ಸುಕ್ಮಾ ದಾಳಿ ನಂತರ ಎಚ್ಚೆತ್ತ ಸರ್ಕಾರ, ಸಿಆರ್ ಪಿಎಫ್ ಗೆ ನೂತನ ಮುಖ್ಯಸ್ಥರ ನೇಮಕ

ನವದೆಹಲಿ: ಛತ್ತೀಸ್ ಗಢದ ಸುಕ್ಮಾ ಜಿಲ್ಲೆಯಲ್ಲಿ ಮಾವೋವಾದಿಗಳು 25 ಸಿಆರ್‌ಪಿಎಫ್ ಯೋಧರನ್ನು ಬಲಿ ಪಡೆದ ನಂತರ ಎಚ್ಚೆತ್ತುಕೊಂಡ ಕೇಂದ್ರ ಸರ್ಕಾರ, ಕಳೆದ ಎರಡು ತಿಂಗಳಿಂದ ಖಾಲಿ ಇದ್ದ ಕೇಂದ್ರ ಮೀಸಲು ಪೊಲೀಸ್ ಪಡೆ(ಸಿಆರ್ ಪಿಎಫ್)ಯ ಮುಖ್ಯಸ್ಥನ ಸ್ಥಾನಕ್ಕೆ ಬುಧವಾರ ರಾಜೀವ್ ರೈ ಭಟ್ನಾಗರ್ ರನ್ನು ನೇಮಕ ಮಾಡಿದೆ.

ಸಿಆರ್‌ಪಿಎಫ್ ಮುಖ್ಯಸ್ಥರಾಗಿದ್ದ ಕೋಡೆ ದುರ್ಗಾ ಪ್ರಸಾದ್ ನಿವೃತ್ತಿ ನಂತರ ಸುಮಾರು ಎರಡು ತಿಂಗಳ ಕಾಲ ಯಾರನ್ನೂ ಸಿಆರ್‌ಪಿಎಫ್ ಮುಖ್ಯಸ್ಥರ ಸ್ಥಾನಕ್ಕೆ ನೇಮಿಸಿರಲಿಲ್ಲ. ಹೀಗಾಗಿ ಛತ್ತೀಸ್ ಘಡ ನಕ್ಸಲ್ ದಾಳಿ ನಡೆದಾಗ ಮುಖ್ಯಸ್ಥರ ಹುದ್ದೆಯನ್ನು ಖಾಲಿ ಬಿಟ್ಟಿದ್ದಕ್ಕೆ ಸರ್ಕಾರ ಭಾರೀ ಟೀಕೆಗೆ ಗುರಿಯಾಗಿತ್ತು. ಇದೀಗ ಡಿಜಿಪಿ ಹುದ್ದೆಗೆ ರಾಜೀವ್ ರೈ ನೇಮಕ ಮಾಡಿ ಕೇಂದ್ರ ಗೃಹ ಇಲಾಖೆ ಆದೇಶ ಹೊರಡಿಸಿದೆ.

1983ರ ಉತ್ತರ ಪ್ರದೇಶ ಕೇಡರ್ ಐಪಿಎಸ್ ಅಧಿಕಾರಿಯಾಗಿರುವ ರಾಜೀವ್ ರೈ ಭಟ್ನಾಗರ್ ಅವರು ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋದಲ್ಲಿ ಎಡಿಜಿಪಿಯಾಗಿ ಕಾರ್ಯನಿರ್ವಹಿಸುತ್ತಿದ್ದರು.