ಅಲ್ ಖೈದಾದಿಂದ ಬೆಂಗಳೂರು, ಮುಂಬೈ, ದೆಹಲಿಯಲ್ಲಿ ಉಗ್ರ ದಾಳಿಯ ಬೆದರಿಕೆ

ನವದೆಹಲಿ: ಕಾಶ್ಮೀರ ಗೆಲುವಿಗಾಗಿ ಬೆಂಗಳೂರು, ಮುಂಬೈ, ದೆಹಲಿ ಹಾಗೂ ಕೊಲ್ಕತಾದಲ್ಲಿ ಉಗ್ರ ದಾಳಿ ನಡೆಸುವುದಾಗಿ ಜಾಗತಿಕ ಉಗ್ರ ಸಂಘಟನೆ ಅಲ್ ಖೈದಾ ಬುಧವಾರ ಬೆದರಿಕೆ ಹಾಕಿದೆ.

ಇಂದು ಉಗ್ರ ಸಂಘಟನೆ ಹೊಸ ವಿಡಿಯೋ ಒಂದನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ ಭಾರತೀಯ ಮೆಟ್ರೋ ನಗರಗಳನ್ನು ಗುರಿಯಾಗಿಸಿಕೊಂಡಿರುವ ಆಘಾತಕಾರಿ ವಿಚಾರಗಳನ್ನು ತಿಳಿಸಿದೆ.

ಕಾಶ್ಮೀರ ವಿವಾದಕ್ಕೆ ಸುಲಭ ಪರಿಹಾರ ಇಲ್ಲ. ಅದಕ್ಕೆ ಮುಸ್ಲಿಮರ ರಕ್ತ ಮತ್ತು ಬೆವರಿನ ಅಗತ್ಯ ಇದೆ. ಆದರೆ ಭಾರತ ಕಾಶ್ಮೀರದಂತಹ ಒಂದು ಸಣ್ಣ ಸ್ಥಳದಲ್ಲಿ 6 ಲಕ್ಷ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಿದೆ. ಹೀಗಾಗಿ ನಾವು ಬೆಂಗಳೂರು, ಕೋಲ್ಕತಾ ಹಾಗೂ ದೆಹಲಿಯಲ್ಲಿ ದಾಳಿ ಮಾಡುವ ಮೂಲಕ ಕಾಶ್ಮೀರ ಭದ್ರತೆಯನ್ನು ದುರ್ಬಲಗೊಳಿಸಬೇಕು ಎಂದು ಅಲ್ ಖೈದಾ ವಕ್ತಾರ ಒಸಾಮಾ ಮಹಮ್ಮದ್ ವಿಡಿಯೋದಲ್ಲಿ ಹೇಳಿದ್ದಾನೆ.

ಭಾರತದ ಇತರೆ ನಗರಳಲ್ಲಿ ದಾಳಿ ನಡೆದಾಗ ಅಲ್ಲಿ ಭದ್ರತೆಯನ್ನು ಹೆಚ್ಚಿಸಲಾಗುತ್ತದೆ. ಆಗ ಕಾಶ್ಮೀರದಲ್ಲಿ ಭದ್ರತೆ ದುರ್ಬಲವಾಗುತ್ತದೆ. ಇದೇ ಅವಕಾಶ ಬಳಸಿಕೊಂಡು ಕಾಶ್ಮೀರ ವಶಕ್ಕೆ ಪಡೆದುಕೊಳ್ಳಬಹುದು ಎಂದು ವಿಡಿಯೋದಲ್ಲಿ ಹೇಳಲಾಗಿದೆ.