ಗೆ ತನಿಖೆ ನಡೆಸಲಾಗುವುದು ಎಂದರು.
'ದೆಹಲಿ ಪೊಲೀಸರು ಸಿಎಂ ಭದ್ರತೆಗೆ ಸಂಬಂಧಿಸಿದ ಮಾಹಿತಿಯನ್ನು ಸೋರಿಕೆ ಮಾಡುತ್ತಿದ್ದಾರೆ. ಈ ಮೂಲಕ ದೆಹಲಿ ಸಿಎಂ ಮೇಲೆ ನಾಳೆ ನಡೆಯಬಹುದಾದ ದಾಳಿಯಿಂದ ತಾವೂ ಸುರಕ್ಷಿತವಾಗಲು ವೇದಿಕೆ ಸಿದ್ಧಪಡಿಸಿಕೊಳ್ಳುತ್ತಿದ್ದಾರೆ' ಎಂದು ಆಪ್ ನಾಯಕ ಆರೋಪಿಸಿದರು.
ಭದ್ರತಾ ಸಿಬ್ಬಂದಿಯನ್ನು ವೇದಿಕೆಯಿಂದ ಕೇಳಗಿಳಿಯುವಂತೆ ಸೂಚಿಸಿದ ಕೇಜ್ರಿವಾಲ್ ಅವರ ಪಿಎ ಯಾರೂ ಎಂಬುದನ್ನು ಬಹಿರಂಗಪಡಿಸಲಿ. ಆ ಬಗ್ಗೆ ನಾವು ತನಿಖೆ ನಡೆಸುತ್ತೇವೆ ಎಂದು ಪಾಂಡೆ ಹೇಳಿದರು.
ಕಳೆದ ಭಾನುವಾರ ಯುವತಿಯೊಬ್ಬರು ಕೇಜ್ರಿವಾಲ್ ಅವರ ಮೇಲೆ ಮಸಿ ದಾಳಿ ನಡೆಸಿದ್ದರು.
