ಗುಜರಾತ್ ನಲ್ಲಿ ದುಬಾರಿ ಶಿಕ್ಷಣ ಶುಲ್ಕವೇ ಹೊರೆ; ನವಭಾರತದ ಕನಸು ಹೇಗೆ ಸಾಧ್ಯ: ಮೋದಿಗೆ ರಾಹುಲ್ ಪ್ರಶ್ನೆ

ನವದೆಹಲಿ: ಗುಜರಾತ್ ವಿಧಾನಸಭಾ ಚುನಾವಣೆ ಪ್ರಚಾರದಲ್ಲಿ ನಿರತರಾಗಿರುವ ಎಐಸಿಸಿ ಉಪಾಧ್ಯಕ್ಷ ರಾಹುಲ್ ಗಾಂಧಿ, ರಾಜ್ಯದಲ್ಲಿರುವ ಸರ್ಕಾರಿ ಶೈಕ್ಷಣಿಕ ಸಂಸ್ಥೆಗಳಲ್ಲಿರುವ ದುಬಾರಿ ಶಿಕ್ಷಣ ಶುಲ್ಕದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಪ್ರಶ್ನಿಸಿದ್ದಾರೆ. 

22 ವರ್ಷಗಳ ಲೆಕ್ಕವನ್ನು ಗುಜರಾತ್ ಕೇಳುತ್ತಿದೆ, ಗುಜರಾತ್ ನಲ್ಲಿರುವ ಸರ್ಕಾರಿ ಶಾಲಾ ಕಾಲೇಜುಗಳಲ್ಲಿ, ದುಬಾರಿ ಶಿಕ್ಷಣ ಶುಲ್ಕ ನಿಗದಿಪಡಿಸಲಾಗಿದ್ದು ವಿದ್ಯಾರ್ಥಿಗಳಿಗೆ ಹೊರೆಯಾಗುತ್ತಿದೆ ಹೀಗಿರುವಾಗ ನವಭಾರತದ ಕನಸು ಹೇಗೆ ಸಾಧ್ಯ ಎಂದು ರಾಹುಲ್ ಗಾಂಧಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಪ್ರಶ್ನಿಸಿದ್ದಾರೆ.

ಶಿಕ್ಷಣ ಕ್ಷೇತ್ರದ ಹೂಡಿಕೆ ವಿಚಾರದಲ್ಲಿ ಗುಜರಾತ್ ಏಕೆ 26 ನೇ ಸ್ಥಾನದಲ್ಲಿದೆ? ಯುವಕರೇನು ತಪ್ಪು ಮಾಡಿದ್ದಾರೆ ಎಂದು ರಾಹುಲ್ ಗಾಂಧಿ ಕೇಳಿದ್ದಾರೆ. ಗುಜರಾತ್ ನಲ್ಲಿ ಚುನಾವಣೆ ಪ್ರಾರಂಭವಾಗುವವರೆಗೂ ಮೋದಿಗೆ ಒಂದೊಂದು ಪ್ರಶ್ನೆ ಕೇಳುವ ಪಕ್ಷದ ಕಾರ್ಯತಂತ್ರದ ಭಾಗವಾಗಿ ರಾಹುಲ್ ಗಾಂಧಿ ಮೋದಿ ಅವರನ್ನು ಪ್ರಶ್ನಿಸಿದ್ದಾರೆ.