ಯೋಧರಿಗೆ ವಿಷಾಹಾರ ಪ್ರಕರಣ: ತನಿಖೆಗೆ ಆಗ್ರಹಿಸಿದ ಸಿಆರ್'ಪಿಎಫ್

ನವದೆಹಲಿ: ವಿಷಾಹಾರ ಸೇವಿಸಿ 400ಕ್ಕೂ ಹೆಚ್ಚು ಯೋಧರು ಅಸ್ವಸ್ತರಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇಂದ್ರೀಯ ಮೀಸಲು ಪೊಲೀಸ್ ಪಡೆ (ಸಿಆರ್'ಪಿಎಫ್) ಅಧಿಕಾರಿಗಳು ಭಾನುವಾರ ತನಿಖೆಗೆ ಆಗ್ರಹಿಸಿದ್ದಾರೆ. 

ಕೇರಳದ ಪಲ್ಲಿಪುರಂನಲ್ಲಿ ಸಿಆರ್'ಪಿಎಫ್ ಶಿಬಿರದಲ್ಲಿ ಕಳೆದ ರಾತ್ರಿ ನೀಡಲಾಗಿದ್ದ ಆಹಾರ ಸೇವಿಸಿ 400ಕ್ಕೂ ಹೆಚ್ಚು ಯೋಧರು ಅಸ್ವಸ್ತರಾಗಿದ್ದರು. 

ಪ್ರಕರಣ ಸಂಬಂಧ ಪ್ರತಿಕ್ರಿಯೆ ನೀಡಿರುವ ಸಿಆರ್'ಪಿಎಪ್ ಡೈರೆಕ್ಟರ್ ಜನರಲ್ ಸುದೀಪ್ ಲಖ್ತಾಕಿಯಾ ಅವರು, ತರಬೇತಿ ಶಿಬಿರಕ್ಕೆ ಹೋಗಿದ್ದ ಯೋಧರಿಗೆ ಮೀನಿನ ಆಹಾರವನ್ನು ನೀಡಲಾಗಿದೆ. ಆಹಾರ ಸೇವಿಸುತ್ತಿದ್ದಂತೆಯೇ ಯೋಧರಿಗೆ ವಾಕರಿಕೆ ಬರಲು ಆರಂಭವಾಗಿದೆ. ನಂತರ ಹಲವು ಯೋಧರು ಹೊಟ್ಟೆನೋವು ಹಾಗೂ ವಾಂತಿ ಆರಂಭವಾಗಿತ್ತು. ಕೂಡಲೇ ಯೋಧರಿಗೆ ಪ್ರಾಥಮಿಕ ಚಿಕಿತ್ಸೆನೀಡಿ ಸ್ಥಳೀಯ ಆಸ್ಪತ್ರೆಗಳಿಗೆ ದಾಖಲು ಮಾಡಲಾಗಿತ್ತು ಎಂದು ಹೇಳಿದ್ದಾರೆ. 

ಯೋಧರು ಚಿಕಿತ್ಸೆ ಪಡೆದುಕೊಂಡ ಬಳಿಕ ಹಲವು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಪ್ರಕರಣ ಸಂಬಂಧ ತನಿಖೆಗೆ ಆದೇಶಿಸಲಾಗಿದೆ. ಯೋಧರಿಗೆ ನೀಡಲಾದ ಆಹಾರದ ಮಾದರಿಯನ್ನು ತೆಗೆದುಕೊಳ್ಳಲಾಗಿದ್ದು, ಶೀಲನೆ ನಡೆಸಲಾಗುತ್ತಿದೆ. ಆಹಾರಕ್ಕೆ ಬಳಸಲಾದ ಮೀನುಗಳು ಸರಿಯಿರಲಿಲ್ಲ ಎಂದು ಹೇಳಲಾಗುತ್ತಿದೆ. ಪ್ರಕರಣ ಸಂಬಂಧ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.