ಉದ್ಯೋಗ ಸೃಷ್ಟಿ, ಅತ್ಯಾಚಾರ ತಡೆಗೆ ನಿಮ್ಮ ಯೋಜನೆ ಏನು?: ಮೋದಿಗೆ ರಾಹುಲ್ ಪ್ರಶ್ನೆ

ನವದೆಹಲಿ: ಉದ್ಯೋಗ ಸೃಷ್ಟಿಸಲು, ಡೊಕ್ಲಾಮ್ ನಿಂದ ಚೀನಿಯರನ್ನು ಹೊರಹಾಕಲು ಮತ್ತು ಹರಿಯಾಣದಲ್ಲಿನ ಅತ್ಯಾಚಾರ ತಡೆಯಲು ನಿಮ್ಮ ಯೋಜನೆಗಳು ಏನು ಎಂಬುದನ್ನು ವಿವರಿಸಿ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಅವರು ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಶ್ನಿಸಿದ್ದಾರೆ. 

ಜನವರಿ 28ರಂದು ಪ್ರಸಾರವಾಗಲಿರುವ 'ಮನ್ ಕಿ ಬಾತ್' ಬಗ್ಗೆ ನಿಮ್ಮ ವಿಚಾರಗಳನ್ನು ತಿಳಿಸಿ ಎಂದು ಪ್ರಧಾನಿ ಮೋದಿ ದೇಶದ ಜನತೆಯನ್ನು ಕೇಳಿದ ಬೆನ್ನಲ್ಲೇ ರಾಹುಲ್ ಗಾಂಧಿ ಅವರು ಉದ್ಯೋಗ ಸೃಷ್ಟಿ, ಅತ್ಯಾಚಾರ ತಡೆಗೆ ನಿಮ್ಮ ಯೋಜನೆ ಏನು? ಎಂದು ಪ್ರಧಾನಿಯನ್ನು ಪ್ರಶ್ನಿಸಿದ್ದಾರೆ.

ಆತ್ಮೀಯ ನರೇಂದ್ರ ಮೋದಿ ಅವರೇ, ನೀವು ನಿಮ್ಮ ಮನ್ ಕಿ ಬಾತ್ ಬಗ್ಗೆ ಜನರಿಗೆ ವಿಚಾರ ತಿಳಿಸುವಂತೆ ಮನವಿ ಮಾಡಿದ್ದೀರಿ, ಆದರೆ ನಮ್ಮ ಯುವಕರು ಉದ್ಯೋಗ ಪಡೆಯುವುದು ಹೇಗೆ?, ಡೊಕ್ಲಾಮ್ ನಿಂದ ಚೀನಿಯರನ್ನು ಹೊರ ಹಾಕುವುದು ಹೇಗೆ? ಮತ್ತು ಹರಿಯಾಣದಲ್ಲಿ ಅತ್ಯಾಚಾರ ತಡೆಯಲು ನಿಮ್ಮ ಯೋಜನೆಗಳು ಏನು? ಎಂಬುದನ್ನು ವಿವರಿಸಿ ಎಂದು ರಾಹುಲ್ ಟ್ವೀಟ್ ಮಾಡಿದ್ದಾರೆ.

ಇತ್ತೀಚಿಗೆ ಹರಿಯಾಣದಲ್ಲಿ ಅತ್ಯಾಚಾರ ಪ್ರಕರಣಗಳು ಹೆಚ್ಚುತ್ತಿದ್ದು, ಆಡಳಿತರೂಢ ಬಿಜೆಪಿ ಪ್ರತಿಪಕ್ಷಗಳ ತೀವ್ರ ಟೀಕೆಗೆ ಗುರಿಯಾಗಿದೆ.