ಸೂರತ್: ಪಾಕ್ ಉಗ್ರರ ಭಾವಚಿತ್ರವುಳ್ಳ ಬ್ಯಾನರ್‌ನಲ್ಲಿ ಕೇಜ್ರಿವಾಲ್‌ಗೂ ಸ್ಥಾನ

ನವದೆಹಲಿ: ಅಕ್ಟೋಬರ್ 16ರಂದು ಆಮ್ ಆದ್ಮಿ ಪಾರ್ಟಿ(ಆಪ್) ಸೂರತ್ ನಲ್ಲಿ ಬೃಹತ್ ರ್ಯಾಲಿ ನಡೆಸಲಿದ್ದು ಈ ರ್ಯಾಲಿಯಲ್ಲಿ ಭಾಗವಹಿಸಲು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಆಗಮಿಸುತ್ತಿದ್ದಾರೆ. ಇದಕ್ಕೂ ಮುನ್ನ ನಗರದ ಪ್ರಮುಖ ರಸ್ತೆಯೊಂದರಲ್ಲಿ ಪಾಕಿಸ್ತಾನ ಹಿರೋಗಳಾದ ಉಗ್ರ ಬುರ್ಹಾನ್ ವಾನಿ, ಹಫೀಜ್ ಸೈಯಿದ್, ಒಸಾಮಾ ಬಿನ್ ಲಾಡನ್ ಜತೆಗೆ ಅರವಿಂದ್ ಕೇಜ್ರಿವಾಲ್ ಭಾವಚಿತ್ರವುಳ್ಳ ಬ್ಯಾನರ್ ಸಹ ರಾರಾಜಿಸುತ್ತಿದೆ. 

ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದ ಮೇಲಿನ ಭಾರತೀಯ ಸೇನೆ ಸೀಮಿತಯ ದಾಳಿಯನ್ನು ಪ್ರಶ್ನಿಸಿ ಪಾಕಿಸ್ತಾನ ಮಾಧ್ಯಮಗಳಲ್ಲಿ ಹಿರೋ ಆದ ಆಮ್ ಆದ್ಮಿ ಪಕ್ಷದ ಮುಖಂಡ ಅರವಿಂದ್ ಕೇಜ್ರಿವಾಲ್ ಅವರ ಭಾವಚಿತ್ರ ಉಗ್ರರಿರುವ ಬ್ಯಾನರ್ ನಲ್ಲಿದ್ದು ಇದೀಗ ವಿವಾದಕ್ಕೆ ಕಾರಣವಾಗಿದೆ. 

ಈ ಬ್ಯಾನರ್ ಬಿಜೆಪಿ ಹಾಕಿದೆ ಎಂದು ಆಪ್ ಆರೋಪಿಸಿದ್ದು ಇದಕ್ಕೆ ಬಿಜೆಪಿ ಇದಕ್ಕೂ ನಮಗೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಿದೆ. 

ಪ್ರಮುಖ ರಸ್ತೆಗಳಲ್ಲಿ ಹಾಕಲಾಗಿದ್ದ ಹಲವು ಬ್ಯಾನರ್ ಗಳನ್ನು ಕಿತ್ತು ಹಾಕಿರುವ ಆಪ್ ಕಾರ್ಯಕರ್ತರು ಇನ್ನುಳಿದ ಬ್ಯಾನರ್ ಗಳನ್ನು ತೆಗೆದು ಹಾಕಲಾಗುವುದು ಎಂದು ತಿಳಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಆಪ್ ಮುಖಂಡ ಯೋಗೇಶ್ ಜಾಡ್ವಾನಿ ಇಂತ ನೀಚ ಕೃತ್ಯವನ್ನು ಬಿಜೆಪಿಯೇ ಮಾಡಿದೆ ಎಂದು ಆರೋಪಿಸಿದ್ದಾರೆ.