ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ಶುಕ್ರವಾರ ತೀವ್ರ ವಾಗ್ದಾಳಿ ನಡೆಸಿದ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಅವರು, ಪಂಜಾಬ್ ನ್ಯಾಷನಲ್ ಬ್ಯಾಂಕ್(ಪಿಎನ್ ಬಿ) ವಂಚನೆ ಪ್ರಕರಣದ ಆರೋಪಿ, ವಜ್ರದ ವ್ಯಾಪಾರಿ ಮೆಹುಲ್ ಚೋಕ್ಸಿಗೆ ಮೋದಿ ಸರ್ಕಾರ ಕ್ಲೀನ್ ಚಿಟ್ ನೀಡಿದೆ ಎಂದು ಆರೋಪಿಸಿದ್ದಾರೆ.
ಮೋದಿ ಸರ್ಕಾರ ಮೆಹುಲ್ ಚೋಕ್ಸಿಗೆ ನವೆಂಬರ್ 2017ರಲ್ಲಿ ಆ್ಯಂಟಿಗುವಾ ಪೌರತ್ವ ನೀಡಲು ಆಕ್ಷೇಪ ವ್ಯಕ್ತಪಡಿಸದೆ ಕ್ಲೀನ್ ಚಿಟ್ ನೀಡಿದೆ. ಈ ವ್ಯಕ್ತಿ ಪಿಎನ್ ಬಿಯಿಂದ 13 ಸಾವಿರ ಕೋಟಿ ರುಪಾಯಿ ಲೂಟಿ ಮಾಡಿ ಪರಾರಿಯಾಗಿದ್ದಾನೆ ಎಂದು ರಾಹುಲ್ ಗಾಂಧಿ ಟ್ವೀಟ್ ಮಾಡಿದ್ದಾರೆ.
ಪ್ರಧಾನಿ ಮೋದಿ ಅವರು ಮೆಹುಲ್ ಚೋಕ್ಸಿ ಜತೆ ಇರುವ ಮತ್ತು ವಜ್ರದ ವ್ಯಾಪಾರಿಯನ್ನು ಹೊಗಳುತ್ತಿರುವ ವಿಡಿಯೋವೊಂದನ್ನು ಸಹ ರಾಹುಲ್ ಟ್ವೀಟ್ ಮಾಡಿದ್ದಾರೆ.
ಮೆಹುಲ್ ಚೋಕ್ಸಿಗೆ ಆ್ಯಂಟಿಗುವಾ ಪೌರತ್ವ ನೀಡುವ ಸಂದರ್ಭದಲ್ಲಿ ಭಾರತ ಆಕ್ಷೇಪ ವ್ಯಕ್ತಪಡಿಸಿಲ್ಲ. ಚೋಕ್ಸಿ ಅವರ ಪೌರತ್ವ ಅರ್ಜಿ ಜತೆ ಸ್ಥಳೀಯ ಪೊಲೀಸರಿಂದ ಅನುಮತಿ ಪಡೆದ ಪ್ರಮಾಣಪತ್ರವನ್ನು ನಿಯಮಾವಳಿಗಳ ಅನ್ವಯ ಲಗತ್ತಿಸಲಾಗಿದೆ. ಈ ಪ್ರಮಾಣಪತ್ರವನ್ನು ವಿದೇಶಾಂಗ ಇಲಾಖೆಯ ಮುಂಬೈನ ಪ್ರಾದೇಶಿಕ ಕಚೇರಿ ಸಹ ದೃಢೀಕರಿಸಿದೆ. ಆದರೆ ಯಾವುದೇ ರೀತಿಯ ವ್ಯತಿರಿಕ್ತ ಮಾಹಿತಿ ನೀಡಿರಲಿಲ್ಲ ಎಂದು ಆ್ಯಂಟಿಗುವಾ ದಿ ಡೇಲಿ ಅಬ್ಸರ್ವರ್ ವರದಿ ಮಾಡಿದೆ.
ಒಂದು ವೇಳೆ ವ್ಯತಿರಿಕ್ತ ವರದಿ ನೀಡಿದ್ದರೆ ಚೋಕ್ಸಿಗೆ ಆ್ಯಂಟಿಗುವಾ ಪೌರತ್ವ ಸಿಗುತ್ತಿರಲಿಲ್ಲ ಮತ್ತು ವಿದೇಶ ಪ್ರಯಾಣಕ್ಕೆ ಅವಕಾಶ ದೊರೆಯುತ್ತಿರಲಿಲ್ಲ ಎಂದು ವರದಿ ತಿಳಿಸಿದೆ.
