ಉತ್ತರ ಪ್ರದೇಶ: ಅಖಿಲೇಶ್ ಯಾದವ್ ಸೈಕಲ್ ಟ್ರ್ಯಾಕ್ ತೆಗೆಸಲು ಯೋಗಿ ಸರ್ಕಾರದ ನಿರ್ಧಾರ

ಲಕ್ನೋ: ಉತ್ತರ ಪ್ರದೇಶದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದ ನಂತರ  ಸಮಾಜವಾದಿ ಪಕ್ಷದ ಹಲವು ಯೋಜನೆಗಳ ಹೆಸರನ್ನು ಬದಲಾಯಿಸಿತ್ತು. ಈಗ ರಸ್ತೆಗಳ ಮೇಲೆ ಗಮನ ಹರಿಸಿರುವ ನಗರಾಭಿವೃದ್ಧಿ ಇಲಾಖೆ, ರಸ್ತೆಗಳ ಮೇಲಿರುವ ಸಮಾಜವಾದಿ ಪಕ್ಷದ ಸಂಕೇತವಾಗಿರುವ ಸೈಕಲ್ ಟ್ರ್ಯಾಕ್ ತೆಗೆಸಲು ನಿರ್ಧರಿಸಿದೆ.

ಲಕ್ನೋ, ನೋಯ್ಡಾ, ರಾಯ್ ಬರೇಲಿ, ಸೇರಿದಂತೆ ಉತ್ತರ ಪ್ರದೇಶದ ಎಲ್ಲಾ ನಗರ ವ್ಯಾಪ್ತಿಗೆ ಬರುವ ರಸ್ತೆಗಳ ಮೇಲಿನ ಸೈಕಲ್ ಟ್ರ್ಯಾಕ್ ತೆಗೆಸಲಾಗುವುದು.ಈ ಮೊದಲು ಸರ್ಕಾರ ಹಲವು ಯೋಜನೆಗಳಿಗೆ ಸಮಾಜವಾದಿ ಯೋಜನ ಎಂಬ ಹೆಸರಿಡಲಾಗಿತ್ತು, ಅದನ್ನು ಬದಲಾಯಿಸಿ ಮುಖ್ಯಮಂತ್ರಿ, ಪ್ರಧಾನಮಂತ್ರಿ ಎಂಬುದಾಗಿ ಬದಲಾವಣೆ ಮಾಡಲಾಗಿತ್ತು. 

ಸೈಕಲ್ ಟ್ರ್ಯಾಕ್ ಯೋಜನೆಯನ್ನು ಕಳೆದ ವರ್ಷ ಆರಂಭಿಸಿ ಚುನಾವಣೆ ವೇಳೆಗೆ ಮುಕ್ತಾಯಗೊಳಿಸಲಾಗಿತ್ತು. ಮುನಿಸಿಪಲ್ ಕಾರ್ಪೋರೇಷನ್ ಮತ್ತು ಮುನಿಸಿಪಾಲಿಟಿಗಳಿಗೆ ಸೈಕಲ್ ಟ್ರ್ಯಾಕ್ ತೆಗೆಸುವಂತೆ ಆದೇಶಿಸಲಾಗಿದೆ ಎಂದು ನಗರಾಭಿವೃದ್ಧಿ ಸಚಿವ ಸುರೇಶ್ ಕನ್ನಾ ಹೇಳಿದ್ದಾರೆ. 

ಸೈಕಲ್ ಟ್ರ್ಯಾಕ್ ನಿಂದ ಟ್ರಾಫಿಕ್ ಸಮಸ್ಯೆ ಎದುರಾಗುತ್ತಿದೆ ಎಂದು ನಿವಾಸಿಗಳ ದೂರಿನ  ಹಿನ್ನೆಲೆಯಲ್ಲಿ ಸೈಕಲ್ ಟ್ರ್ಯಾಕ್ ತೆಗೆಸಲಾಗುತ್ತಿದೆ. ಬರೈಲಿಯಿಂದ ಇದನ್ನು ಆರಂಭಿಸಲಾಗುವುದು ಎಂದು ಅವರು ಹೇಳಿದ್ದಾರೆ.