ನಿತಿಶ್ ಕುಮಾರ್ ಭಾಷಣದ ವೇಳೆ 'ಮೋದಿ ಮೋದಿ' ಘೋಷಣೆ ಕೂಗದಂತೆ ಸೂಚಿಸಿದ ಪ್ರಧಾನಿ

ಹಜಿಪುರ: ಬಿಹಾರ ಮುಖ್ಯಮಂತ್ರಿ ನಿತಿಶ್ ಕುಮಾರ್ ಅವರು ಭಾಷಣ ಮಾಡುತ್ತಿದ್ದ ವೇಳೆ 'ಮೋದಿ ಮೋದಿ' ಎಂದು ಘೋಷಣೆ ಕೂಗಲು ಆರಂಭಿಸಿದ ಕೆಲವು ಕಾರ್ಯಕರ್ತರಿಗೆ ಶನಿವಾರ ಪ್ರಧಾನಿ ನರೇಂದ್ರ ಮೋದಿ ಅವರು ಘೋಷಣೆ ಕೂಗದೇ ಶಾಂತವಾಗಿರುವಂತೆ ಸೂಚಿಸಿದರು.

ನಿತಿಶ್ ಕುಮಾರ್ ಇಂದು ಹಜಿಪುರದಲ್ಲಿ ನಿರ್ಮಾಣವಾಗಿರುವ ನೂತನ ದಿಘಾ-ಸೋನೆಪುರ್ ರೈಲ್ ಹಾಗೂ ರಸ್ತೆ ಸೇತುವೆ ಉದ್ಘಾಟನಾ ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡುತ್ತಿದ್ದರು. ಈ ವೇಳೆ ಕೆಲವರು ಮೋದಿ ಮೋದಿ ಎಂದು ಘೋಷಣೆ ಕೂಗಲು ಆರಂಭಿಸಿದರು. ವೇದಿಕೆಯಲ್ಲಿದ್ದ ಪ್ರಧಾನಿ ಮೋದಿ ಅವರು ಕೂಡಲೇ ಎದ್ದು ನಿಂತು, ಘೋಷಣೆ ಕೂಗುತ್ತಿದ್ದ ಸಮೂಹವನ್ನು ಶಾಂತವಾಗಿಸಲು ಯತ್ನಿಸಿದರು. 

ಬಿಹಾರ ವಿಧಾಸಭೆ ಚುನಾವಣೆ ಸೋಲಿನ ನಂತರ ಇದೇ ಮೊದಲ ಬಾರಿಗೆ ರಾಜ್ಯಕ್ಕೆ ಆಗಮಿಸಿದ್ದ ಪ್ರಧಾನಿ ಮೋದಿ ಹಾಗೂ ನಿತಿಶ್ ಕುಮಾರ್ ಅವರು ನಗು ನಗುತ್ತಲೇ ವೇದಿಕೆ ಅಲಂಕರಿಸಿದ್ದು ಕಂಡು ಬಂತು.

ಇದಕ್ಕೂ ಮುನ್ನ ದಿಘಾ-ಸೋನೆಪುರ್ ರೈಲ್ ಹಾಗೂ ರಸ್ತೆ ಸೇತುವೆ ಉದ್ಘಾಟಿಸಿ ಮಾತನಾಡಿದ ಮೋದಿ, ಭಾರತದ ಅಭಿವೃದ್ಧಿಯಲ್ಲಿ ಬಿಹಾರದ ಬೆಳವಣಿಗೆ ಪ್ರಮುಖ ಪಾತ್ರ ವಹಿಸುತ್ತದೆ ಮತ್ತು ಭಾರತದ ಅಭಿವೃದ್ಧಿಯಲ್ಲಿ ದೇಶದ ಪೂರ್ವ ಭಾಗಗಳು ಪ್ರಮುಖ ಪಾತ್ರವಹಿಸಲಿವೆ ಎಂದರು.