ಉತ್ತರ ಪ್ರದೇಶ: ಮೊಬೈಲ್ ಸಂಭಾಷಣೆ ತಂದ ಕುತ್ತು, ಮದುವೆಯ ದಿನವೇ ರೈಲು ಹರಿದು ಯುವಕ ಸಾವು

ಬರೇಲಿ (ಉತ್ತರ ಪ್ರದೇಶ): ಮದುವೆಯಾಗಬೇಕಾಗಿದ್ದ ಯುವಕ ಮೊಬೈಲ್ ಸಂಭಾಷಣೆ ಯಲ್ಲಿ ನಿರತನಾಗಿದ್ದ ವೇಳೆ ಎಕ್ಸ್‌ ಪ್ರೆಸ್‌ ರೈಲಿನಡಿ ಸಿಕ್ಕಿ ದಾರುಣವಾಗಿ ಸಾವನ್ನಪ್ಪಿದ್ದ ಘಟನೆ ಉತ್ತರ ಪ್ರದೇಶದ ಬರೇಲಿಯಲ್ಲಿ ನಡೆದಿದೆ. 

ನರೇಶ್‌ ಪಾಲ್‌ ಗಂಗ್ವಾರ್‌ ಎನ್ನುವ ಯುವ ಇಂಜಿನಿಯರ್ ಮೃತಪಟ್ಟಿದ್ದು ಉತ್ತರ ಪ್ರದೇಶದ ನಂದೋಸಿ ಗ್ರಾಮದಲ್ಲಿ ಈ ಘಟನೆ ಸಂಬವಿಸಿದೆ. ನೋಯ್ಡಾದಲ್ಲಿ ಸಿವಿಲ್‌ ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದ ನರೇಶ್ ಗೆ ಭಾನುವಾರ ಸಂಜೆ ಶಹಜಾನ್‌ಪುರದಲ್ಲಿ ಉಮಾ ಗಂಗ್ವಾರ್‌ ಅವರೊಡನೆ ವಿವಾಹ ಆಗುವವರಿದ್ದರು. ಮನೆ ಮಂದಿಯೆಲ್ಲರೂ ಮದುವೆ ಸಂಭ್ರಮದಲ್ಲಿರುವಾಗಲೇ ಈ ದುರಂತ ಸುದ್ದಿ ಬರಸಿಡಿಲಿನಂತೆ ಬಂದೆರಗಿದೆ.

ಮನೆಗಿಂತ 50 ಮೀಟರ್‌ ದೂರದಲ್ಲಿ ರೈಲ್ವೆ ಹಳಿ ಇತ್ತು. ಸಹೋದ್ಯೋಗಿಗಳ ಕರೆಗೆ ಉತ್ತರಿಸುವ ಸಲುವಾಗಿ ನರೇಶ್‌ ರೈಲ್ವೆ ಹಳಿ ಸಮೀಪ ಬಂದಿದ್ದಾರೆ. ಆಗ ಒಂದು ಮೊಬೈಲ್ ನಲ್ಲಿ ಮಾತನಾಡುತ್ತಾ, ಇನ್ನೊಂದು ಮೊಬೈಲ್ ನಲ್ಲಿ ಸಂದೇಶವನ್ನು ಕಳಿಸುತ್ತಿದ್ದ ನರೇಶ್ ಗೆ ಎದುರಿನಿಂದ ರೈಲು ಬರುತ್ತಿದ್ದದ್ದೂ ಗಮನಕ್ಕೆ ಬರಲಿಲ್ಲ. ಹೀಗಾಗಿ ನರೇಶ್‌ ಗೆ ರಾಜ್ಯ ರಾಣಿ ಎಕ್ಸ್‌ ಪ್ರೆಸ್‌ ರೈಲು ಡಿಕ್ಕಿ ಹೊಡೆದುಕೊಂಡು ಹೋಗಿದೆ ಎಂದು ಅವರ ಸಂಬಂಧಿಕರು ಹೇಳಿದ್ದಾರೆ.

ಘಟನೆಯಿಂದ ನರೇಶ್ ಪೋಷಕರು, ವಧು ಆಘಾತಗೊಂಡಿದ್ದು ಇಡೀ ಮದುವೆ ಮನೆಯಲ್ಲಿ ಸ್ಮಶಾನ ಮೌನ ಆವರಿಸಿದೆ. 

ನರೇಶ್‌ ಸಾವು ಅವರ ಅವಿವೇಕತನದಿಂದ ಉಂಟಾಗಿದೆ, ಹೊರತು ವಧುವಿನ ಲಕ್ಷಣದಿಂದಲ್ಲ ಎಂದು ಹೇಳಲಾಗುತ್ತಿದೆ. 2014ರಿಂದ 2016ರ ಜನವರಿವರೆಗೆ ಸೆಲ್ಫಿ ಸೇರಿದಂತೆ ಮೊಬೈಲ್ ಫೋನ್ ನಿಂದಾಗಿ 16 ಮಂದಿ ರೈಲ್ವೆ ಅಪಘಾತದಲ್ಲಿ ಸಾವನ್ನಪ್ಪಿದ್ದಾರೆ.