ಮಣಿಪುರ ಚುನಾವಣೆ: ತೌಬಲ್ ಕ್ಷೇತ್ರದಿಂದ ಉಕ್ಕಿನ ಮಹಿಳೆ ಇರೊಮ್ ಶರ್ಮಿಳಾ ನಾಮಪತ್ರ ಸಲ್ಲಿಕೆ

ಇಂಫಾಲ್:ಮಣಿಪುರ ವಿಧಾನಸಭಾ ಚುನಾವಣೆಯಲ್ಲಿ ತೌಬಲ್ ವಿಧಾನಸಭಾ ಕ್ಷೇತ್ರದಿಂದ ಉಕ್ಕಿನ ಮಹಿಳೆ ಎಂದೇ ಖ್ಯಾತಿ ಗಳಿಸಿದ ಇರೋಮ್ ಶರ್ಮಿಳಾ ಶುಕ್ರವಾರ ನಾಮಪತ್ರ ಸಲ್ಲಿಸಿದರು.

ಪೀಪಲ್ಸ್ ರಿಸರ್ಜೆನ್ಸ್ ಅಂಡ್ ಜಸ್ಟೀಸ್ ಅಲಯನ್ಸ್ ಪಕ್ಷದ ಪರವಾಗಿ ಶರ್ಮಿಳಾ ನಾಮಪತ್ರ ಸಲ್ಲಿಸಿದರು.ಇಂಫಾಲ್ ನಿಂದ 20 ಕಿಲೋ ಮೀಟರ್ ದೂರ ಸೈಕಲ್ ನಲ್ಲಿ ತೆರಳಿ ಶರ್ಮಿಳಾ ನಾಮಪತ್ರ ಸಲ್ಲಿಸಿದ್ದಾರೆ.

 ಎಫ್ ಎಸ್ ಪಿಎ ವಿರೋಧಿ(ಸೇನಾ ಪಡೆಯ ವಿಶೇಷ ಹಕ್ಕುಗಳ ಕಾಯ್ದೆ) ಹೋರಾಟಗಾರ್ತಿ ಶರ್ಮಿಳಾ ಅವರು 16 ವರ್ಷಗಳ ಉಪವಾಸ ಸತ್ಯಾಗ್ರಹವನ್ನು ಕಳೆದ ವರ್ಷ ಆಗಸ್ಟ್ ನಲ್ಲಿ ಕೊನೆಗೊಳಿಸಿದ್ದರು. ಇವರು ಮುಖ್ಯಮಂತ್ರಿ ಮತ್ತು ಕಾಂಗ್ರೆಸ್ ಹಿರಿಯ ನಾಯಕ ಒಕ್ರಮ್ ಇಬೊಬಿ ಸಿಂಗ್ ಅವರ ವಿರುದ್ಧ ತೌಬಲ್ ನಲ್ಲಿ ಸ್ಪರ್ಧೆಗಿಳಿದಿದ್ದಾರೆ. 

 ಮಣಿಪುರ ರಾಜ್ಯದಲ್ಲಿ ಮಾರ್ಚ್ 4 ಮತ್ತು 8ರಂದು ಎರಡು ಹಂತಗಳಲ್ಲಿ ವಿಧಾನಸಭೆ ಚುನಾವಣೆ ನಡೆಯಲಿದೆ.