ಬಿಜೆಪಿ ಅವಧಿಯಲ್ಲೇ ರೈಲ್ವೆ ಇಲಾಖೆಯ ಕಳಪೆ ಕಾರ್ಯನಿರ್ವಹಣೆ ಅನುಪಾತ: ಪಿ ಚಿದಂಬರಂ

ನವದೆಹಲಿ: ಭಾರತೀಯ ರೈಲ್ವೆ ಇಲಾಖೆಯ ಸಮಸ್ಯೆ ತುಂಬಾ ಆಳವಾಗಿ ಬೇರೂರಿದ್ದು, ಸರ್ಕಾರಿ ಸ್ವಾಮ್ಯದ ಇಲಾಖೆಯನ್ನಾಗಿ ನಿರ್ವಹಣೆ ಮಾಡುವುದಕ್ಕೆ ಸಾಧ್ಯವಿಲ್ಲ ಎಂದು ಮಾಜಿ ವಿತ್ತ ಸಚಿವ ಪಿ ಚಿದಂಬರಂ ಹೇಳಿದ್ದಾರೆ. 

ರೈಲ್ವೆ ಇಲಾಖೆ ಬಿಜೆಪಿ ಆಡಳಿತಾವಧಿಯಲ್ಲೇ ಅತ್ಯಂತ ಕಳಪೆ ಕಾರ್ಯನಿರ್ವಹಣೆಯ ಗುಣಮಟ್ಟ ಹೊಂದಿದೆ. 2000-01 ಹಾಗೂ 2016-17 ಎರಡೂ ಅವಧಿಯಲ್ಲಿ ರೈಲ್ವೆ ಇಲಾಖೆ ಕಳಪೆ ಕಾರ್ಯನಿರ್ವಹಣೆಯ ಗುಣಮಟ್ಟ ಹೊಂದಿದ್ದು, ಎರಡೂ ಅವಧಿಯಲ್ಲಿ ಇದ್ದದ್ದು ಬಿಜೆಪಿ ಸರ್ಕಾರವೇ ಎಂದು ಚಿದಂಬರಂ ಆರೋಪಿಸಿದ್ದಾರೆ. 

ಟ್ವಿಟರ್ ನಲ್ಲಿ ಈ ಬಗ್ಗೆ ಟ್ವೀಟ್ ಮಾಡಿರುವ ಚಿದಂಬರಂ, ರೈಲ್ವೆ ಇಲಾಖೆಯ ಸಮಸ್ಯೆ ಆಳವಾದದ್ದು ಅದನ್ನು ಸರ್ಕಾರಿ ಇಲಾಖೆಯಂತೆ ನಡೆಸಲು ಸಾಧ್ಯವಿಲ್ಲ. ರೈಲ್ವೆ ಇಲಾಖೆ ಒಂದು ರೂಪಾಯಿ ಆದಾಯ ಗಳಿಸಬೇಕಾದರೆ ಎಷ್ಟು ಖರ್ಚು ಮಾಡಬೇಕೆಂಬುದನ್ನು ಕಾರ್ಯನಿರ್ವಹಣೆಯ ಅನುಪಾತ ತೋರಿಸುತ್ತದೆ. ಉದಾಹರಣೆಗೆ 100 ಪೈಸೆಗಳನ್ನು (ಒಂದು ರೂಪಾಯಿ) ಗಳಿಸಲು ರೈಲ್ವೆ ಇಲಾಖೆ 94.9 ಪೈಸೆಯನ್ನು ಖರ್ಚು ಮಾಡುತ್ತಿದೆ. ಕಾರ್ಯನಿರ್ವಹಣೆಯ ಅನುಪಾತ ಉಳಿದ ವರ್ಷಗಳಿಗೆ ಹೋಲಿಸಿದರೆ 2016-17 ರಲ್ಲಿ ಆತಂಕಕಾರಿಯಾಗಿದೆ ಎಂದು ಚಿದಂಬರಂ ಹೇಳಿದ್ದಾರೆ. 

ರೈಲ್ವೆ ಇಲಾಖೆ ಕಾರ್ಯನಿರ್ವಹಣೆ ಬಗ್ಗೆ ಲೋಕಸಭೆಗೆ ಮಾಹಿತಿ ನೀಡಿದ್ದ ರೈಲ್ವೆ ಇಲಾಖೆ ರಾಜ್ಯ ಸಚಿವ ರಾಜೆನ್ ಗೋಹೈನ್ ರೈಲ್ವೆ ಇಲಾಖೆಯ ಕಾರ್ಯನಿರ್ವಹಣೆಯ ಅನುಪಾತ ಶೇ.94.9 ರಷ್ಟಿದೆ ಎಂದಿದ್ದರು. ಇದೇ ಅನುಪಾತ 2000-01 ರಲ್ಲಿ ಶೇ.80 ರಷ್ಟಿತ್ತು.